Roma 10:5-14

⁵Mosengo dedeseriyoacac sing dindingac kekec imocac yofi ohoec fede, “Ngic mong ye dedeseriyoac modacdarude, yeng sing imohai kekehagoc amma kefude.”

⁶Nga Anutungo negen negensinninaac amma dindingac denemmeude, sing imocngo yofi dede, “Ge geanggaoc ubaheregango yofi mi kpesiemebesena, merang kurumennu enude?” Imoc Kristo kurumennunac memaudeac negemma dede.

⁷Me yofi, “Merang hofeu kemeude?” Imoc Kristo homecfunac meereudeac negende. Ifi mong mi negembisia.

⁸Imocac geac yoac yofi dedea fede, “Anutuac yoac imoc hoanggau nga enacgau amma heregau fede.” Nga negen negensinggac yoac imocnoc dekperagingemmekecdimbe.

⁹Imoc yofiac, ge enacbibicgango, Yesu ye Kebu, imoc dekperaginade nga Anutungo Yesu homecfunac megboriec, imoc negensinggenadeu Anutungo kopocsicgaac ebicfunac mesiguu komoc kpenade.

¹⁰Nenang ubahereninango ye negensinggeni yeng dindingac denemmeude. Nga enacbibicninango ye dekperagini yeng kopocsicninaac ebicfunac mesinunuu komoc kpenide.

¹¹Mitikibingo imocac yofi dede, “Mongngo ye negensinggeudeu, ye gamekpekpeu mi enude.”

¹²Anu yudaareng nga grikareng siricngira mong mong mi ande. Kebu ye sasawa nenanggac Kebunina. Nga ngicngac yeac kpac kpacandae, yeni ubangerecgoc keneha hania hania naric yemmeude.

¹³Nga “Ngicngac yeneng KEBUAC kpac kpacgec Anutungo yeni sasawa kopocsicnginaac ebicfunac mesiyunuu komoc kpegecde.”

¹⁴Nenang mong sueni yeng Anutuac yoac dekperagiyemmeude. Nga Anutuac yoac dekperagiu negemma naric negensinggegecde. Negensinggema yeni Kebuac kpara kpacma komoc kpegecde. Imocac yofi oho ohoya fede, “Ngic yeni siduc gombung mehakecgec ngicngac yeneng yeneac hani udumeng ubangerehagoc negenggecde.”