Luk 17:20-35

²⁰A ramano kum Parisi det ting o Iesu lena, “Nangisin a matanitu anun o God in nanpat?” Ra i balu det lena, “A matanitu anun o God ken nanpat nama kum ukinalong ra din tama i.

²¹Ma ka din watungi lena, ‘Iri mi!’ o, ‘I mo ra i!’ Uni a matanitu anun o God kura ut un mot.”

²²O Iesu i watungi tan anun a kum nat na ususer lena, “A du bung in nanpat ra mot in nemi sur mot in tama tar a bung tagun a kum bung anun a Nutun a Musano, ikut ka mot in tama i.

²³Lako taro det in watungi tamot lena, ‘Tama i, i mo ra i!’ o, ‘Kuri i nin!’ Gong mot mur tar det.

²⁴Uni una bung ra a Nutun a Musano in nan pat, a taro rop det in tama i. In elar namin nememe, ra i meme i tagitong un ara papor maino, tuk un ara papor kai.

²⁵Ikut a Nutun a Musano in taramo mugu a susut na ngunungut, ma a taro tagun uniri det in rosumur gusuni.

²⁶“A kum bung anun a Nutun a Musano in elar nama kum bung anun o Noa.

²⁷A taro det wangon, det inum, ma det unolin det, tuk una bung ra o Noa i kas una sip, ra in nabato i puku ma in nolomom i wanpat ma det iru rop.

²⁸Lenkutkai ra una kum bung anun o Lot. A taro det wangon, ma det inum, det kukul, ma det siuru, det marut utna, ma det pam rumu.

²⁹Ikut una bung ra o Lot i wan gusun a tamon Sodom, a sungun ma a salfa i puku tagisapat una bakut elar namin nabato, ra det rop det iru uni.

³⁰“In lenkutkai ra una bung ra a Nutun a Musano in nanpat puaso uni.

³¹Una bung ra, ra taio in kis sapat netes una nun a rumu, gong i pirso sur in los pas anun a kum ututna tagisa urumu. Lenkutkai, ra taio in kis sa ukinobot, gong i milet melet unago utamon sur tu utna.

³²Mot in nuk pas a ino anun o Lot.

³³Osi ra i nem doko i sur in maris bat anun a nilaun, in iru. Ikut osi ra ke maris bat anun a nilaun, in laun.

³⁴A watungi tamot, una bung na mirum ra, ra lako ru der in inep un ara bat, din los pas tu pasander kut, ma ara pasander awu.

³⁵Ra lako ru ino kai der in papam tomo u gino a wit sur in nanpat a palawa, din los pas tu pasander kut, ma ara pasander awu.”