LUKA 1:8-57

⁸Ntsiku inango, Zakaliya akhali mnyumba ya Mulungu, acimbacita basa lace la ubaba bwa ntsembe thangwe likhali pfoti la dzindza lace.

⁹Nakuti ukhali msambo wa azibaba wa ntsembe kumbacita pfoti-pfoti la kutentha ntsembe mNyumba ya Mbuya.

¹⁰Wanthu wentse akhapemba kunja panthawe yakutentha ntsembe yakununcira.

¹¹Ndipo kabodzi na kabodzi adawoneka anjo m'bodzi wa Mulungu aciima kuboko lace ladidi pamphatso ya ntsembe yakununcirayo.

¹²Pomwe Zakaliya adawona anjoyo, iye adadzidzimuka acibva mantha.

¹³Tsono anjoyo adamuuza kuti: Zakaliya! Leka kubva mantha. Mkumbiro wako wabveka. Mkazako Zabere an'dzakubalira mwana wa mwamuna. Un'dzamupasa dzina lakuti Juwau.

¹⁴Iwepo un'dzakomedwa ucikondwa na kubadwa kwace, ndipo wanthu azinji an'dzakomedwambo.

¹⁵Iye an'dzakhala mkulu pamaso paMbuya. Iye an'dzamwa lini vinyu ayai cakumwa cinango cakuledzeresa. Pomwe iye akadzabadwa an'dzakhala wakudzazidwa kale na Mzimu Wakucena.

¹⁶Iye an'dzabweresa pomwe wanthu wa kuIjirayeri kuna Mbuya Mulungu wawo.

¹⁷Iye an'dzabakapita mumzimu na mpambvu ninga mpolofeta Eriya, kuti adzasandulize mitima ya azibaba kuti adzayanjane pomwe na wana wawo, na kudzapfundzisa anyakupanduka kuti adzafambe munjira yakulungama. Na tenepo an'dzakondzerera wanthu kuna Mbuya.

¹⁸Ndipo Zakaliya adam'bvundza anjo ule aciti: “Ningadziwe tani bzimwebzi? Thangwe ine-pano ndine nkhalamba ndipo mkazangu ana magole mazinji.”

¹⁹Anjoyo adamutawira aciti: Ine-pano ndine Kabiriyeri. Nimbakhala pabodzi na Mulungu. Ndatumidwa kuti ndidzakuuze mafala yabwinoya.

²⁰Ndipo un'dzakhala bewewe, un'dzalewa-lewa lini pomwe mpaka pantsiku yomwe bzin'dzacitika bzimwebzi thangwe ulibe kubvuma mafala yanguya yomwe yan'dzatewezeka kutsogoloko.

²¹Wanthu akhamudikhira Zakaliyayo acidabwa thangwe iye adacedwa mnyumba mwa Mulungumo.

²²Pomwe iye adabula mnyumbamo akhalewa-lewa lini ndipo wanthu adadziwisisa kuti iye adawona cinthu cakudabwisa. Iye akhalewa-lewa na manja basi thangwe akhadasanduka bewewe.

²³Pomwe ntsiku zace za basa zidamala, iye adabwerera kumui.

²⁴Pakupita ntsiku zimwezo, mkazace Zabere adatenga mimba, ndipo adabisala mpaka minyezi mixanu, acimbalewa kuti:

²⁵“Ibzi ndibzo Mbuya wandicitira, tsapano palibe cinthu comwe cindipasa manyazi kuna wanthu.”

²⁶Ndipo mwezi wacitanthatu wace, adatumidwa anjo Kabiriyeri kumzinda wa Nazalee dziko la Galileya.

²⁷Kumweko kukhana dende lomwe likhadabvundziridwa na mwamuna dzina lace Zuze wa dzindza la Davide. Dzina lace akhali Maliya.

²⁸Pomwe adafika pana Maliyapo adalewa kuti: “Kondwa ndiwe, wankhombo. Mbuya ana iwepo!”

²⁹Maliya adaneseka kwene-kwene na mafalayo. Ndipo adakumbukira mumtima mwace mamukoyo.

³⁰Anjo ule adapitiriza kulewa aciti: Maliya! Leka kubva mantha! Iwepo wasimbidwa na Mulungu.

³¹Un'dzatenga mimba ucidzabala mwana omwe un'dzam'cemera kuti Jezu.

³²Iye an'dzakhala mkulu acidzacemeredwa Mwana wa Iye Wakudzulu. Ndipo Mbuya Mulungu an'dzam'pasa umambo bwa babace Davide.

³³An'dzatonga na kuyenderera azukulu wa Jakobi. Umambo bwace bun'dzamala lini.

³⁴Maliya adabvundza anjoyo aciti: “Kodi bzingacitike tani terepoyo? Nakuti ine-pano ndikanati kuphatidwa na mwamuna.”

³⁵Ndipo anjo ule adamutawira aciti: Mzimu Wakucena un'dzakubulukira. Ndipo mphambvu za Iye Wakudzulu zin'dzakugwanankhira ninga mtambo. Na tenepo mwana omwe an'dzabadwayo an'dzacemeredwa Mwana wa Mulungu.

³⁶Na m'bale wakombo Zabere ana mimba ya minyezi mitanthatu uko iye ni nkhalamba, napo wanthu akhalewa kuti iye ni ngomwa.

³⁷Nakuti palibe comwe cingatazike kuna Mulungu.

³⁸Maliya adati: “Ndiri pano ine nyabasa wanu Mbuya. Mbabzicitike ninga momwe mwaleweramo.” Ndipo anjo ule adayenda.

³⁹Pantsiku zimwezo, Maliya adayenda na kamkulumize kumui omwe ukhali mmapiri ya mzinda wa Juda.

⁴⁰Ndipo adafika pamui paZakaliya adamusana na Zabere.

⁴¹Pomwe Zabere adabva mamuko ya Maliya, mwana omwe akhali mmimba mwaceyo adapfukunyuka. Zabere adagwaniridwa na Mzimu Wakucena

⁴²acilewa na kukuwa aciti: Wakusimbidwa ndiwe kuposa akazi wentse! Wakusimbidwa pomwe ni mwana omwe un'dzabalayo!

⁴³Kodi ine-pano ndine yani kuti mai wa Mbuya abwere kudzandiwonambo?

⁴⁴Pomwe ndabva mamuko yakoya, mwana omwe ali mmimba mwangumuyu wapfukunyuka na kukondwa.

⁴⁵Wakusimbidwa ngule omwe adabvuma kuti bzentse bzomwe Mbuya adalewa bzin'dzacitika.

⁴⁶Ndipo Maliya adalewa kuti: Mtima wangu uli kutumbiza Mbuya

⁴⁷ucikondwera Mulungu Mpulumusi wangu.

⁴⁸Thangwe iye adandibvera ntsisi na kubzicesva kwangu ine nyabasa wace! Kuyambira lero mpaka kutsogolo wanthu wentse an'dzandicemera wakusimbidwa.

⁴⁹Thangwe Iye Nyamphambvu wandicitira bzinthu bzikulu kwene-kwene! Na tenepo dzina lace ndakucena.

⁵⁰Ntsisi zace n'zakuyenderera kuna madzindza yentse yomwe yambamulemekeza.

⁵¹Iye adaimisa boko lace la mphambvu, acithotha wanthu wakusamwa mmitima mwawo.

⁵²Adagwesa atongi mmipando yawo acikwizika wakubzicesva.

⁵³Adapasa bzinthu bzabwino anyanjala, acithotha anyakudala cimanja-manja.

⁵⁴Iye adakumbuka ntsisi zace acithandiza Ijirayeri, nyabasa wace,

⁵⁵ninga momwe adauzira azibabathu Abramu na azukulu wace wentse na kuyenderera.

⁵⁶Maliya adakhala naye minyezi mitatu, ndipo adabwerera kumui.

⁵⁷Pomwe zidakwana ntsiku, Zabere adabala mwana wa mwamuna.