Lomu 10:5-14

⁵Holiyafe? Lo molaibo ha meyalo molado ya monatina fefe libo wenina minae, loto lo betinaibo mona yagunu Mosesekafo feto loto lufuwa ibo, Lo molaibo ha ononawa linabo wenina ya hawa muki meyalo molanabo yako nomudina hofawa minanae, loto ha mono lufuwau (Wkp 18:5) ya nebo ne.

⁶Feto loto nebo nefa, ido holi hikitabo yagunu ya monatina fefe libo wenina minae, loto lo betibo mona yagunu feto libo, Hemotina hema ya okulumau yonaibo ne? loti lutina-hatinau holiyámilo, loto ha mono lufuwau (Lo 30:12) nebo ha, ya yoto Kilisto ilimito lumunune, loti lutina-hatinau holiyámilo, loto libo ne.

⁷Ido, Hema ya no-lowa feumau ya lumunaibo ne? loti yagi lutina-hatinau holiyámilo, loto ha mono lufuwau (Lo 30:13) nebo ha, ya lumuto Kilisto fuliguti li sinoi edoto ilimito yonune, loti yagi lutina-hatinau holiyámilo, loto libo ne.

⁸Aya ha ya neidafaiye liye? Hawa ukuwa ya moda hemotinaloka selo moloto minoto, ya lutinau wetinau moda mino betima ne, loto ha mono lufuwau (Lo 30:14) nebo ha, ya hawa ukuwa holi hikitanae, loto lo oloto molo-molo onibo ha ya ne.

⁹Moda holiyafe? Hemo ya Yesu ya Wenaba ne, loto wekagunu lo oloto molananibo, ido Gotikafo fuliguti li sinoi edaibo ne, loto luka-hakau holi hikitananibo, ya li nomuga wanaibo ne.

¹⁰Holi minafe? Lutekafo holi hikitanubo ya Gotikafo monatina fefe libo wenina minae, loto lo ledanogolaiye. Ido wetekafo lo oloto molanubo ya li nomude wanaibo ne.

¹¹Aya yagunu ya feto libo, Emotina holi hikito muwabo wenina muki ya utinalo holiyámanigilae, loto ha mono lufuwau (Ais 28:16) ya nebo ne.

¹²Feito ya Yuda wenina, Giliki wenina, eito feka wenina li eito-eito itanaibo ma minámiye. E'e, Wenaba mako ya muki Wenabate nenako, emokafo wenina muki sula finabo ya li dowa lo betimo yonogolaiye.

¹³Aya yagunu ya feto libo, Wenaba huliyalo sula finabo wenina muki ya li nomudina wanaibo ne, loto ha mono lufuwau (Jol 2:32) ya nebo ne.

¹⁴Feito neboma nenako, yagunu masi holi hikito umámabo wenina ya igaidana oti sula finabo ne? Ido hala ukuwa holiyámabo wenina ya igaidana oti holi hikito munabo ne? Ido hawa ukuwa lo oloto molanaibo we ma minámanaibo ya igaidana oti holinabo ne?