Lukas 17:20-35

²⁰Muri e huriki a Pariseo ri nanea e Isu na harikianga na Vure, garika ge valai. Lakea e Isu i koli, i ta maea, “Na tahuna a harikianga na Vure ge valai, i uka ma ge valai turana nivakasiri mu gu matai na matane mua.

²¹I uka tara viri ge taki i bele pali koea o i bele pali lake, a vuhuna a harikianga na Vure i bele pali ne mua.”

²²Muri i taki e huriki a murimuri vona i ta maea, “Muri a parava bara i valai, bara mu ngaru hateka ni masia a Tuna Bakovi ge hamule valai. Bara mu ngaru ni matai popotea, pali i uka ma mu gu masia.

²³E huriki a bakovi bara ri taki mua, ri ta maea, ‘Mu mata lakea, i made lake,’ o ‘Mu mata valai, i made koea.’ Naha ni vano. Naha ni nunu muri mai ria.

²⁴Na tahuna a vila i maravila na hunu, i vakapalala a hunu lobo, mu masia. I mavonga kunana na tahuna a Tuna Bakovi i hamule valai, bara mu matakilalea.

²⁵Pali muga e huriki lobo mona bara ri tepua, bara i bole a nimadihi i kupo.

²⁶“A parava na Tuna Bakovi ge manga kunana a parava ne Noa.

²⁷Hosi, na tahuna e Noa i hae a agarungu vona, e huriki ri kani, ri ninu, ri vaparangi, i vano i harena na tahuna e Noa i rike na agarungu. I valai a marungu lolo i ratapile ria lobo.

²⁸“I mavonga kunana hosi ne Lot. E huriki ri kani, ri ninu, ri vakona, ri vahabi a maki, ri varo a maki, ri hae a ruma.

²⁹Pali na tahuna e Lot i ha taroa e Sodoma, i boru valai meli na hunu a kanono a bega i ratapile ria lobo.

³⁰“Bara i mavonga kunana na tahuna a Tuna Bakovi ge hamule valai.

³¹Na parava iea, a viri tara i pesi na mapana ruma, nahea ge hamule puru tabu ge dili na ruma ge bole a maki vona. Ge ha kunana. I mavonga kunana a viri i leho na hania, nahea ge hamule lakea na ruma ge bole a maki vona.

³²Mu luhoia e girihine Lot!

³³A viri i ngaru ni korimule a kakaina bara i mate. Pali a viri i habi a kakaina bara i mahuri vakaroro.

³⁴“A taki mua, na rodo iea, a viri ala rua ru mahita na kiri taku; bara ni bole tara, ni pe mule tara.

³⁵A ngatavine ala rua ru rata a maki ni kani. Bara ni bole tara, ni pe mule tara.