Aposotolo Adi Hewau 2:14-47

¹⁴Na Petero, eo saudoudoi‐esega se toro, ia i arina lailai, i ribalau aridi eai i ene, “Omi Iudea tataomiu e, eo Ierusalema taumiaina e, teina ta au nuatui, eo egu riba ta bena au ataiei.

¹⁵Tatao ta nige se nom eauyaure, wau aue riba wa, abo ina asubena mahana hehaionana mo;

¹⁶teina ta doha ede Ioela peroveta i ribaei wa:

¹⁷‘Huia murimuritadi eai, Eaubada ie riba, Earuagu abo ea hegoi‐auri buluma gamagari potadi eai, eo nanatumiuyao tatao eo sisine abo se riba‐peroveta, ami hewahewari tautau matadi eai abo se ita, emi tautaubada enosuai abo se enosuaiei;

¹⁸e, abo egu heaheari tatao, eo egu heaheari sisine potadi eai Earuagu ea hegoidobei, abo se riba‐peroveta.

¹⁹Nabutua galewa ewana eai abo ea torehemasarahadi, heiheinoidi tanoubu eai hinage, osina eo oeagi alaalasi, eo asu madagauna;

²⁰Mahana abo i hemala masigiri, eo nawalai i hemala osina, abotai abo Guiau ena asubena i laoma, asubena lailai, wasana i lai ariri, abo i lage.

²¹Arinai abo isi esa, eo esa, Guiau esana se ataatai, abo se mauri.’

²²“Isaraela tataomiu e, teina riba ta au ataiedi: Iesu Nasareta, ia tau wa arimiu eai Eaubada i hedebasae laulau gigiboridi eai, eo laulau noonoodi, eo heiheinoidi hinage ia nimana eai Eaubada i ginauridi boeamiu eai, doha hinage abina au atao wa—

²³teina Iesu ta se moselaei, doha Eaubada mumuga eai dobilana i nuatunonohaiyao, ia aue abi, nimamiu baaeadi eai au hesatauro, eo au unuhemate.

²⁴Na Eaubada i hetorouioi mate amamnadi eai ie iairihai, paana ede mate ia taba nige i abididini.

²⁵Doha Davida enana i ribao, i ene, ‘Guiau matagu eai ea iita, huia gamagari, ia nima‐tutugu eai, arinai nige ea moimoiu;

²⁶arinai nuagu i lolo, memenagu ie kode; egu sunuma eai bulumagu abo i aiyawasi.

²⁷Paana taba nige earuagu u nuagabaei Hade eai, taba nige u eari em Hetabu Tauna bulumana i posa.

²⁸Mauri dobilana oa u heitaguo; oa nuanuam eai abo ea kode ariariri.’

²⁹“Egu tataoyao e, urutubuda Davida ribana bena ea heribakomakomanimiu, ia i mateo eo se toreyao, ia bousana ita arida eai, i laoma e huia ta.

³⁰Paana ia peroveta, i nuatuiyao hinage Eaubada ia arinai i aigorayao i ene, ia bogana eai esau abo i tubuma, ena terona potana eai abo i bawa,

³¹i itanonohaiyao Keriso ena torouio, ribana i ribaei hinage i ene ia Hade eai earuana taba nige se nuagabaei, ia bulumana taba nige i tatagorigori (Psa. 16.10).

³²“Eaubada wau Iesu wa i hetorouioi, ai gamagarimai matamai eai ai itayao.

³³Ia se hedebasae Eaubada nimatutuna eai ie bawa, Tamana ena ribahesunuma, Earua Tabuna wa, i abiyao, iaede i hegoidobeama, doha wau au itayao, eo au ataieyao.

³⁴Davida sora nige i awasae galewa eai; na iabom mo i ene, ‘Guiau i ribalau egu Guiau arinai, Oa nimatutugu eai u bawa,

³⁵i lau e am waiunuyao ea abidi se hemala aem ana bou.’ (Psa. 110.1).

³⁶Arinai omi Isaraela numamiu gamagarimiu au nuatui komakomani wau Iesu omi au hesatauro wa, Eaubada i abi i hemala Guiau, eo i hemala Keriso hinage.”

³⁷Riba ne se ataiei, atedi se taigari, se ribalau Petero eo aposotolo aridi eai, si ene, “Omi tatao e, eo ema tataoyao e, ai abo ai saha?”

³⁸Petero i ribalau isi aridi eai i ene, “Nuamiu au buidi, esau, esau, abo se hebapatisoimiu Iesu Keriso esana eai, baaea aba‐ribagigirina ede, ainauia abo au abi, iaede Earua Tabuna.

³⁹Paana ribahesunumana ede enamiu, eo nanatumiuyao enadi, eo isi taumia eda lohaloha eai enadi, isi gamagaridi esau, esau, Guiau eda Eaubada abo i eogai ia arinai.”

⁴⁰Riba gamagaridi hinage i ribaedi, arinai i heatadi eo i headidiridi, i ene, “Isina baaeana eai ta au hemauriuioimiu.”

⁴¹Arinai isi ena riba tauataiei se hebapatisoidi, ma nualolodi; nei asubenana ne doha tatao tausani haiona se patulau aridi eai.

⁴²Se moseuioidi aposotolo edi laulauheata arinai, eo edi heoiesega abiabina, areto se ihiihi, eo se uura hinage, ma nuaadidiridi.

⁴³Isi gamagaridi, esa eo esa, matausi i hearodi; aposotolo gigibori gamagaridi, eo heiheinoidi, se ginauridi.

⁴⁴Isi gamagaridi tauataiena se miagogo, edi ginauri gamagaridi se abidi gonogonoadi;

⁴⁵edi oea se unedi, eo edi gogo hinage se soiedi tatao gamagaridi se heona gonogonoadi.

⁴⁶Asubena gamagaridi se laulaugogo numa uura eai, eo se lau hari numa, hari numa, areto se ihi, aiai se ai, nuadi se lolo, eo nuadi esega.

⁴⁷Eaubada se hedebasae, eo tatao gamagaridi se nualoloedi. Na asubena gamagamagari Guiau headi i hepatulaedi ekalesia eai, isi taumauri wa.