5O Iesu i tamtama tokodos, ra i tama pas a labino kunur na taro det wan toromi, i watungi tan o Pilip lena, “Dat in kul lako utna na inangon awai sur dat in tabor a taro ri nami?”
6O Iesu i watungi lenri sur in lari kut o Pilip. Uni i ut i sa tasman asau ra in pami.
7Ra o Pilip i balu i lena, “Lako utna na inangon ra din kul pasi nam lako ru mar na denaria, ken elar nam det, a lililik kut ra det in nani.”
8Ara melet tagun anun a kum nat na ususer a risano o Endru, a tisin o Saimon Pita, i watungi tan o Iesu lena,
9“Ara natlik kuri i los a limanin beret kut ra di pami nama bali, ma arin natnat na kiripo kai. Ikut pepetlai, in elar ut nama kunur na taro ri?”
10A dino ra, in wuliso rop kut, ra o Iesu i tulu anun a kum nat na ususer sur det in ukis a taro tiro iai. A kunur na taro ra, a niluluk ina kum musano kut i elar nama limo na arip.
11O Iesu i los pas a limanin beret, i watung wakak pas torom o God uni, ma i tibo a taro nami, ra det kis tiro iai. I tibo det kai nam arin kiripo, elar nam anundet a nemnem.
12Ra det sa masur rop, i watungi tan anun a kum nat na ususer lena, “Mot in ubek tomo wakak a utna rop ra det wangon kopos pas uni, sur gong di ban laulau a utna na inangon.”
13Ra det ubek tomo rop pas a utna ra a taro det wangon kopos pas uni, ma det song bukus pas a noino ma aru rat tagun a limanin beret ra.
14A taro det tama a ukinalong ri i pami, ra det watungi lena, “I lingmulus ut, a musano ri, i a poropet ra di watungi lena in nanpat urin una rakrakon bual.”
15Ra o Iesu i sa tasmani lena, det nem na wan toromi sur det in ungongos pasi sur in king, i wan gisen pas gusun det usapat netes una tangai.
16Ra i sa lirop matano mirum, a kum nat na ususer anun o Iesu det wan piso unago una du tasi Galili.
17Det kas taru una pot, ra det turpasi sur det in nan kutus una du tasi Galili sur o Kapernaum. I sa mirum, ma o Iesu ke wanpat utmakai torom det.
18A dekdek na wuwu i wanpat ma a top i umenene det.
19Ra det sa ulusu bakbak, i elar nama limo na kilomita, det tama pas o Iesu i wan sapat netes una tasi torom det una pot. Ra det ngara doko.
20Ikut o Iesu i watungi lena, “Iau kut ri. Gong mot ngara.”
21Numur, det gas pasi sur in kas una pot, ra uniutra, det sot una nubual ra det wan suri.
22Una bung numur, a kunur na taro ra det kis tong una ra papor tasi, det tasmani lena ara pot sot kut i kis tiro iai. Det tasmani lena, a kum nat na ususer kut det wan, ikut o Iesu ut ke kas tomo nam det. Det kut det wan tagitiro iai.
23A ramano kum pot tagitong o Taiberias det sot milau una nubual ra a Labino i watung wakak una beret, ma a kunur na taro det wangon iai.
24Ra a kunur na taro det sa tasmani lena, o Iesu ma anun a kum nat na ususer ka det kis tiro iai, det kas una kum pot ma det wan utong o Kapernaum ra det sisio sur o Iesu.
25A taro det sio pas o Iesu tong una ara papor du tasi Galili, ra det tingi lena, “Tene Ususer, nangisin kut ra u wan taru urin?”
26O Iesu i balu det lena, “A inanos mot nama lingmulus, awu sur mot sisio sur iau uni mot tama a kum ukinalong ra a pami, awu. Mot sisio kut sur iau uni mot wan a beret ma mot masur nami.
27Gong mot papam kut sur a utna na inangon ra i ser mereseng. Mot in papam sur a utna ra in kis tukum sur a nilaun kura numur, ra a Nutun a Musano in tabor mot nami. Uni o Tamano, o God i sa ese tari lena i mulaot un asau ra a Nutun a Musano i pami.”
28Det tingi lena, “Asau met in pami sur met in pam a pinapam anun o God?”
29O Iesu i balu det lena, “Iri a pinapam anun o God, ra mot in nurnur un o naro ra di tulu ru i urin.”
30Ra det ting meleti lena, “Asi na ukinalong un pami sur met in tama i, ma met in nurnur un ui? Asau un pami?
31A kum tumtubu met tagun numugu, det wan a mana una nubual kalako taro uni, elar ra di sa tumus tari una Buk Tabu lena, ‘I tabor det nama beret tagisapat una langit ma det wani.’”
32O Iesu i watungi tandet lena, “A inanos mot nama lingmulus, awu sur o Moses ra i tabor det nama beret tagisapat una langit, o Tita ut i tabor det nami. Ra uniri, i tabor mot nama beret mulus tagisapat una langit.
33I ra i wan pirso tagisapat una langit, i ut a beret anun o God, ma i pitar a nilaun torom a taro una rakrakon bual.”
34Det watungi tano lena, “Labino, un tabor met nama beret ra, una kum bung rop.”
35O Iesu i balu det lena, “Iau ut a beret na nilaun. Osi ra in nan torom iau ken murak, ma osi ra in nurnur un iau ken muruk melet mo.
36A sa watung tari tamot lena mot sa tama tar iau, ikut ka mot nurnur.
37Det rop ra o Tita i pitar tar det tang, det in nan torom iau, ma osi ra in nan torom iau kan lu ru i.
38Uni a wan pirso tagisapat una langit sur an muri ut a nemnem anun o Tita, i ra i tulu ru iau urin. Awu sur a wan pirso sur an mur a nuknuking, awu.
39Ra iri a nemnem anun o Tita, i ra i tulu ru iau urin, lena, gong taio tagun det ra i sa pitar tar det tang in iru. An ukatutur pas det rop melet gusun a minat una bung na warkurai.
40Una nemnem anun o Tita, det rop ra det tamtama torom o Nutunu ma det nurnur uni, det in laun tukum, ma iau an ukatutur pas det gusun a minat una bung na warkurai.”
41A ramano kum te Juda det wasiso na ururai eno un o Iesu, uni i watungi lena, “Iau a beret ra i wan pirso tagisapat una langit.”
42Ra det watungi uni lena, “O Iesu a nutun o Josep kut. Dat tasman o tamano ma o nano. Ilai ra i watungi lena i wan pirso tagisapat una langit?”
43O Iesu i watungi tandet lena, “Gong mot wasiso na ururai eno.
44O Tita i tulu ru iau urin. Kataio in pet lar pasi sur in nan torom iau, ra o Tita ken ben tari torom iau. Ra o Tita in ben tari torom iau, iau ut an ukatutur pasi gusun a minat una bung na warkurai.
45A kum poropet det sa tumus tari lena, ‘O God in ususer det rop.’ Det rop ra det longoro o Tita ma det ususer tano, det in nan torom iau.
46Katutaio i tama tar o Tita. Ikut, i ra i wan tagisapat tan o God, i ut ra i sa tama tar o Tita.
47A inanos mot nama lingmulus, osi ra i nurnur un iau, i sa los pas a nilaun tukum.
48“Iau a beret na nilaun.
49A kum tumtubu mot tagun numugu det wan a mana una nubual kalako taro uni, ikut det sa mat.
50Ikut a beret ri, i wan tagisapat una langit. Osi ra in nani, ken mat.
51Iau ut a beret ra i laun, ra i wan pirso tagisapat una langit. Osi ra in nangon tagun a beret ri, in laun tukum. A lingmulus, a beret ra an etabor nami, i a pining. A pitari sur a taro una rakrakon bual det in laun nami.”
52A ramano kum te Juda det engaras etetalai, ra det watungi lena, “A musano ri in tabor petlan dat nama pinino sur dat in nani?”
53Ra o Iesu i watungi tandet lena, “A inanos mot nama lingmulus, ra ka mot in nan a pinin a Nutun a Musano ma ka mot in inum a gapino, katu nilaun mulus in kis un mot.
54Osi ra in nan a pining ma in inum a gaping, i sa los a nilaun tukum, ma iau an ukatutur pasi gusun a minat una bung na warkurai.
55Uni a pining, i a utna na inangon mulus, ma a gaping, i a danim na ininum mulus.
56Osi ra in nan a pining ma in inum a gaping, in laun un iau, ma iau an laun uni.
57O Tita ra i laun, i tulu ru iau, ma i tabor iau nama nilaun. Lenkutkai ra torom osi ra i wan a pining, an tabori nama nilaun.
58Iri a beret ra i wan tagisapat una langit, awu sur i elar nama mana, ra a kum tumtubun dat tagun numugu det wani, ma det sa mat. Osi ra in wangon tagun a beret ri, in laun tukum.”
59O Iesu i ususer a taro una rumu na lotu tong o Kapernaum ra i watung a kum wasiso ri.
60A susut tagun anun a taro na ususer det longoro a kum wasiso ri, ra det watungi lena, “A etowo ri i ngangitin doko. Osi mo in rakon sot pasi?”
61O Iesu i tasmani lena anun a taro na ususer det wasiso na ururai eno uni. Ra i ting det lena, “Pepetlai, a wasiso ri i ban laulau mot?
62In pepetlai torom mot, ra mot in tama a Nutun a Musano ra in milet melet usapat sur a tamon ra numugu i kis pas iai?
63A Nion, i ra i pitar a nilaun. A dekdekin a pinin a musano, katu utna i gas uni. A kum wasiso ra a watungi tamot, i a nion ma i pitar a nilaun.
64Ikut ara taro tagun mot ka det nurnur.” Numugu ut o Iesu i sa tasman tar det ra ka det nurnur uni, ma o naro kai ra in usobor tari.
65Ma i watungi kai lena, “Iri i a kibino ra a watungi tamot lena, kataio in nan torom iau ra o Tita ken pitar a dekdek tano, sur in mur iau.”
66Numur tano, a susut tagun anun a taro na ususer det milet pas gusuni, ma ka det muri mo.
67O Iesu i watungi tan anun a noino ma aru nat na ususer lena, “Pepetlai, mot kai, mot nemi sur mot in milet mo gusun iau?”
68O Saimon Pita i balu i lena, “Labino, met in nan mo torom osi? Uni anumi kut, a kum wasiso na nilaun tukum.
69Met sa nurnur ma met tasmani lena ui a Tasur na Musano anun o God.”
70O Iesu i watungi tandet lena, “A sa pilok pas mot, a noino ma aru, niko? Ikut ara tagun mot, i a turangon kut!”
Jon 6
Jon 6:5-70