Luka 11:21-48

²¹“Ngan tool turana bulbulini atu be ipare dawa ki dook inbe ikodokala rumu ki nga, ngan ole so ki iken dook mata.

²²Bong kumata be tool san yo gurana ki mai mata le ke be illoso ene i, in iman le irauu nga, ngan ole ikap dawa le so ki ke patokongo tina yo ikodokala rumu ki ye nga, inbe lo ikap so ke tool tani le imot a imalimi pang di diene.

²³“Sei tool yo itoo au tiap i, in dawa ben koi kiau. Inbe tool yo ilonau a be aye amgaua di tooltool pang Maro tiap i, in dawa ben tool yo be inganga di tooltool a tikoo ye Maro i.”

²⁴Motong la Yesu iwete mulu nen, “Kumata so sadi be ipas ye tool atu lono nga, ngan ole la ipa ye ni sorrakene a matan sarsarai ye ni dook mata yo be iyepe ye i. Bong kumata be matan sarai le ikamata ni sa dook be iyepe ye tiap nga, ngan ole iyei ne, ‘Au i nga ole amulukala rumu kiau yo muku ngan ayege i.’

²⁵Ngan kene yo imulu a ila pombe ye in nga, ngan ikamata rumu tani in tisoraii le igalanga, inbe so yo iken rumu lono nga iken dook mata ye nene.

²⁶Motong la so sadi tani in imulu la iwete pang di diene limi be ru yo tillosi ye yeingi dada dook tiap nga, ngan be tiyei ene a tiye tila pang ye rumu tani be la tiyepe ye. Awete pang nen, muku ngan tool tani in yepongo ki ben dook tiap mata tiap, bong yo nookoot nga yepongo ki dook tiap le dook tiap ki taunu.”

²⁷Ye kene tani yo Yesu iwetewete betanga tina ngan pang di nga, ngan di tooltool malala mai man tigaua lapau, le nga garup atu yo iyepe kataunu ye di i, in iyiti koonoo inbe iyei ne, “Tinam yo ipasui ong inbe iyei borrenge yong le ong mai i, in ole Maro iyei urata dook mata panga le lon ponana.”

²⁸Bong ngan Yesu iraua betanga ki nen, “Di tooltool yo titar talngadi dook a tilongo betanga ke Maro inbe titoo nga, ngan ole Maro iyei urata dook mata pang di le lodi ponana.”

²⁹Di tooltool kapala mulu timanen man pompombe ye ni tani yo Yesu iyepe ye i. Motong la Yesu iwete pang di nen, “Di tooltool yo nookoot tiyepe nga, ngan di tooltool ke yeingi dada dook tiap. Le kanakana nga, ngan titorau be ayeie mos ke Maro sa a tikamata. Bong mos sa be ayeii a tikamata tiap. Ole tikamata mos ataleu yo pombe ye Maro koonoo yo Yona, in leu.

³⁰Muku ngan di tooltool ke Ninibe tikamata so yo pombe pang ye Yona i, le iyei tarkilanga pang di ben ya in Maro iwanga pang di la ila nga. Ngan nen le so yo be pombe pang ye Tool Moolmool ke Maro ngan ole iyei tarkilanga pang ang di tooltool yo nookoot kayepe ngan ben ya in Maro iwanga pang la isi nga.

³¹Ngan ye lal yo Maro itaru be ikarata betanga kidi tooltool ye in nga, ngan garup ene mai atu yo iyepe ye ni yo karaka ipa ye i, in ole ikodo dama ke Maro, inbe ipapos di tooltool yo ke nookoot nga, ye dada dook tiap kidi yo tiyei nga. Au i awete nen, yesoo garup tani, in iyepe ke tana damono, bong ipa ye manga mooloo a ise pang Yerusalem be se ilongo betanga dook mata ke Solomon yo ipatomonai di tooltool ye nga. Bong Tool atu yo nookoot kaye kayepe i, in illoso Solomon.

³²Inbe ye lal tani yo Maro itaru be ikarata betanga kidi tooltool ye in nga, ngan ole di tooltool ke Ninibe tikodo dama ke Maro, inbe tipapos di tooltool yo ke nookoot nga, ye dada dook tiap kidi yo tiyei nga. Awete nen nga, yesoo di Ninibe tilongo betanga ke Yona tina yo iwete nga, ngan le tiportak lodi mulu. Bong Tool atu yo nookoot kaye kayepe i, in illoso Yona.”

³³Motong la Yesu iwete pang di mulu nen, “Tool sa ke be ilanga sul ki bong, lo ngan be itarkoo, too ipatudu ye bor, ngan tiap. Bong ole ipawoti lo ete, a be nen ngan di tooltool be tise rumu lono ki ngan tikamata ni ye nunngana.

³⁴Ngan matamim ngan dawa ben sul kiang. Le kumata be matamim igalanga dook mata nga, ngan ole sul nunngana ilangaraia tinimim mai i le imot inbe kakamata ni. Bong kumata be matamim igalanga tiap nga, ngan ole todo iduku tinimim mai i le imot inbe kakamata ni tiap.

³⁵Ngan nanga, kin kakamatang dook leu, ole nen ngan kawete be sul nunngana iken lomim, bong tiap, todo iduku le imot.

³⁶Bong kumata le be sul nunngana tani in ilangarai tinimim mai i le imot, le kasin pa iken todo lono tiap nga, ngan ole ilangarai ang dawa ben sul moolmool yo nunngana ilangarai ang i.”

³⁷Yesu iwete nen pang di a imot, motong la tool Paresi atu in ikiuu be la yaru tikan so rumu ki. Motong la ilo rumu ke Paresi tani in lono lo iwur mie pono potai pang ye kookoowoo ke kaningi so.

³⁸Le nga Paresi tani in ikamata Yesu le itakrai ye yo itoo momo kidi Yuda ke ngasingi baedi in tiap, inbe ikan so nga.

³⁹Motong la Tool Mai tani in iwete panga nen, “Ang Paresi nga, ngan be kangas ruku le omai kiang ke kaningi so nga, ngan ole kangas diki ki leu. Bong lomim rru ye lono yo giri le giri leu, ngan tiap. Ngan dada kiang yo kayei nga, ngan gaongo leu. Ngan nen le kangas baemim, bong lomim nga ipon ye dada dook tiap yo ke noonoo le pasakalanga so nga.

⁴⁰Ang nga ben di tooltool kapakapa! Ngan tool yo be ikarata so atu i, in ole ikarata diki ki le ipa ye lono lapau, too?

⁴¹Bong awete pang nen, so yo iken ruku lono nga, ngan kayoon a kakap pang di tooltool yo ballingadi tiap nga, a nen ngan kalon di ye. Ngan kumata le be kayei nen nga, ngan ole Maro ikamata ngan lono dook mata pang ye dada kiang yo kayeii i.

⁴²“Atoo, ang di Paresi nga, kin kakamatang dook leu! Ang nga kapoto so mitiap kiang yo ben laki le lombo le bede ke kumu kiang nga, le iken ye budanga sangaul, motong la kakaua budanga atu pang Maro. Bong nga yelei be kayei dada dook mata pang di diemim tiap, inbe lomim pang Maro mai san tiap lapau nga? Ngan kumata be kayei dada yo dook mata nen nga, le ipa ye urata kiang tina yo kayei kanakana nga, ngan matin nga le dook mata san.

⁴³“Atoo, ang di Paresi nga, kin kakamatang dook leu! Ang ngan be kalo ye rumu kidi Yuda ke gaongo in lono nga, ngan lomim be le lo kawur dama ye kookoowoo kidi tooltool yo edi maimai nga. Inbe lomim be la kapa ye ni ke yawaringi so, a nen ngan di tooltool be tikamatang nga, ngan tiwete lo ponana kidi pang.

⁴⁴“Atoo, kin kakamatang dook leu! Ang ngan dawa ben gomo ke matenge yo iken tana lono le di tooltool lodi galanga ye tiap a tipa pono i.”

⁴⁵Motong tool kuto mai atu ke ger ke Maro i, in iraua betanga ke Yesu nen, “Ona tiap! Pannoongoo, betanga kiong tina kuwete nga, ngan betanga medana leu le kugarungam ye lapau sa.”

⁴⁶Motong la Yesu iwete panga nen, “Atoo, ang di kuto maimai ke ger ke Maro nga, kin kakamatang dook leu! Ang ngan kapaloko so moonoo alunu san ilo di tooltool podi le tisak ye solanga ki. Bong ang tapmim nga yelei lomim be katara baemim buruburene atu la kalon di ye so moonoo tani yo tisola in tiap nga?

⁴⁷“Atoo, kin kakamatang dook leu! Ang ngan kakarata agoro ke matenge pang di Maro koonoo yo muku ngan di sasa kiang tiraumatamata di nga.

⁴⁸Ngan dada tina yo kayeii i, in ipaposang ben ang ngan lomim ponana yo di sasa kiang tiraumatamata di Maro koonoo a timmata nga, ngan la le lomim tut di a be kakarata agoro kidi matenge pang di nga.