ROM 10:5-14

⁵Moses-ni sirim ung-manima piliiku liiku tingí yambuma Pulu Yili-ni ‘yambu sumbi-nílima’ nimba kanomba mele Moses-ni bukna topa kene nimba mele: “Ung-manima ⸤pali⸥ piliiku konjuku kene sumbi-siku tingí yambuma aku tingéliinga molku konjuku mindi pungí.” nirim.

⁶Akiliinga-pe ‘⸤Yesos Krais⸥ sika ⸤nanga nimba tinjirim⸥.’ niku tondulu munduku piliilimiláliinga Pulu Yili-ni ‘yambu sumbi-nílima.’ nimba kanombaliinga ung te i-sipa molemú: “Eni-enini numanale-ni piliikuliinga, ‘Nae-ni (‘Krais mana-mania liipu membu wambu.’ nimba) mulú-koleana ola pumbaye?’ ni naa niai.” nimba ung te aku-sipa molemú.

⁷Mola i-siku ningí: “‘Nae-ni (Krais alsupa kululi koleana wendu liipa memba ombándu) yambu kulúlima pulimelé koleana mania pumbaye?’ ni naa niai.” nimba molemú.

⁸⸤Aku-sipa ungele kapula mólu. Pulu Yili-ni yambu sumbi-nílima nimba kanolemáliinga⸥ ungele nambulka nimba molemúye? I-sipa nilimú: “Ungele eni-kene nondupa molemú. Eninga kerina molupa numanuna pelemú.” nilimú. Ung nirim akili ‘⸤Yi-Nuim Kraisele⸥ sika ⸤oliunga tepa liili yili⸥.’ nimbu tondulu mundupu piliilimulu ungele oliu-ni andupu nimbu silimulu ung kanili. Akili i-sipa mele:

⁹Eni sumbi-siku “Yesos yu ⸤nanga⸥ Auliele.” niku siku, eninga numanuna ‘Yu kulurum kene Pulu Yili-ni yu ónu-koleana topa makinjirim.’ niku tondulu munduku piliingí kene Pulu Yili-ni tepa liipa eni mindili nolkemela kupulanum-na wendu liipa, yu-kene wasie molku kunjingí kupulanum-na liipa monjumba.

¹⁰Numanale-ni ⸤‘Yesos sika nanga nimba kulunjurum kene Pulu Yili-ni sika yu topa makinjirim. Yu nanga Auliele.’ niku⸥ tondulu munduku piliilimili yambuma aku-siku piliilimiláliinga Pulu Yili-ni eni kanupa kene, eninga ulu-pulu-kísima mundupa kelepa eni ‘yambu sumbi-nílima.’ nimba we kanolemú. Numanale-ni niku piliilimili mele ‘Yambuma piliangi.’ niku kerale-ni niku silimeláliinga Pulu Yili-ni eni tepa liipa mindili nolkemela kupulanum-na wendu liipa yu-kene molku kunjingí kupulanum-na liipa monjulemú.

¹¹Aku-sipa ung te Pulu Yili-nga bukna molemú, akili i-sipa mele: ‘ ‘Yu sika ⸤tepa liimba⸥.’ niku tondulu munduku piliilimili yambuma-ni ⸤yu-ni sika tepa liimbaliinga⸥ pe ‘Yu gólu tokum.’ niku numanu kis panjingí kupulanum te naa lemba.’ nilimú.

¹²Bukna ‘tondulu munduku piliilimili yambuma’ nilimú akili Juda-yambumandu mindi naa nilimú. Juda-yambuma naa molemele yambu-lupamandu kepe pali nilimú. Yi-auli tiluele oliunga pali Yi-Auliele akiliinga oliu pali tilu-sipa nokulemú. Auliele yu walsiku ‘Na liiku tapunjui.’ niku mawa telemele yambuma pali lakupa tepa konjulimú.

¹³“Auliele bi leku walsiku ⸤‘Tekunu lii.’ niku⸥ mawa telemele yambuma pali yu sika tepa liipa mindili nolkemela kupulanum-na wendu liipa yu-kene wasie molku kunjingí kupulanum-na liipa monjumba.” akiliinga oliu pali tilu-sipa nokulemú.

¹⁴Aku lem ‘Yu sika. ⸤Yunu-ni sika tepa liipa mindili nolkemela kupulanum-na wendu liimba.⸥’ niku tondulu munduku naa piliikuliinga “Tekunu lii.” niku nambi-siku yu walsingíye? Yu-ni eninga nimba tinjirim, yu molemú mele temanele naa piliiku kene ‘Yunu-ni tepa liimba.’ niku nambi-siku tondulu munduku piliingíye? Yambu te-ni yu-ni eninga nimba tinjirim, yu molemú mele nimba naa simba kene enini nambi-siku piliingíye?