Luuka 20:13-44

¹³E oon wakkati, jom ngesa oo wii: «Hono ngaɗan-mi? Ooho, mi nelan ɓiyam gorko korsuɗo oo, yaama ɓe njaagoo mo!»

¹⁴Kaa nde remooɓe ɓee njiinoo ɓiɗɗo oo ndee, mbiyondiri hakkunde mum'en: «Oo woni donoowo mo, mbaren mo, keddoro-ɗen ngesa ngaa!»

¹⁵Ɓe mbedii mo to caggal ngesa too, ɓe mbari mo. Jooni nee, hono jom ngesa oo waddata e maɓɓe?

¹⁶O waran, o halka remooɓe ɓee, o hasira ngesa ngaa woɓɓe. Nde yimɓe ɓee nannoo ɗum ndee, mbii: —Pati hono majjum laato!

¹⁷Iisaa ƴeewi ɓe, wii: —Ndennoo, koɗum woni maanaa ko winndii koo: «Haayre nde mahooɓe ɓee tippitii ndee, kaɲum laatii haayre ɓurnde fuu teentilaade e maadi ndii»?

¹⁸Neɗɗo fuu caamɗo e nden haayre, helan. Neɗɗo fuu mo nde saami e mum, noƴoto.

¹⁹Dunkee'en Sariya e hooreeɓe yottinooɓe sadaka paamii banndol ngol e mum'en fewti. Ɓe njiɗiino nanngude mo ɗon e ɗon, kaa ɓe kulii yimɓe.

²⁰Dunkee'en Sariya e hooreeɓe yottinooɓe sadaka ngattani Iisaa hakkille, neli horooɓe nanndinkiniiɓe e moƴƴuɓe, yalla ana keɓa e haala makko laawol, ngaɗa mo e juuɗe goforneer laamiiɗo leydi ndii oo, sara ɗum.

²¹Ɓeen lamndii mo: —Moobbo, miɗen anndi ko kaalataa koo e ko mbaajoto-ɗaa koo yo goonga, miɗen anndi a ɓurdintaa yimɓe, aɗa jannginira laawol Laamɗo ngol goonga.

²²Minen nee, ana dagoo min ndokka kaananke Roma mawɗo oo lampo naa dagaaki?

²³Nde wonnoo o faamii hiila maɓɓe kaa, o wii ɓe:

²⁴—Kollee kam mbuuɗu cardi! Natal homo e innde homo woni ɗoo? Ɓe mbii: —Kaananke Roma.

²⁵Caggal ɗum, o wii ɓe: —Ndennoo ndokkee kaananke Roma oo ko jey, ndokkee Laamɗo duu ko jey.

²⁶Ɓe ndonki heɓude laawol e ko mo haalata yeeso yimɓe koo, jaabu makko oo haaynii ɓe, ɓe ndeƴƴinii.

²⁷Yoga e waalde Saduki'en ngari e Iisaa. Kamɓe ngoni fennuɓe immital. Ɓe lamndii mo, ɓe mbii:

²⁸—Moobbo, Muusaa yamirii en, so neɗɗo ɓamii debbo, maayii, heɓaali ɓiɗɗo, miɲum naa mawnum ɓamta debbo oo, yalla ana heɓana maayɗo oo ɓeyngu.

²⁹Waɗiino e ɓettaade rimdaaɓe njeɗɗon. Arano oo ɓami debbo, maayi, heɓaali ɓiɗɗo.

³⁰Ɗiɗaɓo oo ɓamti debbo oo, maayi,

³¹tataɓo oo jokki hen. Hono nii njeɗɗon ɓee fuu ɓamiri mo, ɗalaali ɓiɗɗo.

³²Caggal maɓɓe ɓe fuu, debbo oo duu maayi.

³³Ndennoo, ɲannde immital, homo e maɓɓe debbo oo laatotoo jom suudu mum? Sabi ɓe njeɗɗon fuu ɓe ɓamiino mo.

³⁴Iisaa jaabii ɓe, wii: —Yimɓe oo jamaanu ana ɓama, ana ɓamee.

³⁵Kaa haandinaaɓe e nguurndam janngo, kaɲum e immitagol ɓee, ɓamataa, ɓamataake,

³⁶sabi ɓe mbaawaa maayde kasen. Ɓe laatoto no malaa'ika'en nii, ɓe ɓiɓɓe Laamɗo, sabi ɓe immitike e maayde.

³⁷Kaa ko maayɓe immitoto koo, fay Muusaa sappike ɗum e ley haala wuutuure. Sabi ton o noddiri Joomiraaɗo oo «Laamɗo Ibarahiima e Laamɗo Isiyaaka e Laamɗo Yaakuuba.»

³⁸Laamɗo yo Laamɗo wuurɓe, wanaa Laamɗo maayɓe. Sabi banngal makko yimɓe fuu yo wuurɓe!

³⁹Yoga e dunkee'en Sariya mbii: —Moobbo, a haalii goonga.

⁴⁰Caggal ɗum, ɓe cuusaali lamndaade mo fay huunde.

⁴¹Iisaa wii ɓe: —Hono ɓe mbaawiri wiide Almasiihu yo taanii Daawuuda?

⁴²Daawuuda e hoore mum wii e ley dewtere mum Jabuura: «Joomiraaɗo wii Joomam: Jooɗa ɲaamo am,

⁴³faa mi waɗa njaɓɓaa wayɓe maa.»

⁴⁴Daawuuda «Joomam» noddirta mo, ndennoo, hono mo laatortoo taanum tan?