Leviticus 14:41-50

⁴¹Ne ebpekeǥisan din is langun he elavat diyà te seled dutun te valey ne is langun he kinaǥis ibpetimbag din diyà te gawas te inged, diyà te lugar he edtimbaǥan te ed-isipen he meremerik.

⁴²Ne ebpekuwa sikandin te para idliwan dutun te elavat he mibpen-awà.

⁴³Iyan, emun kegkepasad dutun ed-umanan pa edheb-unga haazà is baley,

⁴⁴ne ed-umanan heini ebeyai te memumuhat su wey zin mesusi. Ne emun midelandap is hab-ung, ne ed-isipen en he meremerik haazà is baley, su heini he kelasi te hab-ung ne ebpenhalin.

⁴⁵Umbe, iperundus din heini he valey ne is menge pengawid kayi, idtimbag diyà te ǥawas te inged, he timbaǥà te ed-isipen he meremerik.

⁴⁶Is minsan hentei he midseled dutun he valey hein midlekevan pa ne ed-isipen he meremerik taman te kebmerusirem.

⁴⁷Is minsan hentei he edlipezeng etawa egkaan diyà te seled kayi he valey kinahanglan he ebpìpian din is bisti zin.

⁴⁸Iyan, emun egkesusi zuen te memumuhat he wazè en umana heb-unga haazà is baley hein neliwanan en te elavat sikan is midhab-ung he elavat, ne ebpesayud haazà is memumuhat he lumpiyu haazà he valey su wazè en heb-unga.

⁴⁹Ne para isipe en haazà he lumpiyu en he valey, egkuwa is memumuhat te zezuwa he tagbis, kayu he sidru, merudtem he hulibis, wey hisupu.

⁵⁰Edhimetayan din is sevaha he tagbis diyà te zivavew te ziniyun he midteǥuan te wahig he ebpuun diyà te serebseb.