Kinera Koari na Kinerakera 7:6-13

⁶Kei! Nake bulebule meke leleamu hola si agoi! Agoi qua tataru, agoi poni nau qinetuqetu si arau!

⁷Sa tinimu si guana huda manioko, meke sari susumu si guana karua vua manioko.

⁸Zama si rau, “Maqu haele ia sa manioko; maqu taṉini vagi sari na vuana.” Sari susumu si madi gua rina katakata qurepi. Sa siniṉo tamugoi si humaṉa lea guana apolo,

⁹meke sa ṉuzumu si guana vaeni ta tavete va leanana. Sa Vineki Mani totolo la sa vaeni koasa qua babaere, gotolo hola ni sa sari beruna na livona.

¹⁰Arau si tanisa qua babaere, meke sa nana hiniva si arau mo.

¹¹Mae, qua babaere, mada la pa kali popoa, mada la va hola boṉi koari na vasileana hitekedi.

¹²Mada topue vaqavaqasa la koasa inuma vaeni pude mada dogoria be ele liho sari na vaeni, babe ele pelara sari havorodi, meke be ele havoro sa pomeqaraneti. Vasina kote vatu nia rau sa qua tataru koa goi.

¹³Sari karoso madariki si tivusu humaṉa lea, meke sari vuvua lomosodi si pa nada sasada, sari vua vaquradi meke vua koadi, sapu va naqiti ponigo rau si agoi, qua babaere.