Leevi 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Ɠɔoɠɔ GALAGI ɓɔɛni Moize ʋɔ, é ɠɛ ma:

²«Devei ve Izelayɛle nuiti zea, ga ti ʋa è ʋɔ ga wolive wulɔ ʋagɔi, kpɛtɛai fitinai vaa zu, naa ɠa a kɛ wo yeeyɛ fitinaiti ba, yeenɔpɛ ti mina za.

³GALA daaɠomi seɠe ʋɛlɛi wu, seɠe zuɠooza golai ɠakalaʋɛ, nii é zeele woo ɠesui ɠakalaʋɛ, miná ɠa Aalɔn a sei ná, fitinaiti ti so, é zo kpɔkɔi ma, eyɛsu geelaalao, Ɠɔoɠɔ GALAGI ɠaazu. Toɠa ga ɠɔoɠɔ tɔgi, wo-mavofodaiti kpein bɛ.

⁴Toɠa fitinaiti kɛʋele ɓɛtɛ, fitina zei anii ɠa, é ga zanu kitei, ti ɗa zo yeenɔpɛ Ɠɔoɠɔ GALAGI ɠaazu.

⁵«Ɗa ɓulu vukɔ ʋagɔi zeɠe, è ɓulu puugɔ maazu felegɔ (12) ɓɛtɛ, ɓului ɠilagilagi ɠa ɠɛ ga kilo lɔzita.

⁶Ɗa ti ɠɛʋele ɓɛtɛ zanu kitei ma laɓalii ɠa, Ɠɔoɠɔ GALAGI ɠaazu, ga seizu felegɔ.

⁷Ɗa ani maku nɛɛnɛ kitei ta ʋu seizu ɠilagilagi ma. Naa ʋolu ɗa ani maku nɛɛnɛ kitei ɠala Ɠɔoɠɔ GALAGI ɠaazu, ɓului ʋotogi zu, eɠɛ ɠizɛsui.

⁸Dooɠo foloi ɠilagilagi, ta ɗa ɓului naati kɛʋele ɓɛtɛ yeenɔpɛ Ɠɔoɠɔ GALAGI ɠaazu. Toɠa ga minazeɠegi é yɛsu ná ɠɔ, Izelayɛle nuiti ta-vaa zu.

⁹Ɓului naati ta ɠɛ ga Aalɔn ta ná-doun zunuiti tɔnɔ, ta ti mi ada ɲadegai ta, mazɔlɔɔ toɠa ɠɛ ti ʋɛ ga vebɛani ɲadega wolai, naati saama, niiti ti ɠalazu, Ɠɔoɠɔ GALAGI ɠaazu. Toɠa ga ɠɔoɠɔ tɔgi.»

¹⁰Yeeta, Izelayɛle anzanu ɠila ta Ezipete zunu ɠila, ti-loun zunui ʋaani Izelayɛle nuiti saama. Kpɔɛi leʋeni ti-ʋuuzuʋɛ, Izelayɛle anzanui naa ná-doun zunui ta Izelayɛle zunui ta ti yɔɠɔzu.

¹¹Izelayɛle anzanui naa ná-doun zunui woo ɲɔiti boni GALA daalɔɠɔma, é koto. Ti ʋaani la Moize ʋɔ. Dee laaseigi ɠɛni ga Selɔmite, Diɓeli ná-doun anzanui, Dan ná-bolodai zu.

¹²Ti makɛni ga pagɔ, eyɛsu deve zɔlɔɔ Ɠɔoɠɔ GALAGI ya.

¹³Ɠɔoɠɔ GALAGI ɓɔɛni Moize ʋɔ, é ɠɛ ma:

¹⁴«À woo ɲɔu wo nui ɠula wo-ʋuuzuʋɛ ʋa. Niiti kpein ti gooi mɛnigai, naati ti yeeiti pɛɛ unma, naa ʋoluma bɛbɛi kpein ge sɔ ga kɔtui, é za.

¹⁵Ɗa ɓɔɛ Izelayɛle nuiti pɔ ga, nu-o-nu a ná-GALAGI ɠotona, naama nui ɠa ná-kotoi ma ɠasɔi zeɠe.

¹⁶Zɔi nɔpɛ a woo ɲɔu wona Ɠɔoɠɔ GALAGI laaseigi laalɔɠɔma, ta naama nui ʋaa, bɛbɛi kpein ka sɔ ga kɔtui, é za, é ɠɛni ga seikɔɠɔma nu ɓaa zou loun, tɔɔzei é woo ɲɔi woga GALA daaseigi laalɔɠɔma.

¹⁷«Zɔi a nu ʋaana, ta naama nui ʋaa.

¹⁸Zɔi a sua ʋaana, toɠa potogi ve ga suai ta. Zɛnvui ʋoto ka ɠɛ ga zɛnvui.

¹⁹Ni nui ta a seiɲɔɠɔi maawanana, toɠa ɠɛ la, eɠɛʋelei tɔ ɓɔɠɔi é kɛa la ga zɔi.

²⁰Nii a nu ɠaei ɠale, naama nui ɠaei ɠa ɠale, nu ɠaazuɠɛzɛgi ʋoto ka ɠɛ ga nu ɠaazuɠɛzɛgi, nu ɲiiga ʋoto ka ɠɛ ga nu ɲiiga. Ta naama maawanai ɠɛɠalai ɠɛ ga naa, nii é kɛa ga zɔi.

²¹Zɔi a sua ʋaana, toɠa potogi ve. Kɛlɛ zɔi a nu ʋaana, ta naama nui ʋaa.

²²«Tɔ gilagi nɔ ɠa seiɗai wo ma, seikɔɠɔma nu ʋɛɛ zou loun ʋa, mazɔlɔɔ nà ga Ɠɔoɠɔ GALAGI, wa-ƓALAGI.»

²³Moize ɓɔɛni Izelayɛle nuiti pɔ. Ti woo ɲɔu wo nui ɠulani ti-ʋuuzuʋɛ ʋa, ti sɔ ga kɔtuiti, é za. Izelayɛle nuiti ti kɛɛni ɠana, eɠɛʋelei Ɠɔoɠɔ GALAGI ma levei veeni la Moize ya.