Ruk 10:13-32

¹³Jisas oh Korasin apteio Betsaida apteio gur Got ohe heisup nahat napapat ohe da ohsi batbet isip ma napripra oh gur hinhinsi han baprano. Gurnong na wandeipti da namgipat orhor gur Nuranure er da moh na mandama orhorsi hat patepera dahat ma pati oh ermuro. Gurnong ma namgipat da moh rih Taia apteio Saidon apteio ihirnonghe pinggisuhneng ihir Nure er hat pati da moh gin mandatpera daham saheih ham simbap ariyao sirap ariyao hapti mandatpanengmur.

¹⁴Ihtin ohoh ihan Got oh Taia apteisi Saidon aptei ihitnong ma heisup mat papat ohe batbet ma apripra oh isip orhor ama batbet oh garpok batbet apripramur. Gin namgitperhan am hat patim ma ihapti aptei gurnong oh batbet oh isipnap nahatipramur.

¹⁵Kapaneam aptei ma pati bap gurhe Nuhur yah hat pati ohoh ihan Got oh nambura nure win nadaptuhur aw teinong nahatipramur dahaptida. Basra. Gur er hat pati bapo rim kurwam ohe ga teinong tapan nadutipramur pongopri.

¹⁶Giporpat orhe han ihirnong Gur susa meng oh ihirnong potperhan gure meng amram dindeiyahanoh oh nohe mengnong amram dinahaptimur. Gure meng na amram kom nasariyahanoh oh nohnongsi; nohnong ma nadarhetip han nuhutnong tap mat kom nasariptimur pongopri.

¹⁷Gahan Jisas orhe 72 han ma darhetir han ihir meng pot pisaptidapat amam isip tit hat it apingopari. Aprisa Hanipyaha. Nure gorhe kasip ohsi ma imat pihiri oh be sik hat pati han ihirnongwi na pomtirimur. Mongsup ihirnongsi Nuhur Jisas orhe kasip ohsi gin mongsup gur maras sona naporiyamur potperhan ihir maras sayao mat pihirimur pongopari.

¹⁸Potperhan Jisas oh gur indeiptin noh wandeioh Satan oh aw teidapat kakdahnong moh wandangwermur.

¹⁹Gur nohe kasip ma napir mengnong moh amratinmur. Noh gurnong inapawamo tohaho mahaw nahaya hano ihirnong tonggamar ambapte matin ohe kasip ohsi nahat napapatmur. Ihtin kasipsi nahat napapat ohoh ihan gure boknong er nahatin oh timbasmur.

²⁰Ihtin kasipsi nahatporhan gur Nuhur ama ohe kasip ohsi mongsup ihirnong maras sona potperhan nure meng amram maras saptihe daham ama ohe danong ham amam hapri. Nure win oh Got oh aw tei mahat brak mar nat patwa daham ama ohe danong amam ham patenmur pongopri.

²¹Jisas oh ameng oh pot manda tei Got orhe Yahsup oh amam da apriporhan amam hangopri. Amam hapat itap ohnong Nohe ata. Aw tano mong tano gonsi ma pat han oh gorhorwi Hanipyahnap hat patmur. Ihat pat han go gorhe da oh hanip ihir noh dakuu amsi hanmur ma dahapti han ihirnong na pinggima aremama brer ire da hatin hat sus Noh dakuu hat indin ohe da oh timbas hat patwa ma dahat pati han ihirnong asoh pinggipatmur. Go ihat pati han ihirnong gorhe da oh pinggipato rim noh gonong weso napor amam nahapatmur. Ma ihpat oh at gorhe damdapat orhor ihtipora daham ihpatmur pongopri.

²²Pora kuuhan ihirnong At oh erer oh gonsi norhe bes teinongwi namat pat ohoh ihan norhor pokwi am hat patmur. Orhe brer nohnong pomat am hatin ohe da oh gur gonsi nohnong pomat na dahat patimur. At orhor pokwi am hat patmur. At ohnong am hatin ohe dahe gur gonsi hanhan hat patimur. Mon norhorsi; norhe ma namgipat han gursi dir pokwi at ohnong am hat patimur pongopri.

²³Giporpat bos tamburkera orhe pinggit pisapat han ihirnongwi Gurnong oh nohe ma namgipat da oh wamar am hapti ohoh ihan amamsi hat pati bap gurmur.

²⁴Gure amramo wamaro ma hapti da moh rih oh propet bapo mong ohe kakhan hat pateshe han bapo ihir gure ma wandeipti da oh Nuhurhe wandeiptineng dahashemur. Gure ma amrapti meng oh Nuhurhe ihtin meng amraptineng dahashemur. Ihat dahashe orhor ihir mihtin danong wandeiyao mihtin meng amrayao ti na hashemur. Gur wandeiyao amrayao hat pati ohoh ihan gur amamsi hat pati han bap gurmur pongopri.

²⁵Gahan Jisas oh meng am deipatin pohon sawa mengnong amnap hat pat han tit tandeima Jisas ohe mengnong adason matporim ohnong Tisa. Noh kinhahrit dipwi yah hat paten ohe da oh datiproh por dahandeingopri.

²⁶Por dahamtiporhan Jisas oh Got ohe ritporhan Moses ohe ma natip sawa meng oh de meng oh go sama Mama mengnong moh noh dimat ahanoh noh eimat paten dasi hatipra ma hapat dahapat pongopri.

²⁷Potporhan oh Noh mama ohe brak matip mengnong mohwi sam dahapatmur. Tit oh Guragure Hanipyah Got ohnong bopor mat papten oh da muhutdapat orhor orhornongwi bopor mat paptenmur. Dahe orhornongwi dahat patenmur. Kasiphe orhornongwi kasip hat patenmur. Amaru hat orhorwi bopor mat paptenmur ritporhan ma brak matip ohe meng ohmur. Tit oh Guragure Noh ihat yah hat inpora daham gorhe boknong ma yah hat dahapatru hat orhor arwananah ihirnong asohhe imat orhor da apris bopor mat paptenmur ritporhan ma brak matip meng ohmur. Ama yot mengnong oh noh dahapatmur pongopri.

²⁸Potporhan Jisas oh Dawa go arpin kis dei meng rimur. Go ama yot mengnong oh dimat ahanoh go eimat paten dasi ham patepramur pongopri.

²⁹Potporhan oh Amrat pati han maihir nohnong Go dahat pat meng orhor ohnong kianorim ohnong dahandeipat napotipri dahapat it Jisas ohnong Noh arwananah ihirnong bopor mat papindin oh de ihirnong bopor mat ha papindinoh dahapat por dahandeingopri.

³⁰Por dahamtiporhan Jisas oh Noh mama paham meng moh napotporhan go ama han ihirnong imat papindinmur napotip ma hapat dahatinmur. Paham meng oh mamaru hat patmur. Tit han tit Jerusarem ap mutuh oh patesuhri. Patdapat gahan Gin noh Jeriko apteinong waporo rim waihipri. Wapatin mandap oh gapah han bap ihir aprisa ohe erer oh adatinmat kawsi sutperhan oh haputin ina hat patin ohoh erer oh sa adar pipari.

³¹Saperhan oh haputin ina hat mandap tei oh patin Got orhe ap yawar hanat bok han ihir tit han ama mandap kup apingopri. Aprisa hanipnong wamara na panggeim kom asar mandap manggap pe puh amdapat sangopri.

³²Saporhan Ripai bap Got ohe ap yawar atamreipti han bap ihir tit han apingopri. Aprisa wandeipat na panggeim kom asara mandap manggap pe puh amdapat sangopri.