Lukaj 19:15-32

¹⁵Kadekadeo a lao puredo, murin a aleer wei o, ap ilakelan ladu kan, me a ki on na moni, pwen aja duen en amen amen ar kalaudelar na moni.

¹⁶Men maj ap pwarado indada: Main, omui paun kareda paun eijok.

¹⁷A indan i: Meid pai ladu mau koe, aki om apapwali mau me tikitik, koe pan id kaunda kanim eijok.

¹⁸O kariamen ap pwarado indada: Main, omui paun me kareda paun limau.

¹⁹A pil indan i: Koe pan kaunda kanim limau.

²⁰O pil amen pwarado indada: Main, mani, ietet japwilim omui paun, me i nekidala nan lim en pudo.

²¹Pwe i majak komui, pwe ol petik amen komui. Komui kin aleda, me kaidin komui kidier, o dolun jan, me kaidin komui padukedier.

²²A indan i: Jan nan au om i pan kadeik kin uk ada ladu jued koe. Koe ajaer, me ol petik amen nai, me kin ale, me kaidin nai kidier o dolun jan, me kaidin nai padukidier.

²³Menda koe jota wala nai moni wajan kanaitik, o i lao puredo, i pan ale me udan ai ianaki moni naitik.

²⁴A indai on irail me u impa: Ale jan i paun o, ki on ren me a paun eijok!

²⁵Irail indai on i: Main, nan a nainekier paun eijok.

²⁶Pwe I indai on komail, meamen, me a mia, ekij pan ko on, a me jota a mia, nan a pwitikatik pil pan katia jan.

²⁷A ir, ai imwintiti, me kan, i en kakaun ir, wa ir do, o kame ir ala mo i!

²⁸A lao kotin kaimwijokala a majan pukat, ap kotiwei kotidala Ierujalem.

²⁹Kadekadeo a lao koti don Petpake o Petanien impan dol me ad a Oliwe, ap kotin poronela japwilim a tounpadak riamen,

³⁰Majani: Koma ko on nan kanim monen, koma lao pedelon, koma pan diarada ejel pul amen jalidi, me aramaj amen jaik mondi poa. Lapwada i, ap karedo!

³¹A ma meamen pan idok re oma: Da me koma lapwa kida i? Koma ap pan inda: Kaun o men dake.

³²A ira me pakadara wei, ap kola o diarada, duen a kotin majani on ira.