LUCAS 1:8-57

⁸Dxe ne ryal ylaa xegrup fxuz-Zacari dxiin por Dëdyuzh,

⁹wlaa men zegnak xkoxtumber men yra sefxuz men, gan txuzh yganen tee guu guux ne nzoon rree lenxeydoo Dëdyuzh. Laatee Zacari wganeno.

¹⁰Or ne le Zacari kaguu guux guin lenydoo, le yrandxee mén ndxin fwer kanab lo Dëdyuzh.

¹¹Orguin wlalo te xangel Dëdyuzh lo Zacari; zu ne koo fkuuk ladbëë, ledne ruu guux ne nzoon rree.

¹²Ne wii Zacari angel guin, axtegue nandet men pe nlaa men, tant wdxe men.

¹³Lex re angel guin lo men: ―Zacari, ydxedet de, porke le ne rnab de che won Dëdyuzh; naaree gap Elisabet xewnaa de te mëdbee, ynesela de ne Xwa.

¹⁴Kesentyent sak lextoo de no szhiilen de chene gal ne, no ndal ke mén yzhiilen,

¹⁵porke te zhannon gak xpee de lo Dëdyuzh. Goodet zhaa bin, ni betlel nisndux goodet zhaa, no axtegue antes ne gal zhaa, che kesentyent raknonen Espíritu Sant zhaa.

¹⁶Laa zhaa ylaa ne kesentyent ndal men-Israel yberee lo XDëdyuzh men-Israel.

¹⁷No laa zhaa chidner lo Zhan ne rnebééy ne chiid. Gap zhaa xpoder Elías no le xespíritu Elías, chen ynegyakchi zhaa xdil ngwzan yra ngwzan zhiin ngwzan no chen yseed yra mén ne ntoz gon men diiz. Zenga ylaxnëz zhaa mén chen tsukas mén Zhan ne rnebééy ne chiid.

¹⁸Orguin re Zacari lo angel guin: ―¿Pezee gaknan noo ne nli negwa ne na de? Si che kesentyent gol noo yrup noo xewnaa noo.

¹⁹Wke angel guin, re ne: ―Noo nak Gabriel, xdxiin Dëdyuzh kalaa noo; laa Ne wxaal noo ne ynii noo lo de no ne yzëët noo dizwenree lo de.

²⁰Per kom wlaleedxdet de noo, orree gyanengup de, gakdet ynii de axtegue ne ydxiin dxe ne gak neree ne na noo lo de.

²¹Le yra mén ndxin fwer ndxinmbë́z men Zacari, rzee rzak men gan penak rruudetlel Zacari lenydoo.

²²Chene le Zacari wruu, wakdetre nnii Zacari lo men. Orguin wyenen men ne nuu ne wlalo lo Zacari lenydoo. Noze senye rluu Zacari lo men, porke wyanengup Zacari.

²³Chene wzaa dxe ne zu Zacari ruydoo, sya Zacari ruxyuu Zacari.

²⁴Zhich guin wakzhiin Elisabet xewnaa Zacari. Gaay mëëw axtegue wruudet men xyuu men, nuu lextoo men:

²⁵“Wseleedx Dëdyuzh mëëdree lo noo chen koodetre mén xeblaan noo.”

²⁶Chene wluzh xuup mëëw, wxaal Dëdyuzh angel-Gabriel te gyëz ne la Nazaret ne nak lo lyu ne la Galilea;

²⁷wa ne lo te nzeb-benak ne la Mli. Che nuu nzeb ne ytsëlnya nzeb yrup nzeb te mgyeey ne la Xeb ne zëëd xnëz rrey-David.

²⁸Zegne wdee angel guin ledne nuu nzeb, re ne lo nzeb: ―¡Payuz, Mli! Dëdyuzh wlanon de; laa Ne raknonen de; laa Ne wneleey de delo lo yrandxee wnaa.

²⁹Per chene wii nzeb angel guin, wzee wzak nzeb por diiz guin, nuu lextoo nzeb pe rnaleg diizree.

³⁰Lex re angel guin lo nzeb: ―Mli, ydxedet de, porke laa Dëdyuzh raknonen de.

³¹Orrenaa gakzhiin de; gap de te mëdbee, ynesela de ne JESUS.

³²Kesentyent gaknon ne; XPee Dëdyuzhnzoon ynii mén ne; laa Dëdyuzhnzoon ylaa ne rrey zeg wak David ne nak xpenkwlal ne rrey,

³³chen laalel ne ynebééy lo yrandxee men-Israel, no nunk gyaldet ynebééy ne.

³⁴Lex re nzeb lo angel guin: ―¿Pezee gak negwa ne na de, si ni te mgyeey gardet tsuno noo?

³⁵Wke angel re angel: ―Por Espíritu Sant gako; chiid xpoder Dëdyuzhnzoon ysakblaa we led de; por neguin mëdsant gwa ne gap de, XPee Dëdyuzhnzoon ynii mén ne.

³⁶No Elisabet xparyent de gap te mëdbee mase che gol men, men ne nan mén ne nuudet gap mëëd, per naaree wzaa xuup mëëw nakzhiin men.

³⁷Porke por Dëdyuzh yët ne gakdet gan gak.

³⁸Lex re nzeb: ―Dëdyuzh rnebééy lo noo; ylaa Ne noo zegne na de. Wluzhse re nzeb diizree, syague angel guin.

³⁹Zhichegue wako, zague nzeb te gyëz ne nak nes gyeey lo lyu ne la Judea;

⁴⁰ne wdxiin nzeb, wdee nzeb lenxyuu Zacari, wgabtyuzh nzeb Elisabet.

⁴¹Chene won Elisabet diztyuzh guin, watxegya mëëd lextoo Elisabet, no kesentyent waknonen Espíritu Sant men.

⁴²Orguin ndípse wnii men, re men lo nzeb: ―Dëdyuzh wneleey de delo lo yrandxee wnaa, no wneleey Ne mëëd gwa ne zuneey de.

⁴³¿Txu nak noo ne zëëd xnaa Men ne rnebééy zëdwii men lo noo?

⁴⁴Porke zegne won noo xdiztyuzh de, watxegya xpëëd noo lextoo noo por gyelgwzhiil.

⁴⁵Nzoon de ne wlaleedx de ne na Dëdyuzh lo de, porke zako.

⁴⁶Lex re nzeb: Ydeblextoo noo rzaknon noo Dëdyuzh,

⁴⁷no rzhiilen lextoo noo ne wselaa Ne noo lo dol.

⁴⁸Porke wkalo Ne noo, mase rut nakdet noo, noze te mén ne rlaa xdxiin Ne nak noo. Desde orree yrandxee mén ne nuu naaree, nigle mén ne gyed tsuur, ynii men noo men nzoon.

⁴⁹Porke nzoon yra ne wlaa Dëdyuzhnzoon noo; sant nak la Ne.

⁵⁰Syemper rles lextoo Ne yrandxee mén ne rlaa ne rkyeen Ne.

⁵¹Ndal ne wlaa Ne kon xpoder Ne; wluzh Ne ne rlebleedx yra mén ne nugya lextoo.

⁵²Wgyitxee Ne poder lo mén ne zob rnebééy, le mén ne rut nakdet wlagya Ne.

⁵³Wseleedx Ne gyelenzaak lo mén ne yët ne gu, le menrik wsan Ne nonchee zenga.

⁵⁴Nunk wnitleedxdet Ne ne gun Ne xyudar yra men-Israel ne nak xpén Ne, syemper wles lextoo Ne men,

⁵⁵zegne re Ne lo yra xpenkwlal be, lo Abraham no le lo yra men ne zëëd xnëz men.

⁵⁶Nga wkaa nzeb ruxyuu Elisabet zeg tson mëëw, zhich guin wberee ke nzeb ruxyuu nzeb.

⁵⁷Chene wdxiin dxe ne le xpëëd Elisabet wal, wap Elisabet te mëdbee.