Lukaj 20:13-44

¹³Monjap en mat en wain o ap majani: Da me i en wiada? I pan kadarala nai ol kompok, ele re pan majak, ni ar pan kilan i.

¹⁴A jaumat akan lao kilaner i, rap lamelame nan pun ar indada: Iei i, me pan ale jojo, kitail pan kamela, pwen id aneki a jojo.

¹⁵Irail lao kajapoka jan i nan matuel o, ap kamela i. Da me monjap en mat en wain pan wiai on irail?

¹⁶A pan kodo kamela jaumat pukat, ap liki on akai a mat en wain. Irail lao roner mepukat, rap indada: O mepukat jota pan wiaui!

¹⁷A kotin jaupei won irail ap kotin majani: Iaduen wewe en intin wet: Takai o, me jauje kajapokela, id wiala takai en pukakaim?

¹⁸Meamen, me pupedi pon takai wet pan ola. A me a pupedi on poa, a pan kapitaka pajan i.

¹⁹I dokan o jaunkawewe o jamero lapalap akan raparapaki en jaikidi i. A re majak aramaj akan, pwe re muilikiada, me a karajeraj kin irail.

²⁰Irail ari majamajan i o kadarala liparok kai, me pan wia kin pein irail aramaj pun, pwe ren jaikikidi i a majan akan ap panalan jaunkapun o manaman en kopina.

²¹Irail ari kalelapok re a potoan on: Jaunpadak, kit potoan aja, me ar majan o padak kan me pun, o re jota kotin kupuroki janjal en aramaj. Pwe re kin kotin kaukaweweda melel duen al en Kot.

²²Me pun kit en nopwei on nanmarki, de jo?

²³A i kotin mani ar widin, ap majani on ir: Da me komail kajonejon kin ia?

²⁴Kajale don ia denar eu! Mom en ij o intin wet? Re japen potoan on: En nanmarki.

²⁵A i kotin majani on irail: Ari komail ki on nanmarki, me nain nanmarki, o on Kot, me japwilim en Kot!

²⁶Irail ari jota kak jaikikidi i a majan akan mon pokon o. Irail puriamuiki me a kotin japen, o nenenlata.

²⁷Jadujär akai, me kin inda, me dene melar akan jolar pan maureda, ap kai don i kalelapok re a,

²⁸Potoan on: Jaunpadak, Mojej intinie don kit, ma ri ol en amen pan mela, me a paud li dapwan men, ri a ol ap pan paudekida i, pwen kaipwi on ri a ol na jeri kai.

²⁹Ari, pwin pirien, ol ijimen mia, men maj paudeki li amen, ap mela, a jota na jeri ko.

³⁰A kariamen paude kida li o ap mela a jota na jeri ko.

³¹A kajilimen paude kida i, iduen ir ijimen karoj, re mela, ap jota nairail jeri ko.

³²A ikmuri li o pil mela.

³³Ari, ni en me melar akan ar iajada, a pan en ij a paud? Pwe ir ijimen karoj paude kida i.

³⁴Iejuj kotin majani on irail: Jeri en jappa et kin papaud o kapapaud.

³⁵A me war on ale eu jap o konodi maureda jan ren me melar akan, re jota kin papaud de kapapaud.

³⁶Pwe re pil jolar kak mela. Pwe re paroki on tounlan kan, o re jeri en Kot akan, pwe re jeri en kamaur.

³⁷A duen en me melar akan ar pan maureda, Mojej pil kadededa, ni a udial tuka o, ni a kaadaneki Kaun o: Kot en Apraam, o Kot en Ijaak, o Kot en Iakop.

³⁸Pwe Kot kaidin Kot en me melar akan, a en me maur akan, pwe karoj memaur on i.

³⁹A Jaunkawewe kai japen indada: Jaunpadak, ar majan me pun.

⁴⁰Irail ap jolar kak peidok re a okotme,

⁴¹I ari kotin majani on irail: Iaduen ar indinda, me Krijtuj nain Dawid?

⁴²A pein Dawid katitiki nan puk en Pjalm: Kaun o kotin majani on ai Kaun: Mondi on ni pali maun i.

⁴³Lao I pan wia kida om imwintiti utepan nä om.

⁴⁴Dawid ari wia kin i a Kaun, a iaduen a pan kak na ol?