Leviticus 27:23-34

²³ne ebeliyan heini te memumuhat te vali he ibasi ziyà te kahabet te menge tuig he human egkeuma is Tuig te Kebeǥey te Bayàbayà wey Ked-ulì. Kinahanglan he segugunà heini edlekata. Is bayad he idlekat din kayi gaked en te Nengazen.

²⁴Dutun he Tuig te Kebeǥey te Bayàbayà wey Ked-ulì, haazà he tanà id-ulì diyà te teǥiǥaked he mibelegyà duen.

²⁵Is langun he prisyu te menge inhalad diyà te Nengazen kinahanglan he ziyà ibpesikad te keveǥat te pelata ziyà te timbangan he egemiten te menge memumuhat.

²⁶Is egkehuna he anak te uyaǥen ne ǥaked te Nengazen, umbe kenè en heini kinahanglan he idhalad diyà te kandin su zaan he kandin.

²⁷Emun meremerik haazà he uyaǥen, ne egkehimu he edlekaten te teǥiǥaked. Beyazi zin is bali zutun te uyaǥen ne umani zin pa haazà is bali zin te 20 pursintu. Ne emun kenè din heini edlekaten ne ibelegyà heini te menge memumuhat sumalà te imbali kayi.

²⁸Kenà egkehimu he ibelegyà etawa edlekaten is minsan hengkey he azen he kenè en duwazuwa is kedhelaza zuen diyà te Nengazen, etew man etawa uyaǥen etawa tanà he nepengevilin. Gaked en heini he Nengazen.

²⁹Is etew he kenà duwazuwa is kedhelaza zuen diyà te Nengazen kenà egkehimu he edhewien. Kinahanglan heini he edhimetayan.

³⁰Is ikesepulù he vahin te langun he menge sebpet, ne ǥaked te Nengazen

³¹emun edhewien te etew is ikesepulù he vahin te sebpet, kinahanglan he ebeyazan din is bali kayi ne umani zin pa haazà is bali te 20 pursintu.

³²Emun ebilang kew te vaka niw, kerehidu niw, etawa kambing niw, is ikesepulù kayi iveǥey niw ziyà te Nengazen.

³³Kinahanglan he kenè niw heini pilia etawa liwai. Emun edliwaan niw heini, ne haazà is uyaǥen he edliwaan niw wey haazà is idliwè niw, ne pudu egkehimu he ǥaked te Nengazen ne kenè en heini egkehimu he edhewien.

³⁴Iyan heeyan menge suǥù he imbeǥey te Nengazen ki Moises diyà te Buntud he Sinai he para te menge Israilihanen.