Levitico 24

1

2

3

4

5

6

10

16

23

24

¹Ãcõrẽba Moisea jarasia:

²–Israelerãa jaradua olivo draga idji awa quiruda bʌmaa enenamãrẽã. Maʌ̃ olivo dragaba mʌ̃ ded̶e ĩbĩrãra quewaraza coad̶ia.

³Mʌ̃ ded̶e eatʌ jira b̶ʌ wua nocoare Aaroʌ̃ba ĩbĩrãra quewaraza coa b̶ʌya urua b̶amãrẽã ab̶a ʌ̃nadrʌbʌrʌd̶aa. Id̶iba ʌ̃taa bãrãneba yõbʌdarãba naʌ̃ bed̶eara ĩjã od̶ida panʌa.

⁴Ĩbĩrã b̶ʌbada oro idji awa quiru od̶a jʌwateza ĩbĩrãra mʌ̃ quĩrãpita quewaraza coad̶ida panʌa.

⁵Dji biara b̶ʌ harinada edad̶aped̶a paʌ̃ra doce ãbud̶adua. Paʌ̃za harinara eped̶eco jũgurua umé b̶aida b̶ʌa.

⁶Maʌ̃ paʌ̃ra mesa oro idji awa quiru od̶ad̶e Ãcõrẽ quĩrãpita errecama umé b̶ʌd̶adua. Errecamaza sei paʌ̃ b̶ʌd̶adua.

⁷Errecamaza orrocawa incienso quera idji awa quiruda cob̶ʌd̶adua. Maʌ̃ querara dji paʌ̃ cacuabari Ãcõrẽa bá diaya. Maʌ̃ quera bá diabʌrʌba acʌbiya paʌ̃ra jũma Ãcõrẽa dia b̶ʌda.

⁸Ʌ̃nãũbada ewariza paʌ̃ djiwid̶ida Ãcõrẽ quĩrãpita b̶ʌd̶ida panʌa. Ãcõrẽra israelerã ume bed̶ea b̶ʌd̶a bẽrã id̶iba ʌ̃taa mãwã od̶ida panʌa.

⁹Maʌ̃ paʌ̃ cacuabari querara Ãcõrẽa bá diai bẽrã jũma maʌ̃ paʌ̃ra Ãcõrẽ itea b̶eya. Maʌ̃ bẽrã ab̶abe Aaroʌ̃ba, idji warrarã bid̶a arima cod̶ida panʌa.–

¹⁰Ẽberãda b̶asia. Dji papara Israeld̶ebema basía baribʌrʌ dji zezara Egiptod̶ebema basía. Ewari ab̶a maʌ̃ ẽberãra israelerã tãẽna pʌrrʌad̶e wãsia. Pʌrrʌa nĩne idjira ẽberã Israeld̶ebema ume djõsia.

¹¹Djõ panʌne idjia Ãcõrẽda biẽ́ jarasia. Maʌ̃ carea israelerãba idjira Moisemaa edesid̶aa cawa omãrẽã. Maʌ̃ ẽberã papara Daʌ̃neba yõna Dibri cau Selomí basía.

¹²Maʌ̃ ẽberãra jida eropanesid̶aa ab̶a Ãcõrẽba cawabibʌrʌd̶aa sãwã od̶ida panʌda.

¹³Maʌ̃ne Ãcõrẽba Moisea jarasia:

¹⁴–Jãʌ̃ ẽberã mʌ̃ biẽ́ jarad̶ara bãrã duanʌmaʌba ãyã eded̶adua. Jũma idjia mʌ̃ biẽ́ jara b̶ʌ ũrĩped̶ad̶aba ãdji jʌwara idji boro ʌ̃rʌ̃ b̶ʌd̶ida panʌa acʌbid̶i carea wãrãda bed̶ead̶e b̶ʌda. Mãwãnacarea jũmarãba idjira mõgaraba tab̶ari bead̶ida panʌa.

¹⁵Israelerãa nãwã jaradua: “Bariduaba mʌ̃da biẽ́ jaraibʌrʌ, idjira bed̶ead̶e b̶ʌ bẽrã beuida b̶ʌa.

¹⁶Maʌ̃ bẽrã jũma bãrãba idjira mõgaraba tab̶ari bead̶ida panʌa. Mʌ̃ biẽ́ jarad̶ada Israeld̶ebema baibʌrʌ wa ãĩbema baibʌrʌ, idjira bead̶ida panʌa.

¹⁷Ab̶aʌda mĩã beaibʌrʌ, idji sid̶a bead̶ida panʌa.

¹⁸Ab̶aʌba djãrã animarãda beaibʌrʌ, maʌ̃ animarã bead̶abari ab̶arica animarãda djibaría diaida b̶ʌa.

¹⁹Ab̶aʌba djãrãda puoibʌrʌ, ara idjia puod̶a quĩrãca idji sid̶a puod̶ida panʌa.

²⁰Djãrã b̶ʌwʌrʌda b̶ʌasira, idji b̶ʌwʌrʌ sid̶a b̶ʌad̶ida panʌa. Djãrã dauda ãrĩsira, idji dau sid̶a ãrĩnida panʌa. Djãrã quid̶ada b̶ʌasira, idji quid̶a sid̶a b̶ʌad̶ida panʌa. Ara idjia djãrã puod̶a quĩrãca idji sid̶a puod̶ida panʌa.

²¹Ab̶aʌba djãrã animarãda beaibʌrʌ, maʌ̃ animarã cacuabari ab̶arica animarãda djibaría diaida b̶ʌa. Baribʌrʌ mĩã beaibʌrʌ, idjira bead̶ida panʌa.

²²Dji puod̶ara Israeld̶ebema baibʌrʌ wa ãĩbema baibʌrʌ, ab̶arica od̶ida panʌa. Mʌ̃ra bãrã Ãcõrẽa.”–

²³Moiseba jũma maʌ̃gʌra israelerãa jarasia. Mãwã jarad̶acarea ãdjirãba dji Ãcõrẽ biẽ́ jarad̶ara ãyã eded̶aped̶a mõgaraba tab̶ari beasid̶aa Ãcõrẽba Moisea jarad̶a quĩrãca.