Lukas 11:21-48

²¹“Iwe, are eman mwän mi pöchökül a mamasa püsin imwan fän an pisekin fiu, pisekin meinisin repwe tümwünöch.

²²Nge are eman mi pöchökül seni epwe fiu ngeni o akufu, epwe angei seni an kewe pisekin fiu meinisin a anomu an apilükülük won, epwe pwal ineti mine a soläni.

²³Iwe, are eman esap etiei, i eman chon ü ngeniei, nge are eman esap alisiei le ikioi, i eman chon kütifeseni.

²⁴“Are eman ngününgau a towu seni eman aramas, a saifetal won fanü mi pwasapwas o kütta eu leni pwe epwe asösö lon. Are esap küna eu leni, epwe apasa, ‘Üpwe liwinsefäliti imwei we üa towu seni.’

²⁵Iwe, lupwen epwe tori ewe imw, epwe küna pwe a limöch o kotöch.

²⁶Mürin epwe feila o panato pwal füman ngün mi ngau seni i. Iwe, repwe feito o nonom lon. Iwe, manauen ewe aramas epwe fokun ngau seni me mwan.”

²⁷Iwe, lupwen Jesus a apasa ekei kapas, eman fefin me lon ewe mwich a kötä o üreni, “Feiöchün ewe fefin mi nöünuk o oupwuk!”

²⁸Nge Jesus a pölüeni, “Ewer, nge ra feiöch chokewe mi rong kapasen Kot o aleasochis ngeni.”

²⁹Lupwen ekewe aramas ra mwichfengen ren Jesus, a sopwela le kapas ngeniir, “A ifa me ngauen ei täppin aramas ikenai. Ra tüngor eu asisil, nge esor asisil epwe toriir, pwe ewe chök asisil mi fis ngeni Sona.

³⁰Pun usun Sona a eu asisil ngeni ekewe aramasen Ninifa, iei usun Nöün Aramas epwe pwal eu asisil ngeni ei täppin aramas.

³¹Lon ewe ränin kapwüng ewe kiwinen Sepa epwe ütä o atipisi ei täppin aramas. Pun neminei a saito seni fanüan mi toau, pwe epwe rongorong än king Salomon kapasen tipachem. Iwe, üpwe ürenikemi, pwe eman mi lap seni Salomon a nom ikei.

³²Lon ewe ränin kapwüng ekewe chon Ninifa repwe ütä o atipisi ei täppin aramas, pun ra aier ren än Sona afalafal. Nge üpwe ürenikemi, pwe eman mi lap seni Sona a nom ikei.

³³“Iwe, esap wor eman a keni eu lamp, nge mürin a aopala ika anomu fän eu sepi. Nge epwe fen isetä ewe lamp won lenian, pwe aramas mi tolong lon ewe imw repwe küna ewe saram.

³⁴Mesom ra usun chök eu lamp fän iten inisum. Are mesom ra fat, unusen inisum a saram. Nge are mesom a fatangau, unusen inisum epwe rochopwak.

³⁵Iei mine kopwe tümwünüöchuk, pwe ewe saram mi nom lomw esap rochopwak.

³⁶Are unusen inisum a saram, nge esap wor eu kinikin a rochopwak, unusen inisum epwe saram usun chök eu lamp mi tinöch a asaramok.”

³⁷Iwe, lupwen Jesus a wes le kapas, eman Farisi a köri pwe epwe mongö ren. Iei mine Jesus a feila lon imwan o a mot ngeni mongö.

³⁸Iwe, ewe Farisi a weitifengeni lupwen a küna, pwe Jesus esap talü pöün mwen an epwe mongö.

³⁹Iei mine ewe Samol a kapas ngeni, “Ämi kana Farisi, oua limeti lükün ämi kewe kap me sepi, nge lon letipemi a uren mochenia me föföringau.

⁴⁰Ämi mi umwes! Ifa usun, Kot ewe mi föri lükün esap pwal föri lon?

⁴¹Nge oupwe fang ngeni ekewe mi wöüngau mine a nom lon ämi kewe kap me sepi, mürin mettoch meinisin repwe limöch me remi.

⁴²“Feiengauemi, ämi Farisi! Oua ngeni Kot leengolun ämi nofitin mongö usun chök mint me warung me sokopaten chön irä, nge oua tümwününgau ngeni pwüngüöch me ämi echeni Kot. Oupwe föri ekewe, nge oupwe pwal tümwünüöchü ekei.

⁴³Feiengauemi, ämi Farisi! Pun oua sani le mot won ekewe lenien mot än ekewe mi lap lon ekewe imwen felikis, pwal än ekewe aramas kapong ngenikemi fän suföl me lon ekewe lenien amömö.

⁴⁴Feiengauemi! Pun oua usun chök ekewe peias esap wor eman a küna, aramas ra fetal won, nge resap silei.”

⁴⁵Iwe, eman lein ekewe Sensen Allük a üreni Jesus, “Sense, lupwen ka kapas usun ekei mettoch, ka pwal aitengauakem.”

⁴⁶Jesus a pölüeni, “Feiengauemi, pwal ämi kewe Sensen Allük! Pun oua isetä mettoch mi chou won ekewe aramas, a fokun weires ar repwe mwärei, nge ämi ousap mwo nge pwisi ngeni efoch aütumi ekewe mettoch mi chou.

⁴⁷Feiengauemi! Ämi oua alinga peiasen ekewe soufos ämi kewe lewo ra niela.

⁴⁸Ren ei oua pwärätä pwe oua tipeeu ngeni mine ämi kewe lewo ra föri. Ir ra niela ekewe soufos, nge ämi oua alinga peiaser kewe.