San Juan 6:25-40

²⁵Dan me se nariꞌ nij soꞌ man Jesucristó chumanꞌ Capernaum, ga̱a ne̱ xnáꞌanj nij soꞌ man soꞌ, cataj nij soꞌ: ―Me aman caꞌnáꞌ so̱ꞌ nihánj, ga̱ maestroꞌ ―taj nij yuvii̱, xnáꞌanj nij soꞌ man Jesucristó a.

²⁶Ga̱a ne̱ cataj Jesucristó rihaan nij soꞌ a: ―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa nuveé cheꞌe̱ se queneꞌen soj nij suun sa̱ꞌ noco̱o quiꞌyáá ꞌu̱nj me nanoꞌ soj manj maꞌ. Ma̱a̱n cheꞌé se chá soj rachrúún yoꞌ ne̱ caraa rque soj roꞌ, cheꞌé dan nanoꞌ soj manj ei.

²⁷“Se̱ guun quiꞌya̱j suun soj cheꞌé ina̱nj se cha̱ soj maꞌ. ꞌO̱ se vaa güii, ne̱ quinavi̱j nu̱ꞌ nij rasu̱u̱n yoꞌ na̱nj ado̱nj. Cheꞌé dan quiꞌya̱j suun soj cheꞌé se vaa quiꞌya̱j cavi̱i̱ sa̱ꞌ nimán soj, ga̱a ne̱ ga̱a̱ iꞌna̱ꞌ ya̱ nimán soj nu̱ꞌ cavii nu̱ꞌ caꞌanj ei. ꞌU̱nj si̱j caꞌnéé Diose̱ ni̱caj yuꞌunj man yuvii̱ me síí rque̱ se sa̱ꞌ yoꞌ rihaan soj ei. ꞌO̱ se Réj Diose̱ me síí cataj se vaa caꞌve̱e qui̱ꞌyáj da̱nj cheꞌé soj ado̱nj ―taj Jesucristó rihaan nij yuvii̱ a.

²⁸Cheꞌé dan cataj nij yuvii̱ rihaan soꞌ a: ―Me suun quiꞌya̱j suun núj, rá Diose̱ ga̱ ―taj nij yuvii̱ a.

²⁹Ga̱a ne̱ cataj Jesucristó rihaan nij yuvii̱: ―Nihánj me suun me rá Diose̱ quiꞌya̱j suun soj, se vaa cuchuma̱n rá soj ni̱ꞌyaj soj mán ꞌu̱nj si̱j caꞌnéé soꞌ rihaan soj ado̱nj ―taj Jesucristó rihaan nij yuvii̱ a.

³⁰Cheꞌé dan cataj nij yuvii̱ rihaan soꞌ a: ―Sese da̱nj vaa, ne̱ me suun sa̱ꞌ noco̱o qui̱ꞌyáá so̱ꞌ queneꞌe̱n núj, ga̱a ne̱ cuchuma̱n rá núj ni̱ꞌyaj núj mán so̱ꞌ ga̱.

³¹Dan me se quiꞌyaj Diose̱ suun sa̱ꞌ noco̱o ga̱a naá, ne̱ xi̱i níꞌ me se chá nij soꞌ se cuꞌna̱j maná ga̱a chéé nij soꞌ rej tacaan, quiꞌyaj Diose̱ ga̱a naá, ne̱ dan me se danj Diose̱ taj se vaa nanij se chá rihaan nij soꞌ, quiꞌyaj Diose̱, ne̱ chá nij soꞌ se chá nanij rej xta̱ꞌ ado̱nj ―taj nij soꞌ rihaan Jesucristó a.

³²Cheꞌé dan cataj Jesucristó rihaan nij soꞌ a: ―Ya̱ ya̱ cata̱j xnaꞌanj ꞌu̱nj rihaan soj cuano̱, ne̱ xa̱ꞌ se rqué Moisés chá soj, tza̱j ne̱ nuveé se chá ꞌyaj vaa iꞌna̱ꞌ yuvii̱ nu̱ꞌ cavii nu̱ꞌ caꞌanj me yoꞌ maꞌ. Xa̱ꞌ se rqué Réj Diose̱ cha̱ soj, tza̱j ne̱ se quiꞌya̱j ga̱a̱ iꞌna̱ꞌ soj me ya̱ yoꞌ ado̱nj.

³³ꞌO̱ se se chá rqué Réj Diose̱ rihaan soj mé ꞌu̱nj si̱j cavii rej xta̱ꞌ, ne̱ ꞌu̱nj me síí rqué se vaa caꞌve̱e ga̱a̱ iꞌna̱ꞌ ya̱ soj si̱j ma̱n rihaan chumii̱ nihánj nu̱ꞌ cavii nu̱ꞌ caꞌanj ado̱nj ―taj Jesucristó rihaan nij yuvii̱ a.

³⁴Cheꞌé dan cataj nij yuvii̱ rihaan Jesucristó a: ―Rque̱ so̱ꞌ se chá yoꞌ rihaan núj nu̱ꞌ cavii nu̱ꞌ caꞌanj, señor ―taj nij yuvii̱ a.

³⁵Ga̱a ne̱ cataj Jesucristó rihaan nij yuvii̱ a: ―ꞌU̱nj nihánj me se chá, ne̱ aꞌvee ꞌyáj vaa iꞌna̱ꞌ ya̱ yuvii̱ ei. Sese caꞌna̱ꞌ soj rihanj, ne̱ yoꞌo̱ ga̱a̱ xe̱j nimán soj, sese ya̱ uxrá amán rá soj niꞌya̱j soj manj á.

³⁶Tza̱j ne̱ a̱j cataj ꞌu̱nj rihaan soj se vaa nda̱ꞌ se queneꞌen soj manj, tza̱j ne̱ ne cuchuma̱n rá soj ni̱ꞌyaj soj manj a̱ maꞌ.

³⁷Xa̱ꞌ nij síí rqué Réj Diose̱ manj, tza̱j ne̱ caꞌna̱ꞌ nij soꞌ rihanj, ne̱ veꞌé caꞌmi̱i̱ ꞌu̱nj ga̱ nij soꞌ, ne̱ xa̱ꞌ nij síí ꞌnaꞌ rihanj, tza̱j ne̱ daj chiha̱a̱ míj se̱ quiriꞌíj yaníj ꞌu̱nj man nij soꞌ maꞌ.

³⁸Dan me se caꞌnáꞌ ꞌu̱nj rihaan chumii̱ nihánj, tza̱j ne̱ se̱ guun qui̱ꞌyáá ꞌu̱nj nda̱a vaa me rá ma̱ꞌanj qui̱ꞌyáj maꞌ. Tana̱nj cheꞌé rej qui̱ꞌyáá ꞌu̱nj se vaa me rá Diose̱ síí caꞌnéé mán ꞌu̱nj qui̱ꞌyáá ꞌu̱nj roꞌ, cheꞌé dan nanij ꞌu̱nj rihaan chumii̱ nihánj ado̱nj.

³⁹Ne̱ nihánj me se vaa me rá Diose̱ qui̱ꞌyáj ei. Dan me se naꞌvej uxrá rá Diose̱ caꞌa̱nj niꞌya̱ a̱ ꞌó nij síí rqué soꞌ manj maꞌ. Dan me se me rá Diose̱ cunu̱u iꞌna̱ꞌ uún taranꞌ nij soꞌ, qui̱ꞌyáj, asa̱ꞌ quisíj güii caꞌa̱nj niꞌya̱ chumii̱ nihánj ado̱nj.

⁴⁰ꞌO̱ se nihánj me se vaa me rá Réj Diose̱ ei. Me rá soꞌ yoꞌo̱ ga̱a̱ iꞌna̱ꞌ taranꞌ nij síí amán rá niꞌya̱j manj nu̱ꞌ cavii nu̱ꞌ caꞌanj ga̱ soꞌ, ne̱ ꞌu̱nj me síí quiꞌya̱j cunu̱u iꞌna̱ꞌ uún nij soꞌ asa̱ꞌ quisíj güii caꞌa̱nj niꞌya̱ chumii̱ nihánj ado̱nj ―taj Jesucristó rihaan nij yuvii̱ a.