LIIPA MUNDURUM YIMA 2:14-47

¹⁴Kanu-kene, ⸤Yesos-ni liipa mundurum yi⸥ rurepunga yupuku angiliiring kene Pita wasie ola angiliipa kene yu-ni yambumandu tondulu mundupa nimba mele: “Oliunga Judia-yambuma kene, eni Jerusallem molemele yambuma kene, ekupu ulu wendu okum tekemulu ulu ilinga pulele eni nimbu sambu, mimi siku kum leku piliai.” nirim.

¹⁵“‘Oliu kelep tokumulu.’ niku piliikimili akili mólu. Ekupu ipulele-ui nain killok mindi, ena-mong aku-kene yambuma no-tonduluma naa nolemele kanili.

¹⁶Ekupu wendu okum ulelendu Pulu Yili-ni “Ninjui!” nimba ung nimba sirimuma piliipa yambuma nimba sirim yi Joel-ni penga wendu ombá mele uinga nirim. Yunu-ni nirim mele i-sipa:

¹⁷“Pulu Yili-ni nimba mele: “⸤Mulú-masele⸥ pora nimbá enama wendu ombá kene na-ni nanga Minéle yambuma pali simbu. Kanu-kene eninga marenali liminalima-ni nanga ung “Ninjai!” nimbu, nimbu simbuma piliiku yambuma niku siku, eninga yi-andama-ni uru-kumbu teku, eninga yi-kanguwama-ni mong-kalkalu mele kanungí.

¹⁸Nanga kendemande ambu yi kanuma kepe nanga Minéle simbu kene nanga ung “Ninjai!” nimbu, nimbu simbuma piliiku yambuma niku singí.

¹⁹Yi-Auliele-nga ena auliele ui wendu naa upili na-ni ola mulú-na kene mana-mania kene ⸤enama pora nimbá tekem nimba⸥ liipa ora simba ulu-tonduluma ‘Enini kanangi.’ nimbu aku-sipu tembu. ‘Mana memi kene tepi kene ikilia aulsi kene, ulu-tondulu aku-sipama tipili.’ nimbú. ‘Mulúna enale sumbulú topa kaliimbale memi tupili.’ nimbúko.

²¹Kanu-kene Auliele-nga ena auliele kamu wendu ombá kene yambuma-ni isili-ui Auliele-nga bili leku walsingí yambuma na-ni tepu liipu, mindili nolkemela kupulanum-na wendu liipu na-kene molku kunjingí kupulanum-na liipu monjumbu.” nimba Pulu Yili-ni nim.” nimba Joel-ni nirim.

²²“Eni Isrel-yambuma, eni ung nimbú teker ili piliai. ‘Kolea Nasaret yi Yesos ‘Yunu sika Pulu Yili-ni makó topa liipa mundurum.’ niku kanangi.’ nimba Pulu Yili-ni yunu liipa tapunjurum kene eni muluringna yambuma liipa ora sirim ulu-tonduluma tirim. Akili eni kanuku piliiring.

²³Eni yi kanili-kene penga tingí mele Pulu Yili-ni ui piliipa mulurum. Pulu Yili-ni ‘I-sipa wendu upili.’ nimba piliipaliinga yi ili eni Juda-yambuma sirim kene ‘Teku kis-siring yambuma-ni oliu liiku tapunjuku yunu toku konjangi.’ niku enini siring, enini ‘Yunu kulupili.’ niku pirimú-ni unji-perana ⸤toku⸥ ku toku panjiring kene kulurum kanili.

²⁴⸤Aku-siku tiring⸥ akiliinga-pe Pulu Yili-ni ‘Yunu kamu mana-mania naa pípili.’ nimbaliinga topa suru-sipa ola munjurum. Kululi ulu-pulele-ni yunu ka sipa kamu kapula naa ambulumba akiliinga mindili noku kolemele uluma pali Pulu Yili yunu-ni yu tepa liipa wendu liirim.

²⁵“Depit yunu-ni kepe yi ili yunu penga temba mele uinga ung te nirim akili i-sipa mele: “Auliele nanga kumbi-kerina taki-taki omba mulurum kanurundu. Yunu na liipa tapunjumbandu nanga ki-bokundu omba molemáliinga méle te-ni buni na kapula naa simba.

²⁶Akiliinga na aima lakupu numanu sipu molupu, nanga numanuna numanu sipu ungma niliu. Nu-ni nanga minéle yambu kolku pulimelé koleana pupili munduku naa kelku, nunga Yi Kake Tílieliinga ónale ‘We purupili.’ naa niní kaniliinga piliipu kene, ‘Nanga kangiele kene minéle kene na méle kaiéle liimbu.’ nimbu nokupu moliu.

²⁸Nu-ni na kona molupu mindi pumbu kupulanumele liiku ora sirinu, nu na-kene tapú-tokunu molunéliinga na numanu pulele simbu.” nimba Depit-ni aku-sipa nirim.

²⁹“Angmene, ung ili sika niker. Oliunga anda-kolepa Depit kórunga-ui kulurum ónu tiring, yunga ónu-koleale oliunga koleana lirim-na lelemú. Aku lem yunu-ni ‘Nunga Yi Kake Tílieliinga ónale ‘We purupili.’ ni naa niní.’ nirimele yunu yunundu naa nirim lem.

³⁰Akiliinga-pe yunu Pulu Yili-ni “Ninjui!” nimba ung nimba sirimuma piliipa yambuma nimba sirim yili molupaliinga, Pulu Yili-ni “Nu-ni kalku liini yi te-ni nunga alko topa yi nuim kingele molumba.” nimbaliinga “Aima sika aku-sipa tembu.” nimba tondulu mundupa nirim akili mele piliirim.

³¹Depit ⸤yunu Pulu Yili-ni nimba sirim mele piliipa yambuma nimba sirim yili molupa⸥ penga wendu ombá mele ui piliipa kene nimba mele: ‘Pulu Yili-ni yunga minéle yambu kolku pulimelé koleana mulupili mundupa naa kelepa, yunga ónale naa purumbá.’ nirim akili Pulu Yili-ni makó topa liipa mundurum yi-nuim Kraisele kolupa kene alsupa lomburupa ola molumbálendu nirim.

³²Pulu Yili-ni yi Yesos ili sika topa makinjirim, akili oliu kanurumulu mele nikimulu.

³³“Topa makinjipa kene yunga ki-bokundu liipa munjurum. Akuna molupaliinga Lapa-ni uinga “Simbu.” nirim Mini Kake Tiliele yunu sirim, liipa kene, ekupu yandu sikem. Ekupu kanuku piliikimilele yunu-ni sikemele kanuku piliiku tekemele.

³⁴Depit mulú-koleana olandu naa purum akiliinga-pe yunu-ni nimba mele: “Auli ⸤Pulu Yi Yawe-ni⸥ nanga Auliele-ndu nimba mele: “‘Nunga ele-tu yima nu-ni nokani.’ nimbu, penga enini topu mania mundunjumbu akiliinga isili-ui nu ⸤na-kene wasie tapú topulu yi-nuimsele molupulu mélema nokambili⸥ nanga ki-bokundu oku molui.” nirim.” nimba Depit-ni aku-sipa nirim.

³⁶“Akiliinga Isrel-yambuma eni pali aku-siku piliai: Yi Yesos ili eni “Kulupili.” niku unji-perana ⸤toku⸥ ku toku panjiringele Pulu Yili-ni “Yunu Yi-Auliele kene, yunu ‘Yambuma nokupa konjumba yi te liipu mundumbu.’ nimbu makó turundu yi-nuim Kraisele mulupili.” nirim yili molemú.” nimba Pita-ni aku-sipa nirim.

³⁷Pita-ni enini aku-siku tiring mele nirim ungele piliikuliinga yambuma mini-wale munduku kene enini Pita kene Yesos-ni “Nanga kongunale tenji-pai.” nimba liipa mundurum yi wema kene eninindu niku mele: “Angmene, ekupu oliu nambulka teamiliye?” niring.

³⁸Pita-ni eninindu nimba mele: “Eni ‘Pulu Yili-ni oliunga ulu-pulu-kísima kanupa konde tinjipili.’ niku, teku kis-silimele kanuma piliiku kis piliiku, numanu topele toku, ‘Na Yesos Krais-nga yambale molambu.’ niku no liangi. Aku-siku tingí kene Pulu Yili-ni Mini Kake Tiliele eni we simba liingíko.

³⁹Pulu Yili-ni ‘Mini Kake Tiliele simbu.’ nirim akili eni kene eni kalku liingí yambuma kene yambu kolea sulumanga molemelema kene penga mulungíma kene enindu pali nirim. Auliele oliunga Pulu Yili yunu-ni ‘ ‘Nanga yambuma molangi wai.’ nimbú yambuma pali Mini Kake Tiliele simbu.’ nirim.” nimba Pita-ni aku-sipa nirim.

⁴⁰Pita-ni ung-mani lupa-lupa pulele tondulu mundupa enini lip-lipi topaliinga nimba mele: “Ya mana yambu molku kis-silimelemanga Pulu Yili-ni eni buni simba tekemaliinga yunu-ni ‘Oliu buni naa sipili.’ niku, piliiku kongnjuku molai.” nirim.

⁴¹Kanu-kene Pita-ni aku-sipa nirim ungele piliiku liiring yambuma no liiring. Ena kaniliinga Yesos-nga ungele ‘Sika’ niku tondulu munduku piliiring yambu-talapeliinga sukundu yambu tausen yupuku mele olandupa purum.

⁴²Kanu-kene ⸤ungele piliiku liiku no liiring yambuma⸥ Yesos-ni “Nanga kongunale tenji-pai.” nimba liipa mundurum yima-ni ung-bo tonjuku mani siring ungma piliiku, anginipilima kene tiluna kapula-kapula molku, wasie tapú-toku langi noku, Pulu Yili-kene popu toku ung niku muluring.

⁴³Yesos-ni “Nanga kongunale tenji-pai.” nimba liipa mundurum yi kanuma Pulu Yili-ni liipa tapunjurum kilia liipa ora sirim ulu-tonduluma tiringeliinga kanuku kene yambuma pali mini-wale munduku mundu-mong tiring.

⁴⁴‘Yesos yunu sika ⸤Pulu Yili-ni “Yambuma tepa liipa nokupa konjumba.” nimba mana mania liipa mundurum yi-nuim Kraisele.’⸥ niku tondulu munduku piliiring yambuma pali tiluna molku, eninga mélema enini lupa-lupa naa nosuku, ‘Oliunga pali’ niku nosuku manda-manda mindi muluring.

⁴⁵Eninga ma-ma kene méle nusuringma maket teku ku-moni liiku méle mólu turum yambuma ku-moni moke teku siring.

⁴⁶Taki-taki ⸤Pulu Yili popu toku kaluring⸥ lku-tembolluna puku liiku máku toku, eninga lkumanga pali wasie anduku ‘Langi wasie tere lepu namili.’ niku, numanu kaí pípili numanu siku langi noku,

⁴⁷Pulu Yili kape niku bi paka tonjuku, muluring. Yambuma-ni pali enini kanuku kaí piliiring. Eninga ulu-pulu-kis kanuku kis piliiku numanu topele toku Yesos-ndu “Mindili nolka kupulanum-na naa pambu akiliinga na tekunu lii.” niring yambuma Auliele-ni ‘Yunga yambuma molangi.’ nimba taki-taki sukundu-sukundu liirim.