Kàddu yu Xelu 1:1-28

¹Kàddu yu xelu yu Suleymaan buurub Israyil, di doomu Daawuda.

²Li ko taxa jóg di nit ñi am xel mu rafet, am ab yar, ngir xam wax ju lal dég-dég,

³ngir yaru ci jëfe xel ak njub ak yoon, di jubal,

⁴ndax ab téxét di foog, ndaw li it xam tey xalaat.

⁵Na boroom xel mu rafet déglu, yokk dég-dégam, te kiy ràññee di jariñoo ay tegtal,

⁶ngir mana xam aw léeb aku taas ak kàddug boroomi xel yu rafet ak seeni cax.

⁷Ragal Aji Sax ji di njàlbéenu xam-xam, te xel mu rafet akub yar, dof yaa ko xeeb.

⁸Doom, toppal yaru baay, te bul wacc ndigalu yaay.

⁹Kaala gu jekk la ci bopp, di gànjar ci baat.

¹⁰Doom, bàkkaarkat bu la xiirtal, lànkal.

¹¹Dañu la naan: «Dikkal, nu tëruji bakkan, yeeruji jaambur bu deful dara.

¹²Nanu mel ni njaniiw, mëdd kuy dund, mu jekki tàbbi biir bàmmeel.

¹³Mboolem alal ju réy, nu jagoo, yeb sunu biir kër, mu fees.

¹⁴Dikkal nu far, mbuus miy benn, nu bokk.»

¹⁵Doom, bul ànd ak ñoom ciw yoon, bul jaare fa ñuy jaar,

¹⁶ngir dañuy xélu, nar musiba, di gaawtuy sànk bakkan.

¹⁷Doo firib caax, ba jàpp njanaaw luy xoole.

¹⁸Ñii kat seen bopp lañuy fiir, seen bakkanu bopp lañu sànk.

¹⁹Képp kuy lekk lu lewul, nii lay mujje: wutin wu lewul jël bakkanu boroom.

²⁰Xel mu Rafet a ngay woote ca mbedd ma, di xaacu ca pénc ma.

²¹Ma ngay wootee bérab yu gëna xumb, di dégtaley kàddoom, bunt dëkk ba.

²²Ma nga naan: «Moo téxét bi, foo àppal sa téxét gi? Ñaawlekat bi, foo àppal sa ñaawle bi? Dof bi, ñaata yoon ngay bañ xam-xam?

²³Soo dëppee ba déglu, ma àrtu la. Ma ne, kon ma xellil la samam xel, xamal la samay kàddu.

²⁴Damaa woote, nga gàntal, ma tàllal loxo, faaleesu ma.

²⁵Sofental nga samay digle, nanguwoo samay àrtu.

²⁶Kon boo sëngéemee, man it ma ree, njàqare dab la, may textexi.

²⁷Njàqare di ngëlén, dab la, sa musiba def callweer, buub la, njekkar ak fitna dal la.

²⁸Keroog nga woo ma wall, duma wuyu, nga seet ma, seet, doo ma gis.