Ume 2:14-47

¹⁴Iok, Petrus mes haka luluch nge pekngana mur nenge analoch pe elle nem pe haliu ke palaungana toto lange hulua lochloch ngana ke teke, “Iuta mur pe imo lochloch ngana nenge atu nge Ierusalem, a longo at nge iau pe e hemallaha hote ure nenge te lohotot nei luna lange imo.

¹⁵Imo a teke hana nemur tein. Pe iri tein ero iam, iange kileng uach mana kura!

¹⁶E hele lange imo pengpeng, ure nenge te lohotot nei, hetatalonga Ioel hele talue nge nike lo. Hele ke teke,

¹⁷“‘NeHalang hele ke pomai koi; Etue nemur nga hoena nge te lohot tala nga etue hetala ngana, iau lape e tunge Opepengpeng ke rongo heke iri lochloch. Tutumo mur tatamanna pe tutumo mur heheina, lape te haliu hote lek helenga mur. Pe lape lemo lolomele mur, lape tenau operia ia ure mur pe amo hana papalauna mur, lape tema operia rara.

¹⁸Pe lek hekuleileinga ana non mur, manmanna toto ke te mene Opepengpeng nem pule, ke iri pule te haliu hote lek helenga mur. Iri nenge tatamanna pe heheina pule.

¹⁹Pe lape epoi hote ana lala hel nga lut nga tapa ke pomai, lape chaia tua ero ol, pe kileng au mana. Pe teio matana lape hul ke pomanga toho. Pe lape epoi hote ana lala hel nge sio nga ich ke pomai, lape e heremenia kileng nga toho pe e poia kileng ke oan ngaulele pe kileng pulu ala mana. Pe ure nemur lape te lohot tala nga NeHalang ana etue nenge palaungana toto.

²¹Pe iri lochloch ngana nenge te tang la nge Non Soke ke halaua iri, lape tetu ke te maulul.’”

²²Pe Petrus hele pule, “Imo hana nenge Israel, a longo at nga lek helenga. E teke e hele urume Iesus nenge Nasaret lange imo. Imo sipomo a eteia ume papalaungana pe lala mur nenge Iesus poi hote lange imo ke a esesia lo. Nga NeHalang lemene ngana toto, poia ure nemur ke te lohot ke pomalam. Iange i teke heneue imo ke a eteia ke i sipona kulos sue Iesus at.

²³Pe nga NeHalang lemene ngana, tung heke Iesus langa perimo ke pomanga i sipona letena tuanin hot ngana ia nge nike, pe heleia ke teke poia. Ke imo sipomo a hune Iesus nenge a tunge i langa hana poreke ngana mur peria ke te heon heke i ke mete.

²⁴Pe NeHalang hemaul heke mule Iesus nga metenga. Hile hote i ke mete sapele ero, iange kerkerenga pele nga metenga nakuna ero nge hekou sue Iesus.

²⁵Non Soke Teuit heleia Iesus ke pomai, “‘Kokoes mana e esesia Non Soke. Pe ute pele ero nge heloiloi ia iau. Iange ana non tu ke rochroi mana nge iau.

²⁶Ke pomalam letek urana toto pe e hele ke e iech mana. Pe pule singik nei lape tuke angala mana nge NeHalang.

²⁷Iange NeHalang iong, o hile sio mene iau ke etu nga hana nenge te mete reria kileng ero. Pe lape o hile sio mene lem non nge pengpeng ke ma ke punich nga ich letena ero.

²⁸Iong, o henonoua iau nga maulinga ana kue lo. Ke lape o poia iau ke etu luluch nge iong pe o poia iau ke e iech toto.’”

²⁹Iok Petrus hele mule, “Titik mur e teke e hele hot pengpeng lange imo nge rette Teuit. Ana non mete ke tealo hite i lo. Pe ana polo tu luluch nge ita ke at nga etue nenge heueu nei.

³⁰Pe non soke Teuit nem i hetatalonga. Pe i eteia utar nenge NeHalang heleia ke teke poia. NeHalang talue helenga kerkereng ngana nge teke hemes heke Teuit nette e ke lohot ke i naungaala ana none, ke pomange Non Soke Teuit i sipona.

³¹Iok, Non Soke Teuit eteia utar nenge NeHalang teke popoia, pomalam hele urume Mesias nem maul haka mule ngana ke teke, ana non lape tu ke lasus nga hana nenge te mete reria kileng ero. Pe pule lape koluna ma ke punich nga polo letena ero.

³²Ke Ne Iesus nei, ngana kou NeHalang hemaul heke mule i nga metenga lo. Ke imem lochloch ngana nei, Iesus maul haka mule pe at ke lohot nge imem. Ke ngana koi nenge mo hele hotote ure nemur, iange mo esia lo.

³³Ke Ne Iesus nem, ngana kou maul haka mule kela are nga Temene penna tamalmal lo. Pe mene Opepengpeng nga Temene penna lo. Ke pomanga Temene hele talaia lo ke teke tunge lange i. Pe nena tunginga nenge hekulo sue at nge imem, ngana koi nenge a esesia pe a longlonge heueu nei.

³⁴“Iange Non Soke Teuit haka langa lut nga tapa ero. Pe Iesus i toro mana haka langa lut nga tapa. Pe Non Soke Teuit hele ke pomai, “‘Non Soke hele lange ak Non Soke ke pomai: “O haka at ke oare lakoi nga ilik ele nenga perik tamalmal. Oare lamai kela het nga etue nenge,

³⁵e mene lem ngarang mur, ke e talue iri nga apem sana ene, ke apem ana manga mur ia iri.” ’

³⁶“Ke imo hana nenge Israel, nenge nei a etei tote ol, iange Iesus nenge a heon heke i nem, NeHalang tal heke tote i ke i soke toto ol. Ke i Mesias nenge mene mule NeHalang nena hana mur nenge hesilei hote iri lo.”

³⁷Iok laol, Petrus na helenga nemur tua tote hehei pe hana leteria, ol pe hehei pe hana nemur te hele lange Petrus pe pekngana mur ke mai, “Oe atong mur, pe imem lape mopoi ke pomere mai ol?”

³⁸Pe Petrus hele lange iri ke mai koi, teke, “Imo lochloch ngana nem, imo elle pe elle, a hulia letemo nga lemo poinga poreke ngana mur, pe a mene henuninga nga Iesus Krisus ene. Pomalam lape NeHalang letena ia imo nga lemo poinga poreke ngana mur. Pe lape a mene tunginga nenga Opepengpeng pule nenge NeHalang hekulo sue at nei.

³⁹NeHalang talue helenga kerkereng ngana lo, nenge teke tunge Opepengpeng lange imo pe nge tutumo mur pe nge hulua lochloch ngana nenge tetu nga tau. Oe, tunge lange iri nenge i sipona iua iri.”

⁴⁰Pe Petrus hele hote helenga e pule lange iri pe hele ke kerkereng toto lange iri ke mai, “Anau ala amo, iange lape melmelenga palaungana nenge NeHalang tunge lange hana poreke ngana mur, lape mene imo pule!”

⁴¹Petrus na helenga tua tote leteria pe hulua halang toto leteria manmanna nga helenga nemur. Ke pomalam te mene henuninga. Ke hehei pe hana iri ana non kina lime iri analoch iri mol (3,000) te lohot ke Iesus nena hana mur nga etue neu pengpeng.

⁴²Iok, iri lochloch ngana nenge te hulia leteria pe te mene henuninga nem, kokoes mana tela nge Iesus nena hana mur ke te hetottore iri. Pe tetu ngaria pomai, tenau hel mule nge iri ke pomanga iri lochloch titiria mur hel. Te eukirau pe te ngau ke elle pe te eukirau ke te hetalaulau.

⁴³Pe Iesus nena hana mur tepoi hotote lala mur pe ure papalaungana mur pe hulua te esesia pe te rura toto. Pe haria kangkanga manmana.

⁴⁴Ke iri lochloch ngana nenge leteria manmanna nge Iesus tetu manmana ke muria elle, pe te tung helel aria ure.

⁴⁵Nenge teke tetu pe mele na ure unne sune mana, te mene reria ure hel langa ingala, nem pe mele hel te olia reria ich unne pe uruna te laia nge mele nem.

⁴⁶Kokoes mana tela ke te eukirau nga NeHalang nena pele palaungana. Pe pule tela ke te eukirau ke te ngau nga reria pele mur. Te ngau pe te iech pe te tung helia aria ngaunga.

⁴⁷Pe te heto heke NeHalang ene pe te iech toto iange hehei pe hana lochloch nenge Ierusalem, leteria urana mana nge iri. Nga etue lochloch, NeHalang hesilei hotote nena hana mur. Ke nga poinga nem mana, iri nenge NeHalang mene mule iri pe leteria manmanna nge Iesus, te lohot ke iri hulua toto.