Luka 11:21-48

²¹E hari ꞌahoḡa idaidaniꞌuma. Inara vazeḡaꞌe uti ḡauḡa ḡauḡa hina neḡa taufine, ani ḡauḡa niduꞌa manoḡa radiꞌuma.

²²Rehano inaraḡa ufeta boro vazeḡa ꞌahoganiꞌa aradu vaze ꞌadi utite raharahanine, ane bireꞌeteꞌe uti ḡauḡa niduꞌa meine hauḡiꞌuma. Ebu ane ne ḡauḡa zu niduꞌa meinadu ḡahuge ḡuzuhiꞌuma. Hari ꞌahi teige, eꞌe Satani inaraḡa vitinoga, eꞌanoꞌo hegoze buzeꞌohe.

²³Iniu e mene teite reine, ani eḡe agirehiꞌeteꞌe vazeḡa. Ebu iniu Badiꞌa mazao vaze nuꞌozeꞌohe radu eḡe teite mene gaue tiburuꞌeteꞌe reine, ani Badiꞌa mazaoꞌonoꞌo vaze rovozeꞌeteꞌe vazeḡa.”

²⁴Ebu Iesuꞌa zinaꞌa, “Vine sauꞌa ani vaze ꞌahoga mazaꞌonoꞌo buauꞌetene, ani haba bohaꞌano ragaveꞌohe ebu ahiꞌa ohonoga radu haba ꞌahoga vaḡeꞌohe. Rehano mene horoneꞌetene, ani ꞌahige raꞌohe, raenaꞌa, 'E eḡeꞌa vaḡinateꞌe vazeḡa vaḡe bare onamihi.'

²⁵Ani baradu vaze eꞌe horonetene, aniꞌe neḡa deheḡa hune zu idaidane touga heuḡa.

²⁶Ebu vine sauꞌa eꞌeꞌa onamadu hena vine sauꞌa niduꞌa fuꞌo ꞌaheu fare, aꞌe ufeta hune sauꞌa, zamazeꞌohe, ebu vaze eꞌe mazao diuḡe radiuꞌohe. Ebu vaze eꞌe ani ufeta hune sautuꞌohe, ibite mene heuḡa.”

²⁷Iesuꞌa goereꞌeteꞌe zamaḡano roḡae ꞌahoḡaniꞌa vaze ḡuḡuvaḡa boꞌaḡanonoꞌo ḡoere iḡuniro, raenaꞌa, “Ḡae fureꞌiroteꞌe zu ḡubue borofiroteꞌe viꞌuḡaꞌe Badiꞌaꞌa manohuga haro!”

²⁸Rehano Iesuꞌa naenaeninaꞌa, “Badiꞌa ḡoere egadu haḡaiḡa haḡaeꞌeteꞌe azaḡaꞌe Badiꞌa manohuga hideꞌohe.”

²⁹Iesu vaḡe onairoteꞌe azaḡaꞌe ufeta ḡehararotene, Iesuꞌa ziro, raenaꞌa, “Izidi egaꞌe sauꞌa, 'Haḡai nu badeḡa ihofoꞌi!' rae raꞌohe. Rehano e haḡai nu badeḡaꞌe mene furenoziniꞌuma, u peroveta vazeḡa Iona mazao fureraroteꞌe haḡai nu badeḡa reꞌuma.

³⁰Iona mazao naginiꞌa fureniroteꞌe haḡaiḡaꞌe Nineva azaḡa mazao haḡai nu badeḡa reiro. Eꞌe teige, eḡe mazao naginiꞌa fureraꞌuma haḡaiḡaꞌe izidi ega mazao haḡai nu badeḡa reꞌuma.

³¹Ibite madaḡano Siba habaꞌa kini roḡaeḡaniꞌa haba faḡanonoꞌo kini Solomona ḡoere abitoga veize onamiro. Izidi Solomona vitinoga vazeḡaꞌe eḡe, rehano za eḡe ḡoere abitoga mene urateꞌohe. Eꞌanoꞌo Badiꞌa kota madaḡano Siba kini roḡaeḡaniꞌa izidi ega zamao edanadu ziꞌuma, raenaꞌa, 'Zaꞌe veꞌoga!'

³²Ibite madaḡano Nineva azaḡaꞌe Iona haramo abitadu sauꞌaonoꞌo ḡihure ḡouriro. Izidi Iona vitinoga vazeḡaꞌe eḡe, rehano zaꞌe eḡe ḡoere abitoga mene urateꞌohe ebu mene ḡihureꞌohe. Eꞌanoꞌo Badiꞌa kota madaḡano Nineva azaḡaniꞌa izidi ega zamao edanadu ziꞌuma, raenaꞌa, 'Zaꞌe veꞌoga!'”

³³Ebu Iesuꞌa ziro, raenaꞌa, “Vaze ꞌahoganiꞌa ihure hufine mene ꞌuꞌuru tiꞌuma ga tunahu hina mene ogone modiꞌuma. U vazeꞌa ne diuḡine agaḡa horoniꞌuma radu midau tiꞌeteꞌe habaꞌano midau tiꞌuma.

³⁴Ḡa ubumaꞌe ahiꞌo ihureḡa heuḡa. Ḡa ubumaḡo manoḡa reine, ḡa ahiriꞌe agaḡaniꞌa irivaꞌiꞌuma. Rehano sautaune, ḡa ahiriꞌe uzaboꞌa irivaꞌiꞌuma.

³⁵Eꞌanoꞌo ḡae zamao agaḡaꞌe uzabo ga mene ḡianoꞌi!

³⁶Ḡa ahiriꞌe agaḡaniꞌa irivaꞌadu uzaboḡa ꞌahoga oꞌoꞌa reine, aꞌe agaḡa bagaḡa ihureḡa ḡae rana agaruꞌeteꞌe heuḡa.”

³⁷Iesuꞌa ḡoere hauḡirotene, Farisea vazeḡa ꞌahoganiꞌa ane teite oganoga veize uminiro. Ebu Iesuꞌa ani ne onamadu ogomu fataḡa zamaine ehoriro.

³⁸Farisea vazeḡaꞌe Iesuꞌa izema oganogano ꞌevoꞌa mene vuzuꞌiroteꞌe horonirotene ani zaguzagaro, mazaḡa zeḡe vouḡa haḡaio, 'Evoꞌa ibite vuzuꞌadu ogafo,' rae reiro.

³⁹Ebu Zuhiꞌa Boroꞌa Farisea azaḡa ziro, raenaꞌa, “Farisea azaḡa, zaꞌe bioze zu siuvaze enoga daꞌo vuzuꞌe deheneꞌeteꞌe azaḡa heuḡa, mazaḡa ꞌevoreze vuzuꞌeꞌohe rehano, zamazeꞌe ununu zu sauꞌa toraḡa hina iriꞌaveꞌohe.

⁴⁰Zaꞌe mene huhuzaḡa! Badiꞌaꞌa enone daꞌo mene haḡairo, rehano zama zuni haḡairo. Evoreze daꞌo ago vuzuꞌoꞌi, rehano zamaze zuni dehenoꞌi!

⁴¹Eꞌanoꞌo zae mereki zamaḡano ḡauze zahara azaḡa zenoꞌi! ꞌOugine zaꞌe Badiꞌa ubumaoꞌe deheḡa taugi reꞌuma.

⁴²Farisea azaḡa, zae fase vetuḡaḡa, aduga boro hidiꞌuma! Mazaḡa zaꞌe tirara nebaḡano eḡa zu murari teige komeꞌa fase gaubanana tiba Badiꞌa hauꞌohe. Rehano vaze mazao haḡai duduḡa haḡaeꞌeteꞌe zu Badiꞌa zamareꞌeteꞌe igi modeꞌohe. Za ḡau boro ꞌadiꞌe haḡaoꞌi, ebu komeꞌa komeꞌa zuni haḡaoꞌi!

⁴³Farisea azaḡa, zae fase vetuḡaḡa, aduga boro hidiꞌuma! Mazaḡa zaꞌe nuꞌonuꞌo neḡano vaze boroboroꞌa ehoreꞌeteꞌe habaꞌano ehorihi raꞌohe. Ebu vazevazeꞌa nuꞌonuꞌo habaꞌano hidine, 'Zuhiꞌa' rae gubaze ḡorezihi raꞌohe.

⁴⁴Zae, fase vetuḡaḡa, aduga boro hidiꞌuma! Mazaḡa zaꞌe rune iduḡa uꞌuruḡa heuḡa. Rune ahiꞌaꞌe idu zamaḡano ruhuḡa rehano, vazeꞌa eꞌe rana oname onaeꞌohe. Eꞌe teige, vazeꞌa horozeꞌetene zamazeꞌe toraḡa rae mene edereꞌohe.”

⁴⁵Mose goro ḡoeꞌa ihozeꞌeteꞌe vazeḡa ꞌahoganiꞌa Iesu niro, raenaꞌa, “Ihore vazeḡa! Ḡa ꞌouge ḡoereꞌeteꞌe eme zu rae sausaufeꞌeteꞌe heuḡa.”

⁴⁶Iesuꞌa naenaeninaꞌa, “Mose goro ḡoeꞌa ihozeꞌeteꞌe azaḡa, zae zuni fase vetuḡaḡa, aduga boro hidiꞌuma! Mazaḡa za ihoreꞌe riga hune, eꞌanoꞌo vazeꞌa hegotoga reine mene idaḡa. Zaꞌe vaze daꞌo aduga boro ziniꞌohe, rehano zae ꞌevore huduꞌa tiba hina zu mene hune danazeꞌohe.

⁴⁷Zae, fase vetuḡaḡa, aduga boro hidiꞌuma! Mazaḡa peroveta azaḡaꞌe vouḡazeꞌa zimiro, ebu zaeꞌa ze rune iduḡa rohorohoneꞌohe.

⁴⁸Vouḡazeꞌa peroveta azaḡa zemadu zaeꞌa iduze rohorohoneꞌetaꞌaꞌe, zaꞌe vouḡazeꞌa haḡai duduga haḡairo rae raꞌohe.