Lukas 2:4-22

⁴Yosep pughu toni ivot ila to kinik David. Tovenen igham Maria, liva to tisia pani ne, ve yesuru tipul ndug Nasaret to ineep ila taan suruvu to Galilaia, ve tilaagh tila tivot taan suruvu to Yudea. Ghoro malmalidi tila tivot ndug to kinik David, iza Betelem. Leso tighur izadi. Sawa tonenen, Maria ye apo.

⁶Tinepneep tonowe, ve Maria sawa toni to popaaŋ ivot.

⁷Tovenen ipoop natu aidaba, ve ikaukaui pa uli, ghoro ipagheena ila ŋgai inadi to ghanghaniiŋ. Yes tineep tonowe pasa, ruum to loomba tisob tivon.

⁸Mboŋ tonenen, ŋginiiŋa pida to sipsip tineep izi ndug Betelem dige, ve tiŋginŋgin sipsip todi.

⁹Mala maau ve aŋela eez to Ŋgeu Tiina ivot todi, ve Ŋgeu Tiina ŋguruba isul luvutin di. Tovenen matughezaaŋ tiina kat igham di.

¹⁰Eemoghon aŋela tonowen isaav padi ighaze: “Yam amatughez malep! Alooŋ. You nanim pa napaesia varu poia payam. Varu poia tonene pale igham tamtoghon tisob lolodi poia le poia kat.

¹¹Pasa, mboŋ aazne, Volaaŋa tiam, tina ipoopa izi ndug to David wa. Ye Mesia, ve Tiina tiam.

¹²Mbeb tonene pale ipatooŋa payam: Ala, pale aghita pain kainaŋen eez to tikaukaui pa uli, ve tipagheena igheen ila ŋgai inadi to ghanghaniiŋ.”

¹³Mala maau ve aŋela ndiŋndiŋ ndiŋndiŋ to ndug sambam tikeet tizi tinim, ve tilup di toman aŋela tonowen, ve tipait Maaron iza tighaze:

¹⁴“Tapait Maaron to ineep sala le sala kat ne iza pa tapiri ve poia toni. Mboŋ aazne, luuma to Maaron izi inim taan. Tovenen yes to ye lolo poia padi, nene pale luuma toni iza todi, ve tineep pooi.”

¹⁵Yes aŋela tipul di, ve timuul tiza tila pa sambam. Ghoro yes ŋginiiŋa to sipsip tonenen tiwasavon di tighaze: “Yo, tamundig, ve tala pa Betelem. Leso taghita mbeb to Ŋgeu Tiina ipaesia pait ne.”

¹⁶Tovenen tilaagh rikia tila, ve tighita Maria yesuru Yosep ve natudi. Ye ighengheen ila ŋgai inadi to ghanghaniiŋ.

¹⁷Tighita di le isob, ghoro tipaesia saveeŋ to aŋela isavia padi pa pain kainaŋen tonenen.

¹⁸Ival tisob to tilooŋ saveeŋ todi, ruŋadi iza ve tigham ŋgar naol.

¹⁹Ve Maria ikis saveeŋ tonenen isob ineep ila lolo, ve mata iŋgalŋgali.

²⁰Muri ghoro, yes ŋginiiŋa to sipsip timuul tila. Tilaghlaagh, ve tipapait Maaron iza pa mbeb tisob to tilooŋa ve tighita. Pasa, mbeb tonenen ivot itaghon katin saveeŋ to aŋela isavia padi.

²¹Tinepneep ve mboŋ liim ve tol inim ila, ghoro uraat to zirooŋ natudi tonenen ivot, ve tiwaat iza Yesu. Pisis tonene, Maria apo sone, ve aŋela iwaata pataghaaŋ wa.

²²Maria yesuru Yosep tineep le sawa todi ivot pa tigharaat taudi, leso tiŋgalaaŋ muul ila Maaron mata itaghon tutuuŋ to Mose. Tovenen tigham pain kainaŋen tonenen, ve tizala pa Yerusalem. Leso tighuri inim Ŋgeu Tiina le, itaghon saveeŋ to timbooda ila Ŋgeu Tiina tutuuŋ toni. Isaav tovene ighaze: “Ndinatumim aidaba, aghur di tisob tinim Maaron le.”