Rom 10:5-14

⁵A ta mavonga, a vuhuna e Moses i here hosi, e rei a viri i ramai lobo a vinara, a Vure bara i takia a bakovi malamala, i habi a nimahuri vakaroro vona.

⁶Pali e Moses i here tabu na naro ni luhoi torea a Vure, si gi malamala, i here maea, “Naha ni luhoi maea, ‘E rei ge sike na hunu?’” I manga i maea, e rei ge sike, ge tuli purua e Kristo?

⁷“Naha ni luhoi tabu maea, ‘E rei a viri ge puru na lovo i marangeo?’” (I manga i maea, e rei a viri ge puru ge bole rike vilia e Kristo na tanga ne huriki ri mate pali?)

⁸Pali e Moses i ta maea tabu, “A nitana Vure i tabuli tabukoi vomu. I tabuli na ngavamu, i tabuli na hatemu.” A nita iea, a nitana ngava si gi luhoi torea e Kristo. Si taki tala vakaroro a ngava iea.

⁹I mavonga, na ngavamu o taki tala ne Isu ia a Bakovi Dagi vomu. Na hatemu, o luhoi torea a Vure i vakamahuri mulea na matenga, lakea a Vure bara i korimule ioe.

¹⁰E huriki ri luhoi torea e Isu na hatene ria, a Vure bara i taki ria ri malamala. E huriki ri ta tala na ngavane ria, ne Isu ia a Bakovi Dagi, a Vure bara i korimule ria.

¹¹Ni here na Hinere, i maea, “E huriki ri luhoi tora ia, i uka ma ri gi maruhu.”

¹²E huriki a Iuda, e huriki i uka ma ria a Iuda, ri palupulupu kunana. E Bakovi Dagi, a Bakovi Dagi ne huriki lobo. I hate balala, i kori kamumu e huriki ri gale lakea vona.

¹³Ni here, i maea, “E Bakovi Dagi ge korimule e huriki lobo ri gale lakea vona.”

¹⁴Pali, ri gi gale navai a viri i uka ma ri luhoi tora ia ma? Pali ri gi luhoi tora navia a viri i uka ma ri longo ma a rana? Pali ri gi longo navai, i uka viri ge tovo ria?