Dad Nimò 2:14-47

¹⁴Na kafnge én, tadag Fiter magin i dademe dad sfalò satu dek Dyisas, na falbongan i taluan, manan, “E dad demegu Dyu, na kdeeyu dini di Dyérusalém, fye ku glabatyu moon, taman tooyu beg fanlinge i mangu di gamu ani.

¹⁵Man nawayu langal i dad to ani bay là ale langal, du neyeyu, alò tngà mnagad i duh.

¹⁶Kabay ani sa kagdohò i tafakang Dwata fagu di satu tugadan di muna fa dunan Dyol, manan,

¹⁷‘Ani sa i nimògu kadang di fulé duh, toogu blé i Tulusgu di kdee dad to. I dad ngàyu lagi na libun tmugad ale i fgadègu di dale, na i dad ngàyu sawang lagi nun kanteenla, na i dad tua lagi di gamu kamna ale.

¹⁸Na balù i dad fasakgu lagi na libun, banlégu ale i Tulusgu, na tnugadla i fgadègu di dale.

¹⁹Na di bang én, fitegu di dad to i dad tnikeng mdà di langit, na dad ilè dini di tah tanà, dunan litè, na lifoh, na buk too mangfel.

²⁰Mbaling kmifu i duh na mbaling fulè i bulen gambet litè. Ani sa mkel di là fa gdohò i mdatah duh, i duh kukum i Amu.

²¹Na di duh én kadang, balù simto mni tabeng di Dwata i Amu, galwà ale.’ ” Én man Dwata fagu di ku Dyol.

²²Na fadlug talù Fiter, manan, “E gamu dad bel Israél, tooyu fanlinge i mangu ani. Tagadèyu gablà ku Dyisas mdà di banwe Nasarét. Tafite Dwata na kenen mdek ku Dyisas, du mdà di gnaganan na dad bong tnikeng na dad ilè fimoan kenen di munayu gufiten i kdatahan.

²³Dyisas ani blé Dwata di gamu di bang i knayean, du én tafandaman di muna. Hae, tablén Dyisas di gamu, na lêyu blé di kagot i dad to gamsalà du fafatiyu kenen di krus.

²⁴Kabay nték sa kenen Dwata na falwaan mdà di fati, du là gmagan i fati magot kenen.

²⁵Du ani kagdohò i gman Dabid gablà ku Dyisas, manan, ‘Gadègu Amugu tagnè samnagin deg, du dini kenen di kwanangu, én duengu là likò.

²⁶Na én duen i nawagu too lehew, na dnayengu Dwata, na balù mati i lawehgu ani, knean nun fatangu,

²⁷du laam agu tagak déén di gumnè i dad mati, na laam faloh ku balok laweh i To Landè Salà i kanbongam nawa.

²⁸Tafgadeam di deg kibògu mfun nawa landè sen, na mdà di kasnaginam deg, fananoam agu klehew.’

²⁹“Dad flanekgu, toogu man ani di gamu ani gablà di tbulito Dabid. Tamati kenen na talbang, na nun fa lbangan kel di duh ani.

³⁰Kabay kenen satu tugad Dwata na gadean tatoo makang Dwata nun satu to mdà di bel Dabid fanbalingan harì.

³¹Du tagadè Dabid i fan mkel, taman nun manan gablà di kték Krayst, i To Mgalék Dwata, di kmanan là kenen tagak Dwata di gumnè i dad mati, na là balok lawehan.

³²Dyisas Krayst i mangu ani tanték Dwata mdà di fati, na kdeemi dini mite dun.

³³Na ani tafdatah Dwata kenen ditù di kwananan. Na tagdawatan i fakang Maan, dunan i Mtiu Tulusan tafeben dini, na kdee teenyu na lingeyu dini slame mdà di kenen.

³⁴Na là magket Dabid salu di langit, bay knean, manan, ‘Man Amuito Dwata di Amugu, “Sudeng ge dini gsen di kwanangu,

³⁵kel di kagfisangu dad dmuen ge, na i kafkahgu dale di dungan falel bliam.” ’

³⁶“Taman toogu fbangal i talùgu di kdeeyu dad bel Israél, du fye tooyu gadè, Dyisas i tanlansangyu di krus, fdatah Dwata na fanbalingan kenen Amu di kdee, na Krayst dunan i To Mgalékan galyu fatan.”

³⁷Na kaklingela i gman Fiter, malbà i nawala, na smalek ale ku Fiter na i dademe gal dek Dyisas, manla, “Dad flanek, tan i fye nimòmi?”

³⁸Na tmimel Fiter, manan, “Kat satu gamu msal na tagakyu dad salàyu, na fbunyag gamu fagu di dagit Dyisas Krayst, du fye nlifet Dwata i salàyu, na blén gamu i Mtiu Tulusan.

³⁹Du én sa fakang Amuito Dwata di gamu, na dad ngàyu, na balù fa dad to di gumawagan, kel di kdee tamgalékan.”

⁴⁰Kafnge én, dee fa man Fiter du faglabat dale i kaglut gablà ku Dyisas, na toon ale fakdo, manan, “Nang gamu makuf di dad sasè nimò i dad to di bang ani, du fye là gamu gakuf di kaflayam blé Dwata dale.”

⁴¹Na i kdee dmawat i man Fiter fbunyag ale. Na di duh én mdadong tlu libu dad to gatnù di dad faglut di ku Dyisas.

⁴²Na too ale flinge i tdò dad to gal dek Dyisas, na sasatu i nawala di klalòla ku Dyisas. Na gal ale stifun du dmasal di Dwata na snatngàla i fan na minum i ninum du fandamla i kfati Dyisas.

⁴³Na kdeela tikeng gagin i afèla di Dwata, du too dee dad tnikeng na i dad ilè mgimò i dad gal dek Dyisas.

⁴⁴I kdee dad faglut sasatu nawala, na too ale sablé.

⁴⁵Na fablila i dad knunla na sankatla banlé di dad demela nun klidù.

⁴⁶Na fadlug ale stifun klit i duh di Bong Gumnè Dwata na sasatu ale kmaan di dad gumnèla du fye gafaldamla i kfati Dyisas. Na di kastifunla, too ale lehew mdà di kafye Dwata dale.

⁴⁷Too ale dmayen Dwata na too ale nafè i dademe dad to. Na klit i duh nun dademe tnù di dad to faglut di ku Dyisas na galwà di dad salàla.