Lukas 1:8-20

⁸Now a ben de a ten tak' Sakarias ben mus du en wroko leki domri gi Gado, fu di a grupu fu en ben mus du a wroko a pisten dati.

⁹Dan soleki fa a gwenti fu den domri ben de, den ben hari lot fu luku suma ben mus go na ini a Santa Presi fu Masra fu go bron switismeri. Di den hari a lot, a sori tak' na Sakarias ben mus go.

¹⁰A yuru di a switismeri ben e bron, ala den sma ben de na prasi e begi.

¹¹Dan wan engel fu Masra sori ensrefi na Sakarias. A engel ben tnapu na a let'sei fu a altari pe a switismeri ben e bron.

¹²Di Sakarias si a engel, a skreki èn a kon frede.

¹³Ma a engel taigi en taki: “Sakarias, no frede. Gado yere yu begi. Yu frow Elisabet o kisi wan manpikin èn yu mus kari en Yohanes.

¹⁴Yu o breiti èn prisiri nanga en, èn furu sma o prisiri tak' a kon gebore.

¹⁵Bika a o de wan prenspari man fu Masra. A no mus dringi win noso sopi. Na ini en mamabere srefi a o furu nanga a Santa Yeye.

¹⁶A o meki furu sma fu Israel drai kon baka na Masra den Gado.

¹⁷A o waka na Masra fesi tapu a srefi fasi èn nanga a srefi krakti fu Elia. A o meki tak' pratifasi no de moro na mindri pikin nanga den bigisma fu den. A o meki sma di tranga yesi, bigin libi leki den sma di bun ini Gado ai. Na so a o meki a folku klari gi Masra.”

¹⁸Dan Sakarias aksi a engel taki: “Fa mi o sabi tak' a sani disi o psa? Bika mi owru kba, èn mi frow de tapu yari.”

¹⁹Dan a engel piki en taki: “Mi na Gabriyel, a wan di e tnapu krosbei fu Gado. Na En seni mi kon na yu fu ferteri yu a bun nyunsu disi.

²⁰We luku, den sani san mi taigi yu, o psa na a ten di Gado poti. Ma fu di yu no bribi san mi taigi yu, yu o babaw. Yu no o man taki te leki a dei tak' den sani disi psa.”