Dewa 2:14-47

¹⁴Ka Pita yaiana ai yau 11 nui imimini, ka tauna movina ananina vi‑putu nau‑wahe yokoia wayahia, ivona, “Itomi me Iudea kadu Ierusalem a tau maꞌ habuhabumi, yau vona unononi, avo‑vi‑mahetemi.

¹⁵Itomi unuanua yama dewana vinꞌ‑omo daudau bagibagina wayahina, kate eha. Iuna ataina mana‑putu niwanina eha nim vi‑kwavakwava ana tuta.

¹⁶Kate nonova tau apa‑taputapu ana wava Ioela dewana mai‑haeyei. Ka ataina dewana vinꞌ‑omo Yaubada yana hae aitamoata deina.

¹⁷Iginumana ivona deina, ‘Yaubada ivona, “Apaina, tuta a pai nau‑yehata wayahina, yauke Nuau ana‑ito‑iwahi tomotau habuhabui wayahia. Ka natunatumi ononotoi kadu vaivinei inꞌ‑apa‑taputapu, ka yami tupunata ina‑ino‑dunedune, ka ononotoi ivi‑nainai yai ava inꞌ‑epei.

¹⁸Vona ahiahina, tuta tanoi wayahina Nuau ana‑ito‑iwahi yau tau paisewa ononotoi ka vaivinei wayahia, e taui wayahiu inꞌ‑apa‑taputapu.

¹⁹Apaina iaiaya avevewanei wahuma, ka tomotaui idudueyei nuai vi‑tupatupa wayahina. Vivane babau vi‑novanovana, ka wahava ana dune yabebenina, vi‑dayaha deina. Ka kadue iaiaya avevewanei tanopia, dayaha deina, ka ai ananata, ka kadu bawa badobadona. Ka iaiaya‑naia ina‑iakwa, munia Kauvea yanꞌ auyewa vinꞌ‑omo. Ka auyewana vivane pai matauta ananina tau maꞌ tanopi wayahi. Ka Kauvea tauna didigana na‑si‑vinꞌ‑omanei, e tomotau habuhabui idudueyei.

²¹Ka aituhu aviyaivia Kauvea ivitumahanei, ka aituhu taui tauna ana wava ivivi‑hone, akanai taui ito‑yavuha ivaniahei akanai.” ’

²²Me Isiraeli, itomi vonana Iesu onoto Nasareta wayahina unononi. Yaubada avaha onotona apa‑vidovidohei. Ka Yaubada tauna awaehei dewa‑bagibagina kadu iaiaya ananina dedewei matamia. Ka kadu Yaubada avaha Iesu‑nana ana wava si‑nai deina, ka viwavenemi, udueyei, ka avaha uanamane‑yehai.

²³Nonova Yaubada avaha anamanei medeina Iesu yanꞌ aniga vinꞌ‑omo. Wayahina, Yaubada awaehei aitam onoto Iesu‑nana vi‑nua‑hauhauei, am‑veneneyemi. Ka Yaubada kadu mai‑anamanei tau goyogoyoi ina‑ivaitemi ai nahenahea Iesu‑nana ututu‑pwatei, unau‑vi‑anigi.

²⁴Itomi uvunui deina, kate nonova Yaubada avaha apa‑taputapu vivane Iesu‑nana eha nau‑wawani na‑maꞌ‑vavaha aniga ya papani wayahina. Wayahina, Yaubada aniga ya papani wayahina ito‑yavuhi, ka si‑vi‑mini‑havinei.

²⁵Apa‑taputapu‑nana kavaniahei Davida ya iginuma nihenina, ivona, ‘Yauke avaha adueyei Kauvea mataua maꞌ‑vavaha. Ka tauna ateiua mamaei, ka vo‑vi‑bagibagiu. Wayahina, eha ava‑hamwahamwana.

²⁶Wayahina, nuau dewa‑haiawa kadu meau awa‑davedavem ananina. Ka ataina ininiu mamaei, ka nua‑vaniaha nui apotapotam.

²⁷Iuna eha nuau ebou‑vavahi tau anianiga yai papani HadesiV nihenina. Ka eha eawaeha Yam Onoto Ahihinata na‑mavunu.

²⁸Ka avaha yawai ahiahina a etawana eviwaveneu anua‑haui, kadu dewa‑haiawa wayahina evi‑nau‑vi‑anaiu matama.’”

²⁹Ka Pita kadu ivona, “Vavaneiu, vona tunutunuhina avonemi, Davida ya vonaia ai anamana eha waka Davida wayahina. Iuna Davida‑nana kanamanei nonova inusi, e iboui unuvovoa. Ka tuta ataina a unuvovo‑nana meagai taina nihenina mamaei.

³⁰Ka Davida‑nana aitam tau apa‑taputapu, kadu tauna avaha anamanei Yaubada tauna ya vona‑dabadaba wayahina vonei apaina aitam Davida ya tupua‑nenenehi wayahia ya pai veimea veimeyei.

³¹Ka Davida Tau Ito‑yavuha ya mini‑havine mai‑anamanei, e apa‑taputapu dewana wayahina. Wayahina, Davida ginumi, e Yaubada eha Tau Ito‑yavuha‑nana ininina bou‑vavahi tau anianiga yai papani HadesiV nihenina, kadu ginumi, e ininina eha na‑mavunu.

³²Yauke aipuipupu Iesu‑nana wayahina. Yaubada avaha tauna anigea si‑vi‑mini‑havinei, ka dewana munia itoai habuhabuai adudueyei.

³³Wayahina, Yaubada bou‑vaneyei, ka tuta ataina tauna Yaubada ateina mamaei. Ka kadu Yaubada tauna Nuana Ahihinata venei, nonova vona‑dabedabeyei deina, ka tuta ataina tauna avaha Nuana Ahihinata ito‑iwahi wayahiaia. Ka ipupu taina movi tunina tunina ududueyei ka unononi vinꞌ‑omo Nuana Ahihinata wayahina.

³⁴Yau vonana tunutunuhina. Iuna Davida eha ta‑vane wahuma, kate Davida ivona deina, ‘Yaubada avaha yau Kauvea vonei, ivona, “Ateiua emanuena, emamaei

³⁵a itoava am havia avi‑opuei wayahina, aem a pai vi‑ai wayahina abouni, eveimeyei.” ’

³⁶Wayahina, me Isiraeli habuhabumi nau‑wawanimi unꞌ‑anamanei ahiahina, Iesu‑nana ututu‑vi‑nahenahei. Kate Yaubada avaha Iesu‑nana ana wava si‑nai vivane yaka Kauvea kadue yaka Tau Ito‑yavuha.”

³⁷Ka tomotaui, avaha Pita ya nau‑wahena inononi, iaini‑yauyau ananina, kadu nuai vi‑tupatupa. Wayahina, taui Pita yaiana nui wayahia ivi‑tanai, ivona, “Vavaneiai, avaha dewa goyona adewei. Avi dewa nau‑wawaniai adewa‑vidoha?”

³⁸Wayahina, Pita ivona, “Vavaneiai, aituhu yami dewa goyona wayahia unua‑vinana, e habuhabumi Iesu Tau Ito‑yavuha a wavea avi‑bapitaisoemi. Ka Yaubada yami dewa goyona na‑nua‑tavuni, e Nuana Ahihinata uvaniahei, vivane am‑venena‑kavovo Yaubada wayahina.

³⁹Iuna Yaubada ya vona‑dabadaba‑nana Nuana Ahihinata wayahina vivane itomi wayahimi, ka kadu natunatumi wayahi, ka kadu taui imamaei bana mamanaina Yaubada wayahina wayahi, ka kadu tomotau habuhabui wayahi. Aituhu aviyaivia Yaubada honei iomo tauna wayahina, akanai taui wayahi.”

⁴⁰Ka Pita ya vonana eha ta‑iakwa, kate tauna naunau‑wahe vi‑manamanaia wayahia, ka haehaeyei kadu viamei, ivona, “Yaiau, tuta ataina nau‑wawanimi tomotau goyona wayahia una‑ito‑yavuhimi, iuna tomotaui tuta ataina imamaei yai dewa vivane mavununa.”

⁴¹Akaka auyewa‑nana wayahina tomotau ai yau 3000 Pita ya nau‑wahena inononi, iawaehei, bapitaiso ivaniahei, ka kadu taui ivi‑tau ekalesia.

⁴²Ka tuta tuta taui tau hae‑naia yai viwavenena inonononi, iawaehei, kadu mani tau ekalesia ivi‑yaianei ahiahina. Ka habuhabui nui palaua ipakepakeua iamam pai nuana Iesu wayahina, kadue yai viama Yaubada wayahina iawaehei aitamoata.

⁴³Ka tau ekalesia habuhabui nuai vi‑tupatupa. Iuna Yaubada tau hae‑naia awaehei taui dewa‑bagibagi habuhabui kadu iaiaya habuhabui idedewei.

⁴⁴Ka tau vitumahana imamaei yoko, ka inuanua aitamoata. Wayahina, yai gugua iawaehei vivane tomotau habuhabui yai gugua, ka ivo‑patai deina.

⁴⁵Ka aituhu tupwai wayahia payapayaya, akanai yaiai tupwai yai tanopi o kadi yai gugua iaimwaneyei, e patana ivenevenei tau payapayaya ividoha deina.

⁴⁶Wayahina, auyewa aitamoata aitamoata wayahia taui nui itapanono Manua Vito‑pota a pai nau‑hohona nihenia. Ka kadu taui yai manua nihenia palaua ipakepakeua iamam pai nuana Iesu wayahina, ka kadu yai dewa‑haiawa nui kadu yai nua‑opu nui inau‑hohona, e ai maꞌ iamam.

⁴⁷Ka tuta tuta Yaubada iawa‑davedavei. Ka yoko habuhabui tau vitumahana‑naia yai dewa iawa‑vidovidohei. Ka auyewa aitamoata aitamoata wayahia tupwai tomotau ito‑yavuha ivaniahei. Ka Kauvea tomotaui tau ekalesia ai yau wayahina vi‑nuia, ka ekalesia ai yoko natanata deina.