Luk 1:8-57

⁸Dɔsɔk dɔlɔma Yakariya pəc-bəc yɛbəc yɔn ya kəloŋnɛ ka Kanu, bawo kəgba kəŋan kənakɔ kətɔmpər kəloŋnɛ kaŋkɔ.

⁹Pəmɔ tɔkɔ aloŋnɛ a Kanu ŋaŋyɔ ti mɔ, k’aŋgbal kɔla; kɔ kɔla kəmentər Yakariya dɔsɔk dadɔkɔ kəbɛrɛ ka dəkəfo kəcempi ka kəlɔ kəpɔŋ pəkɔ-motɛ Kanu Kəpɔŋ curay.

¹⁰Afum alarəm ŋanayi nde dabaŋka ŋac-lok-lokər Kanu tɛm tatɔkɔ aŋc-mot curay mɔ.

¹¹Awa, kɔ mɛlɛkɛ ma Kanu mowurər Yakariya, mɛcəmɛ nde kəca kətɔt ka aŋgbip nŋɛ aŋmot curay mɔ.

¹²Ntɛ Yakariya ɛnəŋk mɛlɛkɛ mmɛ mɔ, kɔ pəyi kɔ yama-yama, kɔ kənesɛ kəsumpər kɔ.

¹³Mba kɔ mɛlɛkɛ mmɛ moloku kɔ: «Ta mənesɛ Yakariya, bawo Kanu kəlɛk kətola kam: Elisabɛt, wəran kam, endekom’am wan wərkun məde məwe kɔ tewe ta Saŋ.

¹⁴Wan wəkakɔ endesɔŋ’am kəyekti domp pəbɔt’əm sɔ mes; kəkom kɔn kəndesɔŋɛ afum alarəm kəselsər.

¹⁵Bawo fum wəpɔŋ endeyi fɔr ya Kanu Kəpɔŋ kiriŋ; ɔfɔde pəc-mun member, ɔfɔde pəc-mun yomunəs nyɛ yeŋcisəs mɔ, endelarɛ Amera Ŋecempi ŋa Kanu pəsɔrɔ-yi kɛrɛ dəkor.

¹⁶Endeluksɛ awut a Yisrayel alarəm nnɔ Kanu Kəpɔŋ, Kanu kəŋan, kəyi mɔ.

¹⁷Kanu kəndesak Saŋ pəyi Wəbɛ kiriŋ kəderɛnɛ amera kɔ fənɔntər ya wədəŋk wəka Kanu Eliya. Endekafəli bəkəc ya cas nnɔ awut ŋayi mɔ, bəkəc ya ataŋi ləŋəs nnɔ kəsɔk domp ka alompu kəyi mɔ, pəlompəs afum aŋɛ ŋandeyi kiyi ka Kanu Kəpɔŋ tɛm fəp mɔ.»

¹⁸Kɔ Yakariya eyif mɛlɛkɛ: «Cəke cɔ indecərɛnɛ, a kaŋce kɔ-ɛ? Bawo wətem iyɔnɛ kɔ wəran kem sɔ ɛmbɛk.»

¹⁹Kɔ mɛlɛkɛ mɔsɔŋɛ kɔ kəcərɛ, moc-loku kɔ : «Ina ɔyɔnɛ Yibirila nwɛ ɛŋcəmɛ Kanu fɔr kiriŋ mɔ! Asom’im kəsom dəm kədelok-lokər’əm, ilok’əm toloku tɔtɔt tantɛ.

²⁰Mba ntɛ məntɔlaŋ moloku mem mɔ, məfɔdesɔ-tam kəlok-loku haŋ dɔsɔk ndɛ tendeyi mɔ, tɛm ntɛ Kanu kəndefaŋ mɔ.»

²¹Ntɛ afum fəp ŋac-kar Yakariya nde dabaŋka mɔ, kɔ pənde pəciyanɛ ŋa, bawo oŋc-won dəndo kəfo kəcempi.

²²Yakariya endewur, ɛntam fɛ kəlok-lokər ŋa, kɔ afum ŋaŋcərɛ a Kanu kəsɔŋɛ Yakariya kənəŋk tes tɔlɔma dəndo kəfo kəcempi disrɛ. Kɔ Yakariya ɔyɔnɛ wətɔtam kəlok-loku, k’ɛyɛfɛ kəlok-lokərɛ ŋa waca.

²³Ntɛ mataka mɔn ma yɛbəc meŋcepər mɔ, k’olukus nde kəlɔ kɔn.

²⁴Pəwon fɛ, kɔ wəran kɔn Elisabɛt ɛmbɛkəs. K’ɔŋgbɔpnɛ yof kəcamət, pəc-loku:

²⁵«Ntɛ tɔ Kanu Kəpɔŋ kəyɔn’em, kəntɛp oŋ kədewosɛ kəwur’em malap nnɔ afum ŋayi mɔ.»

²⁶Ŋof ŋa camət-tin ŋa kəbɛkəs kɔn, kɔ Kanu kəsom mɛlɛkɛ Yibirila nde dare dɔkɔ aŋwe Nasarɛt mɔ, atɔf ŋa Kalile,

²⁷ndena wan wəran wətɔcərɛ wərkun, nwɛ aŋc-we Mari mɔ. Isifu wəka dokom da Dawuda ɛŋc-fac kɔ.

²⁸Kɔ mɛlɛkɛ mɛmbɛrɛ ndena Mari, kɔ moloku: «Pəbɔt’əm, məna nwɛ Kanu kəmar kəfili mɔ; Kanu Kəpɔŋ kəsol’am!»

²⁹Kɔ toloku tatɔkɔ tɔsɔŋɛ kɔ pəyi Mari yama-yama. K’eyifnɛ ntɛ kəyif kaŋkɔ kəloku mɔ.

³⁰Kɔ mɛlɛkɛ moloku kɔ: «Ta mənesɛ Mari, bawo məsɔtɔ kəmar kəfili nkɛ kəyɛfɛ ndena Kanu mɔ.

³¹Mənəŋk fɛ! Kəbɛkəs kɔ mənder, məkom wan wərkun, məde məwe kɔ tewe ta Yesu.

³²Fum wəpɔŋ endeyi, pac-we kɔ wan ka Wəbɛ wəka dareŋc, Kanu Kəpɔŋ kəndesɔŋ kɔ kəŋgbasar ka dɛbɛ da Dawuda, wətem kɔn.

³³Nkɔn endekekərɛ dɛbɛ da doru o doru nnɔ aka dolom da Yakuba ŋayi mɔ, dɛbɛ dɔn dɔfɔdelip.»

³⁴Kɔ Mari eyif mɛlɛkɛ: «Cəke cɔ tatɔkɔ tɛntam kəyi-ɛ, bawo iŋcərɛ fɛ wərkun?»

³⁵Kɔ mɛlɛkɛ moloku kɔ: «Amera Ŋecempi ŋa Kanu ŋendeder’əm, fənɔntər fa Wəbɛ wəka dareŋc fəkump’əm katəkəp kɔn. Itɔ endesɔŋɛ wan nwɛ andekom mɔ kəcemp, pac-kulɛ kɔ «Wan ka Kanu.»

³⁶Mənəŋk fɛ! Elisabɛt wəkomɛnɛ kam, nkɔn sɔ ɛmbɛkəs wan wərkun detembəra dɔn disrɛ. Nkɔn nwɛ aŋc-kulɛ kətɔ-kom mɔ, ŋof ŋɔn ŋa camət-tin ŋa kəbɛkəs ŋeyi ŋaŋɛ,

³⁷bawo Kanu kəfɔtarpɛnɛ tes o tes.»

³⁸Kɔ Mari oloku: «Kanu kəyɔn’em tatɔkɔ məntɛp kəc-loku mɔ. Wəcar ka Kanu Kəpɔŋ iyɔnɛ; intola teyi pəmɔ tantɛ məlok’im ti mɔ.» Kɔ mɛlɛkɛ mɛyɛfɛ kɔ day kɔ mɔŋkɔ.

³⁹Mata mamɔkɔ, kɔ Mari ɛyɛfɛ kəkɔ katəna-katəna dare da Yuda dɔlɔma, nde atɔf ŋa dəmɔrɔ.

⁴⁰K’ɔŋkɔ pəbɛrɛ kəlɔ ka Yakariya, k’eyif Elisabɛt.

⁴¹Elisabɛt endene kəne dəm kəyif ka Mari, kɔ wan ɛsɛp kɔ dəkor. Kɔ Amera Ŋecempi ŋa Kanu ŋɛlarɛ katin Elisabɛt,

⁴²kɔ ŋɔsɔŋɛ Elisabɛt kəgbəŋɛ kəloku: «Kanu kəmpoc’am pətɔt aran fəp dacɔ,

⁴³Ak’ iyɔnɛ ntɛ iya wəka Wəbɛ kem endeder kəyif’im mɔ?

⁴⁴Ntɛ ine kəyif kam mɔ, kɔ wan ɛsɛp’im dəkor pəbotu disrɛ.

⁴⁵Pəbɔt nwɛ ɛnalaŋ mɔ, bawo ntɛ Kanu Kəpɔŋ kənaloku kɔ mɔ tendeyi.»

⁴⁶Kɔ Mari oloku oŋ: «Iŋkor-koru Kanu Kəpɔŋ kətam kem fəp, Kanu kəpocɛ pətɔt pokom pa kor kam!

⁴⁷Amera ŋem ŋɛlarɛ pəbotu teta Kanu Kəpɔŋ Wəyac kem;

⁴⁸bawo owosɛ kəgbal fɔr nnɔ ina, wəcar kɔn wəfəfər iyi mɔ. Ɛy, kəyɛfɛ ndɛkəl haŋ tɛm fəp, afum ŋande ŋac-lok’im a pəmbɔt’im,

⁴⁹bawo Wəka fənɔntər nwɛ ɔyɔn’em mes mɔpɔŋ mɔ, tewe tɔn teŋcemp!

⁵⁰Kəbɔt ka Kanu amera kəŋyɛfɛ dɛtɛmp kɔ dɛtɛmp akɔ ŋaleləs ki mɔ.

⁵¹Kəmentər fənɔntər fa kəca kɔn: kɔ kəsaməsər afum akɔ ŋanabɛk bəkəc mɔ;

⁵²kɔ kəŋgbal abɛ apɔŋ dɛbɛ daŋan kɔ kəŋcəmbər afəfər kiriŋ.

⁵³Kɔ kəsɔŋɛ kənɛmbərɛ pətɔt aŋɛ dor dɛnayɔ mɔ; kɔ kəmbɛləs akɔ ŋanayɔ daka mɔ waca wɔsɔkər.

⁵⁴Kɔ kənder kədemar aka Yisrayel, amarəs ɔn: kəmpələrnɛ fɛ kəmentər dobotu amera dɔn

⁵⁵a Abraham kɔ yuruya yɔn ta doru o doru —pəmɔ tɔkɔ ɛnaloku ti atem asu mɔ.»

⁵⁶Kɔ Mari ŋayi kɔ Elisabɛt haŋ yof maas, k’olukus nde ndɔrɔn.

⁵⁷Kɔ tɛm tɛmbəp ntɛ pənamar Elisabɛt pəkom mɔ, k’oŋkom wan wərkun.