Luk 10:13-32

¹³“In laulau torom mot a taro Korasin, ma in laulau kai torom mot a taro Betsaida. Ra gunuk di sa pam tar a kum utna na ukisin ri torom a taro Tair ma o Saidon, elar nami ra a sa pam tari torom mot, kanapi det in nukpukus lakit ma det in tobo, det in emar nama kum malu na tupunuk ma det in talus a pinindet nama kubus na sungun. Ikut mot, ka mot nukpukus.

¹⁴A warkurai torom mot a taro Korasin ma o Betsaida, in laulau doko taun a warkurai torom a taro Tair ma o Saidon.

¹⁵Ma mot kai a taro Kapernaum, pepetlai, mot nuki lena din ulabo pas mot usapat netes? Awu, din woro pirso ru mot kut una labino sungun.

¹⁶“Osi ra in longoro mot, i longoro iau ut. Ma osi ra in rosumur gusun mot, i rosumur gusun iau utkai. Ma osi ra i rosumur gusun iau, i rosumur utkai gusun o naro ra i tulu ru iau urin.”

¹⁷A wonom mawit na noino ma aru det milet melet nama gasgas ma det watungi lena, “Labino, ra met lakro ru a kum laulau na nion nama risam, det pirso kut.”

¹⁸O Iesu i watungi tandet lena, “A tama o Satan i puku tagisapat una langit elar namin nememe.

¹⁹Tama i, a sa pitar tar a dekdek tamot sur mot in pas watwat a kum sui ma a kum bukalo kai, ma sur mot in winim pas a dekdekin a ebar, ma katu utna in ban laulau mot.

²⁰Ikut, gong mot gas, uni a kum laulau na nion det mur anumot a wasiso. Mot in gas, uni di sa tumus tar a risamot sapat una langit.”

²¹Una du bung ra, o Iesu i bukus nama gasgas tan a Tokodos na Nion ma i watungi lena, “Tita, ui a Labino tagun a langit ma a rakrakon bual rop. A watung ulabo pas ui, uni u munu a kum utna ri tan a kum tene mananos ma det ra det tastasman, ma u upuaso i kut, torom det ra det elar nama kum nat liklik. A lingmulus, Tita, uni anum a nemnem i lenutra.

²²“O Tita i sa pitar tar a kum utna rop torom iau. Katutaio i tasman o Nutunu, o Tamano kut i tasmani, ma kataio kai i tasman o Tamano, o Nutunu kut i tasmani, ma det kai ra o Nutunu i nemi sur in upuaso o Tamano torom det.”

²³Ra o Iesu ma anun a kum nat na ususer mukut det kis, i tupukus torom det ra i watungi lena, “Mot dan ra mot tama a kum ututna ri!

²⁴A inanos mot, numugu a susut na poropet ma a susut na king det nem doko i sur det in tama a kum utna ri a pami umatamot, ikut ka det tama i. Ma det nem doko i kai sur det in longoro a kum utna ri mot longoro i, ikut ka det longoro i.”

²⁵Ara tene mananos tagun a Warkurai i katutur ra i lar o Iesu, ra i tingi lena, “Tene Ususer, asau ra an pami sur an rakon a nilaun tukum?”

²⁶Ra o Iesu i balu i lena, “Asau ra di sa tumus tari una Warkurai? Asau u nuki uni?”

²⁷I balu i lena, “‘Un nem a Labino anum a God namin balam rop, a niom rop, a dekdekim rop, ma a nuknukim rop.’ Ma ‘Un nem o pasam elar nami ra u nem ui ut.’”

²⁸O Iesu i watungi tano lena, “I tokodos ut anum a minabalu, un pami ut lenra, ra un laun.”

²⁹Ikut a tene ususer tagun a Warkurai i nemi sur in ukodos pasi umatan o Iesu, ra i tingi lena, “Osi ra a pasang?”

³⁰O Iesu i balu i lenri, “Ara musano i wan tagisapat o Jerusalem utong o Jeriko. Ra i wan nanan, a kum tene wolong det kalabor bat pasi. Det palos ru anun a kum malu, ma det um laulau tari, ra det wan pas gusuni ma milau mo sur in mat.

³¹Ara tene etabor torom o God i wan una kisapi ra, i tama pas a musano ra, ra i wan lilias kut gusuni una ara papor.

³²Lenkutkai, ara musano bulung tagun a kabotaro Liwai, i wan taru una musano ra, ra i wan lilias kut gusuni una ara papor kisapi.