Proverbs 1:1-28

¹Batoga imi Israel nunga king Solomon, David ko namar, mu ko ikia sinar den ningi aniso.

²Den imi ikia sinar se bagara diram te ningo la bagara ko munan mu ka kausokko; nika ikia sinar awurok se den ko nunguning du biya mu ko ikiko.

³Ale ikia ago la baga se munan diram la se ningo guyak la te bagerko.

⁴Ale ikia ninguru me sinarara alo wore nunga kiti gurugok se me ngual kasik bagamonko; ale kulak itiwik nunga kausok se ikia ago la te bagamonko.

⁵Se ikia sinar ago mu agotala nunga sanguk, nunga kiti gurugok, ale nunga ikia kunasarukko.

⁶Se nuna ikia sinar ko den se den pangan mu ko nunguning ko sinar amon ale ko ikimonko.

⁷Yawe ko kua bowa ningi la bagara ko munan mu ikia sinar te ta ko lage kuring nunguning; bare nusupuling aora biya alo mu ikia sinar ko den se diram bagara ko den mu mel yam ko betesan.

⁸Aga namar, ni ka niet ko kiti guruga ko den ikiko, ale ka niam ko kausa den me biring tuiko.

⁹Nononga den umu kitigat balayam yawara sipiling te tugu kam, se aking kulolo balayam degetak te tugukoyam anirukko.

¹⁰Se aga namar, kari memek alo gemang kulukurmon mu me arungu kapeterko.

¹¹Nuna balmon, “Nangarak tair se ana namanak yumuwa kari yam bo am monak se kueruk se

¹²am ngual kasik nunga maguwunak silatanak se kua namamon ale nungumik guang lilim ago mutim ningi kapa nagumonko;

¹³se nunga mel ningo ningo ginak ago tai nanga kawam tugunakko;

¹⁴buta se nangarak tair se mel ginak mu pagaru nanimi tunakko,” mamon.

¹⁵Bare aga namar, kari uwuta mu arungak me sorerko, nika bagara ago kelemak bagerko;

¹⁶mu awuk, nuna kilek memek betemonko me nguangasan, am betesan; ale kari momon se kuerukko mu am guyak la betesan.

¹⁷Ikiko! Inangnang bo karkiwuruk se ni nu te ilupko dagarok bitar, mu te ilup i? Mena!

¹⁸Uwutatala, kari uwuta mu ikia mena; se nuna nongota nunga dagarok te soramonko wore bitawasan.

¹⁹Buta se tere daong nana ko kari alo mu tere daong ko munan te kuemonko.

²⁰Ikia Sinar aiwoso; nu lage tuang suen la te se, kariimet ningi sor suen la te aiwoso;

²¹nu diara guruga kuwim te se, bolala awura kuwim te aiso ale balso:

²²“Nina kariimet ikia aora biya, nina amaru ikia ngualara sowore bita talko? Ale amaru den alel bita lagasan sumu bita talko? Ale amaru ikia ningo me karo tusan mu karo tualko?

²³Nina aninga den sokel karogo ningarukasam mu iki karo tuman le mu, aninga ikia ningo se aninga den ningo mu ninga kausem le.

²⁴Ani agate tairalko ninga manarukasam, bare nina nibiring aisukasan ale agiring me karo tuikasan.

²⁵Nina aninga sangam den nibiring tuman, ale den sokel ago ninga manarukasam mu nede sisikaso.

²⁶Se ko moke, tom nina ikup arigal ale ngualaral sipiral, mu ani nego ko gusirekko.

²⁷Tom ikup yaman mu daula biya bo iwita ninga iluwok ale ninga sarumurok se ko memek biya ninga irok, mu ani ninga gusirekko.

²⁸“Nina saonga ko aningate airal, bare ani nigiring me iluwekko; nina ani ago ko loagaral, bare me agarkalko.