Josua 21:11-24

¹¹Iwe, ra ngeniir ewe telinimw än Arpa. (Ewe mwän Arpa semen Anak.) Iei ewe telinimw a iteni Hepron, a nom won chukuchukutän ewe fanü Juta. Ra pwal ngeniir ewe fanü ünükün fän iten nöür man.

¹²Nge ekewe tanipi ünükün ewe telinimw me wisoposopun kewe ra fen ngeni Kalep nöün Jefune we mwän pwe fanüan.

¹³Iei usun ra ngeni mwirimwirin ewe souasor Aaron ewe telinimw Hepron, ewe telinimwen op fän iten eman mi niela eman aramas, pwal ekewe fanü ünükün fän iten nöür man. Ra pwal ngeniir Lipna,

¹⁴Jattir me Estemoa,

¹⁵Helon me Tepir,

¹⁶Ain, Jutta me Pet-semes pwal ekewe fanü ünükür fän iten nöür man, ükükün tiu telinimw seni ekei ruu ainang.

¹⁷Iwe, seni ewe ainangen Peniamin ra ngeniir Kipeon me Kepa,

¹⁸Anatot me Almon pwal ekewe fanü ünükür fän iten nöür man, ükükün rüanü telinimw.

¹⁹Iwe, mwirimwirin ewe souasor Aaron ra angei ükükün engol me ülüngat telinimw pwal ekewe fanü ünükür fän iten nöür man.

²⁰Iwe, ekewe lusun familien lon ewe eterekesin Kohat seni ewe ainangen Lefi ra angei telinimwer kewe seni ewe ainangen Efraim.

²¹Iwe, ra ngeniir Sikem ewe telinimwen op, pwal ekewe fanü ünükün fän iten nöür man lon chukuchukutän ewe fanü Efraim. Ra pwal ngeniir Keser,

²²Kipsaim me Pet-horon, pwal ekewe fanü ünükür fän iten nöür man, ükükün rüanü telinimw.

²³Nge seni ewe ainangen Tan ra ngeniir Elteke me Kipeton,

²⁴Aijalon me Kat-rimon, pwal ekewe fanü ünükür fän iten nöür man, ükükün rüanü telinimw.