Lucas 1:61-72

⁶¹Mbia que ñee esi je ra. —¿Mbaerã nda “Juan” ere nderiirĩ je re? Juan mo eã nderesenda mo aa resẽ, ɨ rei que mbia esi je ra.

⁶²Mbia que o mbaaba aba Zacarías je ra. —¿Mañɨ nda nderiirĩ je re? ɨ ee.

⁶³Zacarías que ñomee mbia je ra. Nyebe mbia embesa sacuã mee nguiã ee. —Juan, ɨ chõ seriirĩ je, ɨ que Zacarías embesa ra. Mbia que nyuruɨra ja u mae erese ra.

⁶⁴Aque ruɨbe que Zacarías ñee aquiatu cote ra. Ñee turã tuchɨ que equia Dios rɨɨ̃ cote ra.

⁶⁵Zacarías cheẽ andure que mbia nyuruɨra jate ndua ndua hue jenda ra. Nyebe mbia ñɨmbiirandu ja nguiã sɨta ibate bate jenda. Judea, ɨ que hue ibi je ra.

⁶⁶Ae jirandu quia erese, ũquɨ̃ ngue ndua tuchɨ quia erese ra. —Mañɨ nda Zacarías riirĩ nguia reae. Nandemae nguia erese no, ɨ que mbia quia ndua ndua ra. Dios que siqui tuchɨ Zacarías ndiirĩ ndese ra.

⁶⁷Espíritu Turã ngue siqui tuchɨ Zacarías rese ra. Nyebe Zacarías Dios cheẽ nenei nguiã.

⁶⁸Sã mbia ñee turã Dios rɨɨ̃ judíos rerecua rɨɨ̃. Uturã ngue eteacuquia nande je ra. Nanderirõ ngue mbae ɨcuã sɨ ra.

⁶⁹Nanderirõ sacuã nandeɨcuã sɨ que Dios mondo nande je ra. David riirĩ nducucha que nanderirõ sacuã nda.

⁷⁰Sã Dios ñee cose no. “Mbia rirõ sacuã nda ambu íbii”, ɨ cose no. Ucheẽ nenei neneisa que embuchecua mbia je cote ra.

⁷¹“Jẽucuãyãsa sɨ ra jendirõsa jendeaquiatu beɨ”, ɨ que Dios nande je ra.

⁷²Dios turãte que eriqui nandei ñiinda je ra. Abraham je abe que eturãte riqui ra. Ae Dios ñee Abraham je nyii nae, echeẽ ngue ɨo cote ra.