Luk 20:13-44

¹³“Ano tama bilin anya, ‘Ki buku sah bah? I buku none jo kasuni naduk amwenen ala jo aseken iy labai kede-eh, sebwe oro kameh anuhun boho naduk.’

¹⁴“Arile, oro salibah ta bilin atou iy edek eme, oro asehek nyala oro anya, ‘Ei, nadun eme, to kadai iy, ma to kakuhi iri lakou tan mari.’

¹⁵Eme oro kuhi iy eme len ta bilin, ma oro adai iy imek. “Ya ado abudon i buku sah? Tama bilin kameh amekes saba lakou handru kili toro salibah nane abo gok an bolo bilin nane?

¹⁶Iy kameh idi oro lau doh amak, ma iy kameh atehei bilin ili mine iri lau rayah ja kabo gok ta aliy.” Ya iri lau anuhun sahou sokek doh aleu labai, eme iri anya, “Sasahan ai, ma ndri-iy ai!”

¹⁷Arile, Jises anyolom boto-on i toro ma i lelen, “Sahou mene ndratorowenei ndra-au, saba moson ta aliy handru? Sahou i buku doh, ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.’

¹⁸Are lau oro taku a bada bek doh kameh, ndruwi oro kameh ibok i le bwisik, arile are lau oro i buku none bek doh, taku i la-u oro, idah kameh ati-i oro abwesek.”

¹⁹Eme iri lau ta leheya kandriyen tiri Juwis hawe iri tinan tiri pris nane anya ja Jises asehek sahou sokek doh i bada iri. Eme ma iri anya katakaleh madasan ta ateu iy na le liliy. Arile, oro winiyan bwe, tasah oro anoh iri lau.

²⁰Eme oro atehei mada oro udu ta Jises, ma oro suni iri lalou rayah atehei mada iri udu ta Jises. Oro amekes oro i buku none lau ta tandra-un sahou handru, ala, anya kasan Jises na sahou. Ya eme oro anya katehei iy ki mine iri lau ta atondrok hawe kili baha boto-on ta tondrok tiri Rom.

²¹Eme ya oro lalou lelen Jises anya, “Ndramak ta leheya, aso badeh, tanan sasah ou leheya kede-eh, ndra handru le ai, ma ou badeh, banoh are ndramak bwe. Ou badeh are le alih turu. Tasah, ou badeh, leheya san ta Kindrei handru i tiri lau.

²²Ou abudon i buku sah? Mwasin ta taha kadeu takis ki ta Sisa, deh ndri-iy?”

²³Arile, Jises anyolom ili mada oro ta wasai ma tiye toro anya,

²⁴“Ado kaleheya keme tek ari luk bororoh. Malawi ndramak ma nyaran kede-eh are lau handru?”

²⁵Eme oro anya, “Ta Sisa.” Ya eme Jises tiye i toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.”

²⁶Eme oro anya kawasai iy kasehek sahou ndra-in kudu mada iri lau, ma oro kateu iy. Arile, oro winiyan batawi iy bwe. Eme ya boho oro asak ta sahou tan i toro, ma oro andru-uk.

²⁷Eme oro Sadusi rayah ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe.

²⁸Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya, ‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’

²⁹Ya, len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe.

³⁰Ano iy bwaneh sudi nyawe nadu tinen i tan, eme iy imek, ma nadun bwe le.

³¹Ano ja silih sudi nyawe nadu tinen uru ja, eme iy imek ale, nadun bwe le. Eme amekes i buku doh, ili ano ta kalai. Oro mari badeh, amak ari nadu oro bwe.

³²Ano udu hamon badeh, badih imek ale.

³³Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.”

³⁴Eme Jises tiye i toro anya, “Lau mwan hawe badih are munyak dah, asoh iri a tasou.

³⁵Arile, iri mwan hawe iri badih mwasin ta mada Kindrei kameh, na len eme kameh iri amak ame awas ja, iri winiyan bala tasou ja bwe.

³⁶Iri kameh asahan buku iri angelo, ya iri badeh, nadu Kindrei labai, tasah iri amak ame awas ja.

³⁷Handru labai. Iri lau ndramak bwena, hamon kameh iri amak ja. Moses ale leheya i buku aliy le. Idoh asehek nyala len mene Moses atou jih anya udu ta kei. Tasah, Moses mene tiye nyala Laban i buku doh: ‘Ou badeh, Kindrei ta Abraham, ta Aisik, ma ta Jekop.’

³⁸Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Handru labai. Iri lau mari mene ndramak ndrasu-u, ma hawe iri lau mari ado loken kahis le, iri mara-ei a buku awas kahis le, tasah Kindrei atondrok iri.”

³⁹Eme oro lau rayah ta leheya kandriyen tiri Juwis anya, “Ndramak ta leheya, ou tiye sahou badeh, amwenen handru.”

⁴⁰Ya eme ma iri anoh, ma iri bandremenya iy ja bwe.

⁴¹Ano Jises ndremenya oro anya, “I buku sah handru iri mwan ma badih anya ja, Krais badeh, nadu Debit?

⁴²Tasah, udu bolo buk Wari ta Debit tiye i buku doh, ‘Laban Kindrei tiye i ta Laban tek i buku doh: “Ou ame manyah ado loboho minek salin,

⁴³winiya jo le, baratehei iri lau ta amekes budon ndra-in ewek tam, barabwesek barado bahandra katim.”’

⁴⁴Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”