Juan 6:25-40

²⁵Echiriꞌ xebꞌopon ri winaq chꞌaqa mar, xeꞌkiriqa ri Jesús y xkitzꞌonoj che: —Lal tijonel, ¿jampa xkꞌun la wara? —xechaꞌ.

²⁶Ekꞌu ri Jesús xubꞌiꞌij chike: —Paqatzij wi kambꞌiꞌij che alaq: Kintzukuj alaq xa ruma lik xwaꞌ alaq chi utz y xnoj alaq chi utz, na e ta ruma xmaj alaq usukꞌ taq ri kꞌutubꞌal re ruchuqꞌabꞌ ri Dios nuꞌanom loq.

²⁷Maya kꞌu ibꞌ alaq che utzukuxik ri wa xa kakꞌisik; e lik yaꞌa ibꞌ alaq che utzukuxik ri wa na kikꞌow ta kꞌana uqꞌij, ri kuya kꞌaslemal na jinta utaqexik. Yey ri kayaꞌw waꞌ che alaq, e Ralaxel Chikixoꞌl Tikawex, ri chaꞌtal lo ruma ri Qaqaw Dios re kuꞌan waꞌ —xchaꞌ.

²⁸Xkitzꞌonoj kꞌu che: —¿Saꞌ taq ri kaqaꞌano chaꞌ e kaqaꞌan janipa ri karaj ri Dios chiqe? —xechaꞌ.

²⁹Ri Jesús xukꞌul uwach: —Ri karaj ri Dios kaꞌan alaq, e ri kakubꞌiꞌ kꞌuꞌx alaq rukꞌ ri jun utaqom lo Rire —xchaꞌ.

³⁰Ekꞌuchiriꞌ xkitzꞌonoj che: —¿Saꞌ ri kꞌutubꞌal re ruchuqꞌabꞌ ri Dios kaꞌan la chiqawach chaꞌ kaqilo y jelaꞌ kakubꞌiꞌ qakꞌuꞌx ukꞌ la? ¿Saꞌ ri kariq la uꞌanik?

³¹Ma ri qatiꞌ-qamam ojertan xkitij ri maná pa ri luwar katzꞌintzꞌotik, jelaꞌ pachaꞌ ri kubꞌiꞌij Ruchꞌaꞌtem ri Dios: Xuya pam chike, y waꞌ petinaq chilaꞌ chikaj —xechaꞌ.

³²Ri Jesús xukꞌul uwach: —Paqatzij wi kambꞌiꞌij che alaq: Na e ta ri Moisés xyaꞌw re ri pam petinaq chilaꞌ chikaj; e ri Nuqaw ri kayaꞌw ri saqil pam kape chilaꞌ chikaj.

³³Ma ri Pam kuya ri Dios e ri jun petinaq chilaꞌ chikaj, ri kayaꞌw kꞌaslemal chike ri tikawex —xchaꞌ.

³⁴Xkitzꞌonoj kꞌu che: —Qajawal, yaꞌa ko la qeꞌoj riꞌ laꞌ la pam ronoje qꞌij —xechaꞌ.

³⁵Ri Jesús xubꞌiꞌij chike: —In ri in pam kuya kꞌaslemal. China ri kape wukꞌ riꞌin, na kutij ta chi numik; y china ri kakubꞌiꞌ ukꞌuꞌx wukꞌ, riꞌ na kachaqij ta chi kꞌana uchiꞌ.

³⁶»Pero e pachaꞌ ri nubꞌiꞌim chi lo che alaq: Ralaq na kakubꞌiꞌ ta kꞌuꞌx alaq wukꞌ, tobꞌ ne ilom alaq nuwach.

³⁷Ma konoje ri keyaꞌiꞌ chwe ruma ri Nuqaw, kekꞌun wukꞌ riꞌin; yey china kꞌu riꞌ ri kape wukꞌ riꞌin, na kanmachꞌaj tubꞌi.

³⁸»Riꞌin na ximpe ta chilaꞌ chikaj xa re koꞌlnuꞌana ri kuaj riꞌin, ma e in petinaq re koꞌlnuꞌana ri karaj ri Jun xtaqaw lo we.

³⁹Yey ri karaj ri Nuqaw, ri xintaqaw loq, e na kanjam ta kan junoq chike ri ebꞌuyaꞌom Rire chwe; ma e kenukꞌastajisaj lo konoje waꞌ chupa ri kꞌisbꞌal qꞌij.

⁴⁰Ekꞌu ri lik karaj ri Nuqaw, ri xtaqaw lo weꞌin, e waꞌ: Konoje ri tikawex, ri kakiya ri kiwach wukꞌ ri in Ukꞌajol ri Dios y kakubꞌiꞌ kꞌu kikꞌuꞌx wukꞌ, kakꞌojiꞌ kikꞌaslemal na jinta utaqexik. Ekꞌu riꞌin kenukꞌastajisaj lo chikixoꞌl ri ekaminaq chupa ri kꞌisbꞌal qꞌij —xchaꞌ.