Luka 20:13-44

¹³Vikaheza yudya zumbe mta inkonde ye mizabibu niyo agamba, ‘Nitende zeze? Nani msigile mwanangu hungisa, wadaha wakamwiva.’

¹⁴Wadya walimizi weze wamuwone yudya mwana niyo wagambilana, ‘Yuno nuyo mlisi, haluse chimkome chani uno ulisi utende wetu.’ ”

¹⁵Niyo wamlavya mweidya inkonde ye mizabibu, wamkoma. Yesu niyo auza, “Yuno zumbe mta inkonde nawatende mbwani wadya walimizi?”

¹⁶“Neze awakome wadya walimizi na kuwenka walimizi watuhu idya inkonde ye mizabibu.” Wantu weze weve ziya izimbuli, niyo wamhiga wagamba “Havikudahika!”

¹⁷Mna Yesu niyo awasinya, awagamba, “Mawandiko yano Yakukile manakwe ni mbwani? ‘Yuwe dilemelwe ni wazesi, haluse ditenda yuwe kulu dya msingi.’

¹⁸“Mntu yoyose anagwa mnanga mwe diya diyuwe nakantike vihandehande, naho dinamgwela mntu yoyose nadimtiginte enga unga.”

¹⁹Wahinyi wa Sigilizi na walavyantambiko wakulu na wamanya kugamba mligano uwo wawalanga wowo, ivyo na wakaunga wamgwile ahadya, mna nawakawogoha wantu.

²⁰Ivyo niyo wakonga kumhanga Yesu, niyo wasigila wazuza waketenda ni wantu wedi chani wamgwile mo ulosi wakwe, na mwe sila iyo wadahe kumlavya mwe mikono ye vilongozi we isi.

²¹Awo wazuza niyo wamgamba, “Mhinyi, chimanya kugamba walonga na kuhinya mbuli za chindedi, chimanya weye hukupagula, weye wahinya ichindedi chenye che sila ya Chohile.

²²Elo chigambile hegu ni vyedi hegu sivyo vyedi mwe sigilizi yetu kuliha kodi kwa mkulu ywa Chilumi!”

²³Yesu niyo amanya viya wamtegile, niyo awagamba,

²⁴“Nilagisani ivyo hela iyo ili, nauza iyo isula ne chapa ni yayuhi?” Niyo wamhitula, “Niya Mkulu ywa Chilumi”

²⁵Yesu niyo awagamba, “Elo mwinkeni mkulu ywa Chilumi ivyakwe na Chohile ivyakwe.”

²⁶Elo wadya wantu niyo wadunduga kumgwiza mwe mbuli yoyose, niyo wehelwa hawahitule, niyo wanyamala dwii.

²⁷Mna Masadukayo wadya wakugamba wabanike hawakudaha kuyuka, niyo wamhitula Yesu wagamba,

²⁸“Mhinyi, Musa kachiwandikila vino hegu mntu anabanika kuno kasa mkaziwe heleke wana, vyongigwa mlukolo ywakwe amsole yudya mvyele, chani amwelekele wana yudya mlukolo abanike.

²⁹Mna na kuna walukolo mfungate. Ywankongo asolaga mvyele niyo abanika heleke mwana,

³⁰mlukolo ywa kaidi niyo ampala yudya mvyele naye niyo abanika,

³¹ywakatatu seivyo vilaile kwa wose mfungate, wose na wabanika heweleke wana.

³²Weze wabanike wose yudya mvyele naye niyo abanika.

³³Nauza mwe dizuwa idyo dyo kuuyuka, mvyele uyo natende mkaza yuhi? Kwaviya na kasolwa ni wose mfungate.”

³⁴Yesu niyo awagamba, “Wantu we mihilimo ino wasola na kusolwa,

³⁵mna wadya nawafanyanywe kugamba wawagila kuyuswa na kwikala mwe mihilimo ikwiza hawasole hegu kusolwa.

³⁶Naho hawabanike vituhu, kwa viya na watende saviya wandima wa kwembingu, na watende wana Chohile. Kwa viya wauyuka.

³⁷Mna mbuli yo kuyuka ni chindedi, hata Musa ailongaga mwa Mawandiko yakwe Yakukile, hadya awandikaga mbuli ya saka dikwaka moto niyo amtaja Zumbe saviya Chohile ywa Bulahimu na Isaka na Yakobo.

³⁸Uyo suyo Chohile ywa wabanike, mna ni Chohile ywa wajima, kwaviya kwa uyo woseni wekala.”

³⁹Wahinyi Sigilizi watuhu wagamba, “Mhinyi, kuhitula vyedi vidala!”

⁴⁰Niyo hawamuzize vituhu.

⁴¹Yesu niyo awauza, “Kwa mbwani wantu wagamba Kulisito ni mwana ywa Daudi?

⁴²Kwa viya Daudi mwenye nakalonga mwe chitabu chakwe cha zabuli, ‘Zumbe na kamgamba zumbe ywangu. Ikala kwe ntendele ya kulume kwangu.

⁴³Kubula aho naniwaike wadya wakukwihiwa enga fumbi dya kwikiya viga vyako.’

⁴⁴Elo ni vivihi Daudi akumwitanga Yesu ‘Zumbe’, nivivihi naho, Kulisito adaha kutenda mwelekwa ywa Daudi?”