LOS HECHOS 4:23-34

²³Nu loꞌo nda nguꞌ cusuꞌ chacuayáꞌ chaꞌ tyaa nguꞌ laja ti, liꞌ hora ti nduꞌu nguꞌ ndyaa nguꞌ ca slo nu nguꞌ tyaꞌa ndyaꞌa̱ nguꞌ. Nda Pedro loꞌo Juan chaꞌ loꞌo lcaa tyaꞌa nguꞌ, lcaa ñaꞌa̱ chaꞌ nu nchcuiꞌ sti joꞌó, lcaa ñaꞌa̱ chaꞌ nu nda nguꞌ cusuꞌ biꞌ loꞌo nguꞌ.

²⁴Loꞌo cua ndyuna tyaꞌa nguꞌ chaꞌ biꞌ, stuꞌba ti nchcuiꞌ lcaa nguꞌ loꞌo ycuiꞌ Ndyosi liꞌ: ―Ndyosi Sti ya ―nacui̱ nguꞌ―, nuꞌu̱ laca nu Xuꞌna ya, nuꞌu̱ laca nu laca loo la ―nacui̱ nguꞌ―. Cua ngüiñá nuꞌu̱ lcaa chalyuu, loꞌo lcaa nde cua̱, loꞌo lcaa tyujoꞌo; cua ngüiñá nuꞌu̱ lcaa na nu ntsuꞌu chalyuu ―nacui̱ nguꞌ―.

²⁵Nda nuꞌu̱ Xtyiꞌi ycuiꞌ nuꞌu̱ jiꞌi̱ David jyoꞌo cusuꞌ jiꞌi̱ ya, nu loꞌo nguscua yu chaꞌ cuentya jinuꞌu̱ lo quityi. Ndiꞌya̱ nscua chaꞌ lo quityi biꞌ: ¿Ni chaꞌ laca tyaala tsa nguꞌ xaꞌ loyuu? Nclyacua tsa tiꞌ nguꞌ biꞌ, chaꞌ cuaꞌni cuxi nguꞌ; pana ná nchca jiꞌi̱ nguꞌ cuaꞌni nguꞌ chaꞌ cuxi biꞌ.

²⁶Cua ndyuꞌu tiꞌi̱ lcaa nu laca xuꞌna chalyuu re loꞌo nu laca loo jiꞌi̱ lcaa quichi̱, chaꞌ cuaꞌni cuxi nguꞌ loꞌo ycuiꞌ Ndyosi nu Xuꞌna na, juaꞌa̱ loꞌo Cristo nu ngusubi ycuiꞌ Ndyosi jiꞌi̱.

²⁷’Ñiꞌya̱ nu cua nchcuiꞌ quityi jinuꞌu̱ nu nguscua jyoꞌo David saꞌni la biꞌ ―nacui̱ nguꞌ jiꞌi̱ ycuiꞌ Ndyosi Sti na―, juaꞌa̱ cua ndyuꞌu tiꞌi̱ nguꞌ nu laca loo jiꞌi̱ quichi̱ re chaꞌ cuaꞌni cuxi nguꞌ loꞌo Jesús Sñiꞌ ycuiꞌ nuꞌu̱, masi xcuiꞌ lubii tsiyaꞌ ti cresiya jiꞌi̱ nu Jesús biꞌ; la cuiꞌ yu laca nu ngusubi nuꞌu̱ jiꞌi̱ ―nacui̱ nguꞌ―. Ndyuꞌu tiꞌi̱ Herodes loꞌo Poncio Pilato, loꞌo nguꞌ xaꞌ loyuu, loꞌo nguꞌ tyaꞌa ya nde loyuu re. Liꞌ nguaꞌni nguꞌ lcaa cña nu nda nuꞌu̱ chacuayáꞌ jiꞌi̱ nguꞌ biꞌ chaꞌ cuaꞌni nguꞌ; ñiꞌya̱ nu nda nuꞌu̱ chaꞌ loꞌo nguꞌ saꞌni, la cuiꞌ juaꞌa̱ ngua chaꞌ yija̱ re ―nacui̱ nguꞌ jiꞌi̱ ycuiꞌ Ndyosi―.

²⁹Xuꞌna ya, ñaꞌa̱ nuꞌu̱ ca nde juani chaꞌ tyaala tsa nguꞌ ñaꞌa̱ nguꞌ jiꞌi̱ ya. Ntiꞌ ya cuaꞌni ya cña nu ngulo nuꞌu̱ jiꞌi̱ ya, biꞌ chaꞌ xtyucua nuꞌu̱ jiꞌi̱ ya juani chaꞌ caja juersa jiꞌi̱ ya, chaꞌ ná cutsi̱i̱ ya nu loꞌo ta ya chaꞌ jinuꞌu̱ loꞌo ñati̱ re ―nacui̱ nguꞌ―.

³⁰Ta nuꞌu̱ chacuayáꞌ chaꞌ tyaca tsoꞌo nguꞌ quicha; cuaꞌni Jesús Sñiꞌ nuꞌu̱ nu xcuiꞌ lubii cresiya jiꞌi̱ quiñaꞌa̱ tsa cña tonu, chaꞌ juaꞌa̱ cube tsa tiꞌ nguꞌ jinuꞌu̱. Tsa lo cua ti chaꞌ chcuiꞌ ya juani.

³¹Loꞌo cua ndye chaꞌ nchcuiꞌ nguꞌ loꞌo ycuiꞌ Ndyosi, liꞌ ngüiña niꞌi̱ su ngaꞌa̱ nguꞌ biꞌ. La cuiꞌ hora jlo tiꞌ nguꞌ chaꞌ chañi chaꞌ ndyanu Xtyiꞌi ycuiꞌ Ndyosi neꞌ cresiya jiꞌi̱ lcaa nguꞌ biꞌ liꞌ, biꞌ chaꞌ ngaꞌaa ndyutsi̱i̱ nguꞌ loꞌo nda nguꞌ chaꞌ jiꞌi̱ ycuiꞌ Ndyosi loꞌo xaꞌ ñati̱.

³²Seꞌi̱ ti ndiꞌi̱ lcaa nguꞌ nu ngusñi chaꞌ jiꞌi̱ Jesucristo, stuꞌba tsa nduꞌni lcaa nguꞌ biꞌ loꞌo tyaꞌa nguꞌ, sca ti chaꞌ ntsuꞌu tyiquee lcaa nguꞌ. Nda nguꞌ lcaa na nu ntsuꞌu jiꞌi̱ nguꞌ chaꞌ xtyucua jiꞌi̱ lcaa nguꞌ loꞌo tyaꞌa nguꞌ.

³³Loꞌo nu nguꞌ nu ngua tsaꞌa̱ jiꞌi̱ Jesucristo tya clyo ni, tlyu tsa tyiquee nguꞌ nchcuiꞌ nguꞌ loꞌo xaꞌ ñati̱ chaꞌ cua naꞌa̱ ycuiꞌ ca nguꞌ jiꞌi̱ Jesús nu Xuꞌna na loꞌo cua ndyuꞌú yu chaca quiyaꞌ, nu loꞌo ngujuii yu. Loꞌo juaꞌa̱ nguxtyucua ycuiꞌ Ni jiꞌi̱ lcaa nguꞌ biꞌ, chaꞌ tsoꞌo ti cuaꞌni nguꞌ loꞌo lcaa ñati̱.

³⁴Tsoꞌo tsa tyiquee lcaa nguꞌ nu ntsuꞌu chaꞌ jiꞌi̱ loꞌo Jesucristo, biꞌ chaꞌ ni sca tyaꞌa nguꞌ ngaꞌaa ntsuꞌu na nu lyiji jiꞌi̱ nguꞌ, chaꞌ lcaa nguꞌ nu ntsuꞌu niꞌi̱ jiꞌi̱, lcaa nu ntsuꞌu xi yuu jiꞌi̱, ndyujuiꞌ nguꞌ na biꞌ, chaꞌ caja ñiꞌya̱ tyiji̱ yuꞌú jiꞌi̱ nguꞌ loꞌo tyaꞌa nguꞌ.