Lukas 1:61-72

⁶¹Te ngaa ra bꞌala ne, “Nga tao ka pili ngara Yohanis? Nèti aꞌari miu, ca dhèu sa dhu ngara dhae, sèmi mèka èèna!”

⁶²Ka ra senen ho karèi Sakaria, sèna ka neo pangare ana ne ngara na ngaa.

⁶³Hèia Sakaria senen ho manèngi lei. Ra hia ne lei, ka na suri peka na, “Ngara na Yohanis!” Ka dhèu aaꞌi-aaꞌi malaa titu kèna.

⁶⁴Cagꞌagꞌa laa, heꞌo na dhu sakaa mèno èèna, mako dènge ka. Ka na koa-kio kolongara Ama Lamatua.

⁶⁵Hèia dhèu aaꞌi-aaꞌi dhu pea padètu ètu sèra sa, madhaꞌu dènge malaa. Ka lii neꞌe mulai ra palolo nèti hèbꞌa sa hèbꞌa, toke dhèu-dhèu ètu ledhe-ledhe ètu propensi Yudea reꞌa aaꞌi kahèi.

⁶⁶Dhèu-dhèu dhu tadèngi lii lolo èèna, ra pangee, peka na, “Tatu koasa nèti Lamatua bera-bera dènge ana ne. Bèli-camèdꞌa, ladhe na kapai mai, na jꞌajꞌi dhèu sèmi mia, oo?”

⁶⁷Èle ka, Roh Lamatua dhu Mola-Mèci maso asa Sakaria. Ka na padhai lii, peka na,

⁶⁸“Koa-kio Ama Lamatua dhèu Israꞌel! Te Na mai le ho sui nare dhèu unu Na, sèna ka rèngu baku jꞌajꞌi sèmi ènu sa.

⁶⁹Lamatua dedꞌe le ca Dhèu dhu koasa Na kapai titu kèna, ho hia èdhi mamuri. Nèngu ne, ana-èpu dhèu aae Daud.

⁷⁰Lamatua moa mema, karèi nèti uru ka, re dhèu dhu majꞌèni rèti lii padhai Na.

⁷¹Limuri ne Na neo patabuli èdhi nèti musu-musu èdhi, aa nèti dhèu dhu dꞌara pèdꞌa dènge èdhi.

⁷²Na padꞌelo dꞌara hua iia Na mi bèi-baki èdhi, lula Na sanèdꞌe taruu lii pajaji Na mi rèngu, dhu Na paꞌèki dènge baki Abraham.