Lucas 1:54-72

⁵⁴Shji Israel tjëyoga ber l̈öng ba parkaga. Shji kjimtara. Shji songe l̈e ĩyado.

⁵⁵L̈ara eni jl̈õkoyo bi pjeyoga tek dënashko so kong, Abraham kong bako, ga shäryara eni» l̈e.

⁵⁶Ga María beno sök Elisabet tjok ba ushko mogl̈o mya dik. E irgo ga tek shrono shäng iröng obi ba ushko.

⁵⁷Elisabet dbaryo öötongshko ga wa buk kjl̈ara domer.

⁵⁸Eshko ga ba mekë beno wopjl̈úe. Roy kura nopga tjeng ba zl̈ong bäng l̈i, ba pjeyogarë, ga beno l̈öng wopjl̈ú ba tjok eshko bakoe. Miydara l̈ok ga l̇l̇ëbo shäryara Tjl̈apgarë pjl̈ú ba kong.

⁵⁹Öötong dbargwo kjwongshko (8) ga chida l̈i söra l̈ok, doyo jyã te wl̈o. «Koiëy Zacarías, ba data l̈i ko» l̈ara nopga l̈öng l̈irë,

⁶⁰gueniyo ga ba mekë tjl̈ẽ ga «Eni l̇l̇ëme. E ko Juan» l̈e.

⁶¹Kuya l̈ok ga tjl̈ẽ ba kong ga «¿Eni ega? Pja pjeyo ko eni drete» l̈e.

⁶²Ga tjl̈ẽno l̈ok chida data l̈i kong or goshko, koie ber l̇l̇ë miyde l̈ok wl̈o.

⁶³Eshko ga ba data kjorkwang rokono kjwangna, l̇l̇ëbo jyã të e go wl̈o. Twara l̈ok ba kong ga jyã tara ga «E ko ber Juan» l̈e. Ĩya nopga uunkong l̈irë ga beno l̈öng yëy l̈e erä.

⁶⁴Jekdo eshko ga chida data l̈i tjl̈ẽno jek obi, ga Sbö poshrëra arae.

⁶⁵Kuya l̈ok ga yëy l̈e uunkong l̈irë. Ga l̇l̇ëbo shäryono l̈i, e l̈anyotkëba ara Judea kjokyo dl̈up shwo l̈ëkong kjwang jĩkong.

⁶⁶Kuya nopga l̈öng eshko l̈irë ga beno l̈öng wotjl̈ĩk ara uunkong. Tjl̈ẽ ëng kong ga «Jl̈õkoyo ga Tjl̈apga shäng chida l̈i tjok. ¿E kjĩshko ga e ber l̇l̇ë shäryë?» l̈e l̈ok eni.

⁶⁷Eshko ga Zacarías go Sbö Sëya shrono beno kësbang ba tjok, ga tjl̈õkwo l̈ara Sbö Sëyarë ba kong. Kuya ga l̈ara jekdo eshko obi. Tjl̈ẽ ga

⁶⁸«Tjl̈apga, e poshrëy ara. Shji Israel tjëyo Sbö l̈i e. E shrono, shji kjimte wl̈o, shji döya wl̈o bakoe. Bi döga ichara kjl̈ara bi kong, e kësbang, e ba parkaga tek dënashko so David l̈i tjëyo. E poshrëy träk l̇l̇ëm e kjĩshko.

⁷⁰Tek dënashko ga tjl̈õkwo twara beno bi kong, l̈ak ba tjl̈õkwo l̈agagarë drete. Tak pjang eni:

⁷¹“Tja tjwe ber bomi döga, bomi wl̈oyoga wl̈oshko dwayo, bomi woydaga l̇l̇ëm l̈i wl̈oshko dwayo bakoe.

⁷²Pjãy songe l̈ër ĩyado. Bor tjl̈õkwo tworor bomi kong beno ĩyado wl̈o l̈i woyojer l̇l̇ëme.”