Luk 1:8-57

⁸Wam da, Sekaraya dugup mega nagirewa nao semon taiwanumune, menan me pirisi nao muga God men tainewa ame taiwandin.

⁹Menan, dugup mega guegue muga gapan, apan Sekaraya om enun wane God Paewa unuk ae tutu dena omaewa iu iriwandapen dien.

¹⁰Ame oma tutu dena iu God Paewa gwanap irapen wam airasewa ame taueni menan waenapan iragi tauan God Paewa sin panane gwanap, iamen, God inap mup taiwanumun.

¹¹Wam ame gapan, Sekaraya God Paewa gwanap wandeni, oma tutu dena iu irine watarewa mainewa nutup gapan God anea mega da ap mepe ase venase yoniwandin.

¹²Apan Sekaraya anea use yaveni, me imua puk wan tap ase anu guren.

¹³Go anea anega wadien, “Sekaraya, tap ya ta. God inap mup waingiana anu gimagiwandin. Menan waenaga Ilisabet iman orup apan bat geneta, ame ge yaua Dion diai.

¹⁴Me yanepi ge aton anui amba imuga potaga tarep wareta, amba den waenapan aruga daramumu wata!

¹⁵Iwa orup ame God yamap bawarewa tata kaum wain go kaimake dena kaumewa upi ya nata. Orup ame inewa potap wandeni wamewa gapan God Guewa Woup Seniwa imu pose no dotoueta.

¹⁶Me at Isurero nagire aruga Ayop muga God inap imumu wat entan mumeta.

¹⁷Watageta apane Elaidia aro amun mega ap umap Dion wa taiwandata. Waenapan wadiamopi gapan mame waiwa entane otu waiwa munan sia onamoin. Amba God tandayasine nagirewa entane kakaewa nagire ewap amoin. Ap anega tapi gapan waenapan iragi bongam bongam ta Ayop sia tauapen menan amasewa ta wanumoin.”

¹⁸Amba Apan Sekaraya anea singui wayaven, “Otuna oisewa wadianegiana tavewa di wandepi ne anenen ta amba asigip tain? Ne waenana dere aeta guranen.”

¹⁹Anea gare anega wan, “Ne Gebero, God namup yonina apanewa, ame God watu enanegen, nop oit kakaewa mame wadiagepen ongen.

²⁰Wapena anu. Nop nega evi amba tavewa di tauepi noa ya anu tumaseana menan nok borasep wanigai, otuga yanepi amba nop sia wai.” Anea ap anega wan.

²¹Koni ap gapan, waenapan iragi Sekaraya menan pa garip amat wanumon anu bambam taiwanumun, iwa di menan Sekaraya pa gwanap nononga wandia.

²²Wanumone, Sekaraya pa garip ma taue oneniwa, nop wapen tani umap uon no borasen. Ap menan waenapan anega anun pa gwanap paua da utupa yaven. Me nop wawa umap uon menan naniwa gapan guegue ta ewamuiwandin.

²³Me God nave taitameni amba pa mega aen

²⁴Mame ewap, Sekaraya waenewa Ilisabet bagup tani. Ap menan, siragam nani yamunaet pa mainan bore wanden.

²⁵Ap gapan Ilisabet mek anega wan, “God bagu sisi nenan anu ago neneni iwa ne orup ya seana menan umam nega waenapan yamamup wat musen.”

²⁶Ilisabet bagup tani siragam mega nani yamu daitonawa gapan God anea mega Gebero watu enen at Galili pa yaua Nasaret tauen.

²⁷Ap mepe waenoro ini denawa, yaua Meri, iniwandin. Apan Diosep, watageta apane Devit naewa, ganganasen.

²⁸Anea ame waenoro inap taue anega wan, “Nonup inagap wandep. God ge inagap wandia amba wat aipakam gimaginiwa.”

²⁹Go Meri nop ame anuni bagua aguren, iwa anea nop wani ase anu bambamase anega anuni, gaun ma tavewa dim da.

³⁰Anea sia wadien, “Meri, baguga ya arep, iwa God garaet mega inagap tauen.

³¹Nop ma ae anu! Ge iman bagup tai orup apan barewa amba yaua Iesu diai.

³²Otuga Ayop bawarewa tata, yaua dawa God Paina Iragena Otua diaine. Amba God, omae baewa apan Devit ayop tani umap, God Iesu ware apan Devit watat mega gagap barep ayop ta wandeta.

³³Menan Iesu, apan Diekap naewa megawa, ayop mugawa wande aiwandata amba Iesu toemu mega no ya utu taeta.”

³⁴Gare Meri anea ase anega dieni, “Ne waenoro wanik anginawa, inak arita mame inanap anenen venaseta?”

³⁵Anea gare anega wan, “God Guewa Woup Seniwa inagap taueta, God amun mega to umageta. Ap gapan digumin tai amba otuga yanepiwa God Otua, posewa woup seni apanewa diain.

³⁶Wapena anu. Ge asigigap dugup gega waenewa Ilisabet, aeta ton go me bagup tan. Waenapan otu uon iragaet diane go endi me bagup tan wandini siragam mega nani yamunaet yamu daiton.

³⁷Iwa God inap kaimake den uon, me aroe amunu den, dim dim wapi venaseta.”

³⁸Meri anuni sia wan, “Umap. Ne Ayop ayamat mega taina waenewa, menan ge anenen dianegeana inanap di venaseta.” Meri ap wani amba anea ae ve aen.

³⁹Wam ame gapan Meri menawaet yon wandeni boge tunup arige, at Diudia gapan, pa da ap mepe aen.

⁴⁰Ame taueni, apan Sekaraya pa mega unugeni amba Ilisabet gaune tan.

⁴¹Ilisabet Meri gaun mega anuni gapan Ilisabet orup potapewa vitagen doragen tan anun. Ap tani Ilisabet imu pose iragi God Guewa Woup Seniwa bararaen.

⁴²Menan Ilisabet Meri inap kaimakaet anega wan, “God wat aipakam mega inanup viseni gapan wat aipakam aigapewa ge waraan. Amba orup barewa den wat aipakameta!”

⁴³Den Meri inap anega wani, “Ne kakae uon go Ayop nega inewa yawanegepen tauaana menan ne aton anuivin.

⁴⁴Ame menan ne gaun gega anuna gapan otuna bagunape atonu den vitagen doragen tan.

⁴⁵God genan ta wadiageni tavewa tauepi ge anu tumaseana menan wat aipakam gimagen.”

⁴⁶Boge Meri God menan anega wan, “Imuna gapan God wa taragasivin.

⁴⁷God wat inakam nimanegeniwa menan inap atonua anuivin.

⁴⁸Iwa, ne me nao mega waenewa, ne umap uon, go me anu nimanegen. Wam endiwa mame use aeniwa gapan, waenapan iragi anega dianegain, ‘Ge God wat aipakam gimageni waenewa.’

⁴⁹Iwa God aro amun apanewa aigap iragenawa, inanap ugup ugup tani menan. Tavewa di, me yaua woup am sen.

⁵⁰Naewa naewa yan aiwandata, iravi God inap anu gure wa taragase ta amuiwanumampina, menan mu bagu sisi muga anuiwandata.

⁵¹Me amun mega waenapan wa ewamon. Apan apan muk ingane wat wane taine nagirewa, me gut marimeta.

⁵²Amba den piup namu yoyo taine nagirewa yaumu aoma waren, go kayakayawan taine nagirewa yaumu ao waren.

⁵³Enup aramuine nagirewa wan dim dim kakaewa munen, amba puraput dena nagirewa mondi up oimon amon.

⁵⁴Me nao nagire mega, ian Isurero ago munen. Me imu ya oaraen go wat agoat nimanen.

⁵⁵Ap menan nu, omayan baewa Eibaraam, ge naewa naewa mega wande aeniwa den, nunan bagu sisi anu wa agiat nimaneni, endi mame tauen.”

⁵⁶Menan Meri Ilisabet tane ap mepe iniwanumune siragam yampo uon tani amba entane pa mega sia aen.

⁵⁷Ilisabet orup bare bare wamewa taueni me orup apan baraen.