LUK 2:4-22

⁴Siwan Josepda dongu Devitdane dongune aakut tapa. Unzingge yot gapma Nasaret Galili kep komune yuak gapma teke uneta Judia kep komune kopbut. Koke Betlehem yot Devitda tupa siknga yukut gapmane kukut.

⁵Maria musia kayaapane apnaat umana paningge kukumayak.

⁶Kusika kundoke you wanggapmane yuwawat engangu dangem tapana tangaitnangge natake wawiapa tangaikut. You apetnanga gwenu gwa gitnawan kake kuke tangaike tauk sanda tapan kopan ikwawa gamande dopang gwekatang tewan yukut.

⁸Siwan aminu kundu unenana kunduta sipsip toike you wesim peke zikaane kayuking.

⁹Kayuwawa Anututane angelata anggaman apan wa aminda kawawa Anututane kakaa aknganata waenga siknga siwan akagwauking.

¹⁰Akagwauwa ngana angelata ginu ma gwaubam ngang yanikut, “Natapnong. Nata wamu take siknga aknga takapunggat,” ngang yanikut. “Aminbamda wamu waaknga natake musiane iaknga natake apbakngake yutning,” ngang yanikut.

¹¹“Tapduk anggwene Devitdane yot gapmane maya tapatuta engangu gwa tangaik. Aminu waapata ginu kuupbam gatandamik. Buyambam tapa Krais ngang ininangge,” ngang yanikut.

¹²“Tuwangu ginda kake natdetningge daniwa natapnong. Ginda engangu tapatu taukga tapan kopan ikwawa gamandane dopangaatang tewan pewik ngang kake wamu wa daninggat taknga siakan ngang natapnong,” ngang yanikut.

¹³Angelata unzing yaniwawan zetgaman angela kwaapzang enandang nanata anggaman apuke angela waapaat gatake yuking. Yuke Anututane umana anzing yatangenaking,

¹⁴“Anututane umana enane siknga singgak. Siwan Anututa kep aminde musip gwaang natayamunggak kakwakngata musip kwikwik natake yutning,” ngang yatangenaking.

¹⁵Siwan angelata wa amin peke enandang kopana sipsip toik aminu anzing yaking, “Ayok. Betlehem kuke sanga wa singgakge Buyambam tapata ninik kaknga kanim,” ngang yaking.

¹⁶Yake sipsipna undang peke zetgaman kuke you wanggapmane kundoke Josepat Mariaatda undang yuwat kaking. Kawawa engang kapata sipsip gamandane dopang gwekatang peawan kaking.

¹⁷Kakenga wamu Buyambam tapata engangu waapae yaniwan natapbingu une yaniking!

¹⁸Yanike peke aminbam yanitakuwa natake aminbamda wamu sipsip toikga yaking kakngae nangaakan natapbing.

¹⁹Siwan ngana Mariata wamu wa kuupbam musiane gitna pake natayukut.

²⁰Natake yuwawan toikga gatu kuke Anutu inimbakngaking. Angelata yaniwan natake kuke kaking kakngae inimbakngayuk kuking.

²¹Siwan tapduu katau kuut musa kautdu gweaat gwenduat kawa puyuwana enganggane gupna mataking. Matakenga ita mingae musip ganang dua yuwawan angelata umana yakut takngae natake umana Jesu ngang inikut.

²²Siwan Anututane wapatang tupa siknga anzing matakut, “Waaknga dangem tapana aawiu Anututane sanga ngang yaninong. Yanike waapa takapuke Anutue nomune imunong,” ngang matakut. “Sangasa kwait suyuknga gweaya ba gubanga gweaya pakapuke Anutue imunong,” ngang matakut. Siwan mingata pasap wam takngatu gepbiatang kundusim yuke tapduknga kawan sandewan minga nanata Anututane mama wapatang matakut taknga tasinangge natake engang take Anutue nomune imunangge Jerusalem gapmane kopbumayak.