1Bab-Jehová Moisésʼga weyob igar uksad:
2“Bela Israel-dulemar-bukwadga be sunmako, ega be sogo: ‘Bemar gwage-swilidik-gudii gumalo, ar ande be-Bab-Dummad-Jehová gwage-swilidik gued.
3Bemar be-babgi, degi, be-nangi, binsaed-nikaa nanamalo. An-obunnoged-ibagi, be obunnodii nanamalo. Ani an bemar-Bab-Dummad-Jehová gued.
4Melle bab-dummadsurmalad-e-nug be odummomalo, deginbali, melle ibmar-esgoro-dualedgi-sobaled be-bab-dummadga be imakmalo. Ani an be-Bab-Dummad-Jehová gued.
5” ’Gwenatigwar-guega be Bab-Jehováʼga ibmar uksokalile, nuedgi ega be ukoed, adi, Bab-Jehová we-ibmar-uklenaid nuedgi abingaegar.
6Uklesad-ibagi we-ibmar-uklesad be gunnoed, deginbali, sunna banedgine be gunbalid. Ar amba ibapaagi we-ibmar gwabgusale, adi, soogi be ogumakoed.
7Ar we-ibmar ibapaagi gullegele, we-ibmar isganaga guoed. Bab-Jehová we-ibmar abingaosulid.
8Ar dule-we-ibmar-guchad, na e-isgued dukin-sedii guoed, ar ade, Bab-Jehováʼga-ibmar-swilidikid-uklesad, ibmar-isgana imaknonikid. We-dule, e-dulemar-abargi onolegoed.’ ”
9Bab-Jehová Moisésʼga sogdebalid: “Israel-dulemarga be sogo: ‘Be-nainugi ibmar-gwag be wealile, melle be-nainugi bela ibmar-gwag be weo, deginbali, ibmar-gwag-napagi batisad, melle bar be subalo. Ar we-ibmar-gwag-argwachamalad dule-wileganaga, degi, Israel-dulesulidmarga be obegoed.
10” ’Melle be-uva bela ise-wear be imako, deginbali, uva-napagi-argwachamalad, melle bar be subalo. Ar we-uva-argwachamalad dule-wileganaga, degi, Israel-dulesulidmarga be obegoed. Ani an be-Bab-Dummad-Jehová gued.
11Melle ibmar be atursao. Melle be gakansao. Melle na be muchub-muchub yardakmalo.
12Melle an-nuggi be ise-sogar-sogo: An ibmar imakoye. Ar degiile, be-Bab-Dummad-nug be oichogoed. Ani an Bab-Jehová gued.
13Melle be-dulemar be aporsao, deginbali, melle e-ibe be ibmar atursabalo. Dule-bega-arbaed yog be bennukar imako, melle banedse e-ibe be mani gao.
14Melle dule-uaya-yalliled be ukabsao. Deginbali, melle dule-ibyasulid ibmargi-yolegega be imako. Bur be be-Bab-Dummad-dobee nanadii guo. Ani an Bab-Jehová gued.
15Igar-nabolenaile, igar-innikigwadba be imako. Melle dule-wilegedba be nai guo. Deginbali, melle dule-mani-nikadba be nai gubalo. Dulemarga igar-innikigwadba be igar-nabogo.
16Melle be dulemargi yogasaar sunmako. Melle dule-baid-oburgwedgi be binsao. Ani an Bab-Jehová gued.
17Melle be-gwenad be isdar dako. Dule-baid isgusale, ega be bakar ibmar soge, adi, melle e-isgusadba be nagumogagar.
18Melle be-dulemar be buged-mai imako, deginbali, melle isdar-dakdii be gubalo. Ar igi na be san-sabgue, deyobi dule-baid be sabgumogoed. Ani an Bab-Jehová gued.’ ”
19Bab-Jehová Moisésʼga sogdebalid: “Israel-dulemarga be sogo: ‘Bab-Jehová-Igar-Mamaidba be nanadii gumalo. Melle be-moli-bebe-nikadmar ibdurgan-baidbo be onakdii guo. Melle be-nainu-gwensakgine, ibmar-gwag be akar-akar digo. Melle dub-baid-baidgi-oburar-mor-makaled be yoo.
20” ’Ar dule-gwensak, ome-maiga-gudiid-sui-nikusokalidbo negsichigi galagwensuli nanasale, ar amba we-ome yoo manigi onolegele, deginbali, amba yoo maiga-gudiidgi ollorgubalile, ebobela sabsur-odurdaklemaloed. Degi-inigwele, oburgwilegosurmalad, ar ade, ome, amba yoo maiga-gudiidgi ollorgued.
21We-machered, na e-isgusad-ular, sibad-wawaad-machered Bab-Jehováʼga ukoed. We-sibad-wawaad-machered Bab-Dummad-dulemarbo-ambikued-neg-yawagakse sedoed.
22Geb dule-irwa-Bab-Dummadse-goled, we-sibad-wawaad-machered isgusad-ular-uklenaidgi, Bab-Jehováʼga sogoed, we-dulega isgued eliye. Weyobi, dulega, e-isgued elilenonikoed.
23” ’An-bemarga-yar-uknaidse bemar dogsale, agi bemar sapi-nabir-gullemalad-digsale, gebe we-sapimar-sanmakoed birgapaa be gunnosurmalad, ar ade, we-sapi-e-san bemarga isganaga guoed.
24Birgabakegwadgine, bela we-sapi-e-san Bab-Jehová-nug-odummogega Bab-Jehováʼga nugsalegoed.
25Geb birgataledgine, sunna bemar we-sapi-e-san gunmaloed. Deyobi, we-sapi bela-bela bemarga sanmakdoed. Ani an bemar-Bab-Dummad-Jehová gued.
26Melle san abebi be gunmalo. Melle ibmar-wilubgan-dakedgi yoedse-ibmar-guoed-sogdii be gumalo. Melle nia-igar-dule-oichogedgi arbao.
27Melle sailagia orokwaa be sikmalo. Deginbali, melle be-siga-e-duku be sikbalo.
28Dule-burgwisad-ular, melle be-san na be daas-daas imako, deginbali, melle be-sangi ibmar yogasaar narmakar be sobo. Ani an Bab-Jehová gued.
29Melle be-sisgwa gambanuchuga be imako, adi, melle be-sisgangi we-igar-isgana dogega. Ar degiile, be-yala bela-bela isgudoed.’ ”
30Bab-Jehová Moisésʼga sogdebalid: “Israel-dulemarga be sogo: ‘An-obunnoged-ibagi be obunnomalo, degi, anse-goled-neg melle neg-isganayob be dakmalo, egi be binsaed-nikaa damalo. Ani an Bab-Jehová gued.
31” ’Melle dule-burwarmaladbo-sunmakmarye-sogmaladse be idakmalo. Deginbali, melle burba-isganase-gormaladse be idakmarbalo. Ar deyob be imakmalale, eba be isgumarmogoed. Ani an be-Bab-Dummad-Jehová gued.
32Dador begi danikile, iduale be gwichibin imako. Dadormargi be binsaed-nikaa dao. Be-Bab-Dummad-dobee be nanao. Ani an Bab-Jehová gued.
33” ’Dule-yar-baidsikid bemar-yargi-megnonikile, melle be sabsur-imakmalo.
34We-dule-bemar-abargi-maidi, be-negginedyob be dakmalo. Ar bemaryobgusoggu, be nue sabgumalo. Be insamalo, Egipto-yargi, be-yarsulidgi, be deyob gudii gusmarmogad. Ani an bemar Bab-Dummad-Jehová gued.
35Igar-nabolenaidgi, igar-maidba inniki be imako: Melle napaneg-wilubsalenaidgi, be galakuar wilubsao. Melle ibmar-oaidikunaidgi, be galakuar oaidikuo. Melle ibmar-mergu-urbilegedgi, be galakuar urbo.
36Ibmar-wilubdaked-nued, nibir-nued, degi, ibmar-wilubsaed-nued be ebumalo. Ani an be-Bab-Dummad-Jehová gued. An Egipto-yargi be-onosadid.
37” ’Degisoggu, bela an-igar-mamaidba be ibsamalo. Bela an bemarga igar-uksadba be ibmar imakmalo. A-sogedba be nanadii gumalo. Ani an Bab-Jehová gued.’ ”
