Esus Chuibenequidon Naid 2:14-47

¹⁴Adec onquesho tantiashun Esusën ëbi chuibeneta caido cho-choquin Petedon nidtoshon tantiamenu quequin naden cho-choboedo comapenec onquequin chuipanëdash: —Mimbi icsamboen tantiaid chiembique. Tantiata.

¹⁵Ushë abuctotsëcnubi ëbitedishun paëmbocquid acamboccombi.

¹⁶Utsin-utsinquiec onqueten onquesho mimbi tantiaid Nuquin Papan ëndenquimboshë chiampicpadec onquec nebi. Tsusedpa Oedëmbi Nuquin Papan ma matsesbëd tabadnueshun aton Mayan menenun chiaid naden aidën dada uampic:

¹⁷‘Nëid nidaid naimbudnubi Con Mayan matses utsi-utsien menendambi. Aidon madobobëdtan aidon champibontsen ëmbi yuecquio icshun nanun chiaid chuibanendac. Adembidi caniabontsen ushquin ëmbi chiacpaden isendac. Adembidi tsusiobontsen ushquin ëmbi chiacpaden isendac.

¹⁸Aden con Mayan meniac ambi tantiacpadomboembidi ëmbi chuiquin namiaidon dadan chidobëdtan ëmbi yuecquio icshun nanun chiaidquiobidi chuibanoaindac.

¹⁹Adembidi, con Mayanën tantiamiac ëmbi yuecquio icshun nanun chiaid matsesën chuibanubien abucuësh uinsadpamboctequid icnubi nidaidënshun ismete intacbimboectequidbëdtabi nëdënquetequid cuëte pushudquidbimboectequid abembi pushudquidbëdta adquidtedi mibi ismendambi.

²⁰Adquid icnuc badiadën ushë chënquenquiocnoc inchëshacbimboectequid inchëshën ushë piu-piupambo yec intacbimboecsho mimbi isbededendac. Ëmbi ismiaidtedi icambi matses cuidte ushë choendac.

²¹Ismequimbi con Icbombo nec ëbi caquidquio mënchiquendambi,’ quequin Nuquin Papan chuimiacpaden Oedën dada uapampic.

²²“Adembidi Nuquin Papan chomiaid chiembique. Tantiata, isadaidbo. Nasaded caid yacnoësh choquid, Esus, Nuquin Papan chomiaid icquin nadatiambocquin nabanquin ismebansho mimbi isondac.

²³Aidi Nuquin Papan tantiampicpaden Esus bedshun mimbi isadaidpembo chuiquid menequin, Unës uata, cac cuesten dectanquin Esus unës uapanëdash.

²⁴Aden mimbi nac unësacsho icsaisa chococacno yuec ictiapimbo iquec, queshun Nuquin Papan Esus uincuemepanëdash.

²⁵Adembidi ëndenquimboshë tsusedpa Dabid padon Esus chuibanquin naden dada uapampic: ‘Con Icbo abuc nidec bëyucanquid ëbëd tsadacbimboecsho isec nebi. Aidi con dayun tsadquid icsho isquin natiaic cametequid dacuëdënenquio iquendambi.

²⁶Aid unësash uincuente tantiec ëbitsen uincuenendabi, Papa, quec cuëdënec bëdambo iquebi.

²⁸Nuquin Papa yacno tabadacpadec nidaidën tabadquin ismiac mibi yacno nidash mibëdi tabadec bëdamboshë iquebi mimbi camiaid iquendabi,’ quequin Esus tantiaquin Dabid padon dada uapampic.

²⁹“Adomboen tantiaquin dada uash Dabid unësacsho chococapampid nëbi shëcuë iquec.

³⁰Dabid Nuquin Papan ambi yuecquio icshun nanun chiaid chuiquid icquin nadopampic. Yuecquimboshë yash mibi ëndenquimbo unësampid icnuc min tsyuecquid chuiquid dapabidi iquendac, quequin Nuquin Papan chiaid abimbo iquec, quequin tantiaquiopampic Dabid padon.

³¹Aden Nuquin Papan nanun chiaid tantiaquin Esus uincuente isacbimboen dada uaquin, Nuquin Papan Chomiaid unësacsho chococaqui aton nami chodquenquio yec uincuenendac, quequin chuipampic Dabid padon.

³²Ai, Dabid padon chiampicpadembi Nuquin Papan Esus uincuemepanëdash. Aid uincuemiacsho isondaid icquin mibitedi chuibanec nebi.

³³Aid uincuenash Nuquin Papan dayunquio tabadendac nëbi. Ambo choacsho matses tantiaquin Nuquin Mayan ma aidbëd tabadnueshun matses mimbi meneta, aton Papan cacpaden abi tantiaquidtedi menebanquiac onquete utsin-utsinquiec onquesho nëbi mibitedishun tantiec.

³⁴Dabid padon nami chodquiash abuc nidambocpampic. Aden aton namibi abuc indote chienquiocquin Esus chuiquin Nuquin Papan yuecquio icshun nanun chiaid naden Dabid padon chuibampampic: ‘Nuquin Papa Icbo Dapa icquin abipadquid icbo cain: Nëbi ëbëdi tsadec cho.

³⁵Mibi chieshënquido dëniacquidquio mibi icmenun nabono. Chiata,’ quequin Nuquin Papan nanun chiaid Dabid padon dada uapampic.

³⁶“Aden tantiaquin Dabid padon chuipampid Esus mimbi cuesten dectanquin unës uaid uincuemequin matses icsaid bedshunash abided cuidadquid Nuquin Papan icmepondash. Adoac ëmbi chiaid abimbo iqueque. Esus tantiaquidquio icta, isadaidbo —quepanëdash Petedo.

³⁷Aden Petedon chuisho tantiash iccuededquido abi icsaid tantiec unësquio yec: —Esus tantianuequin ¿atotsi nuqui nape? —quepanëdash utsi-utsiec Petedobëdta Esusën ëbi chuibeneta caid utsibo chiec.

³⁸Adoaquien Petedo: —Mibi icsaid ënshun, Esus con Icbombo nec, quequin abimbo tantiaquin acten mentometa ma ëbi icsaid Nuquin Papa bëpiscudnu queshun. Adoacsho aton Mayan mibi menendac.

³⁹Adembidi tantiasho isun min tsyuecquidtsen menendac. Adembidi nidaidtedi yacnocquidën tantiasho isun aton Mayan meneoaindac ambi chiampicpaden —quepanëdash Petedo Esus isquidquio.

⁴⁰Aden chuibanequi: —Mimbi icsamboen tantiaid ënta. Aden ënash Esus tantiaquidquio icta —quequin chuibudquin Petedon ëmpanëdash.

⁴¹Aden chuisho tantiash, Tantiaquiembi, quepanëdash utsi-utiec. Aid ushëmbi dadpenquioshë tedes midted Esus tantiaquid yampanëdash. Adquid icsho isun acten mentobampanëdash.

⁴²Adashic, Esus tantiembi, queboedo tantiabenabi iquec Esusën ëbi chuibeneta caidon Esus chuibansho tantiec tabadequi Nuquin Papa chiec onquedenepanëdash.

⁴³Adec tabadcuededsho isash: —¡Padtembo! Dacuëdampambo iquec —quec utsibo tabadpanëdash. Adnubien Esusën ëbi chuibeneta caidon nadatiambocquin nabampanëdash.

⁴⁴Adnubien Nuquin Papan aton Mayan meniaidtedi tabadcuenequi, Con na nec, quenquiocquin aton na cudasenquiocpanëdash.

⁴⁵Aton na menequin piucquid bedshun utsin na nibëdsho isun menepanëdash.

⁴⁶Adecbidi badiadquidën-badiadquidënquiec Nuquin Papa tabadte shubu uashunaid yacno nidash iccuededpanëdash. Adecbidi shubu utsi-utsiec yacno nidash iccuededquin Esus unësaid tantiaquin panëmpi cuësh-cuëshun peded-pededpanëdash. Adembidi bundoshon pebededoapanëdash. Adobanequi ëbi icsaid bedshunash Esus cuidadaid tantiec bëdambo iquebi, quec

⁴⁷Nuquin Papan naid chiec cuëdëncuededpanëdash. Adec tabadsho isash, Bëdambocquido nec, quec utsibotsen Esus tantiaquid yanash abi tantiaquid utsitedibëd iccuededpanëdash.