Joni 6:5-70

⁵Anante Jisasi'a, keganti kegma huno keama hakare vahe krerfa Agritega neageno Filipina asmino, Inantegati bretia miza hanunke'za ama vahe'mo'za negahaze?

⁶Ama kema Jisasima hiana Filipina reheno ke'ne, na'ankure Agra inankna zano hni'ana antahi'neno, reheno antahige'ne.

⁷Filipi'a ke nona'a amanage huno asmi'ne, 2 hantreti'a silva zgoreti mizama hania bretimo'a, mago'mago'mo'ma osi'a neterema haniana ama vea krerfafina knarera huozmantegahie.

⁸Agri amagema nentea disaipol ne' Endru, Saimon Pita negna amanage huno Jisasina asmi'ne,

⁹Amafi mago osi mofavre emani'neno 5fu'a bali bretigi, tare nozamegi huno eri'neanagi, asi'amo'a inankna huno ama veapina knarera hugahie?

¹⁰Jisasi'a amanage huno hu'ne, ke huge'za mopafi maniho. Anampina trazamo hu'nefi 5 tauseni'a vahe'naza mopafi mani'nage'za, vene'ne age hampri'naze.

¹¹Jisasi'a breti erino Anumzamofonte nunamu hunteteno, erigorino mani'nare refko huno nezmino, anazanke huno nozamea zamige'za nenazageno zamu hu'ne.

¹²Nazageno zamu'ma higeno'a, Agri'ma amage' nentaza disaipol naga'a zamasmino, atraza ne'zama'a eri atru hiho, e'inahinkeno amne zankna osnie.

¹³Anage hige'za eri atru hzageno, 5fu'a bali bretima kori'za ne'naza atupa atupa'a, 12fu'a eka'eka kupi eriri'naze.

¹⁴E'ina hige'za veamo'za ana kaguvazama Agrama hiaza nege'za, zamagra anage hu'naze. Ama'i tamage huno Kasnampa nere, ama mopafima henka'a egahie hu'za hu'naza ne' mani'ne. (Diu-Kas 18:15)

¹⁵Ana vahe'mo'za zamagraregati eme azeriza kini kvazmi manisie hu'za azeri otiku hzageno, Jisasi'a antahino keno nehuno, anantetira zamatreno agonarega Agraku mreri'ne.

¹⁶Kinaga sege'za, Agri amage' nentaza disaipol naga'mo'za ana kumara atre'za hagerintega urami'naze.

¹⁷Anante ventefi marerite'za, hagerina tkahe'za Kapenium vu'naze. Hago haninkigeno Jisasi'a zamagrama mani'narega uohanati'ne.

¹⁸Hagerimo'a tusiza huno kranto kranto hu'ne, na'ankure tusi'a zaho'mo atufeno egeno ana hu'ne.

¹⁹Ana nehige'za kuta azotareti tina vakakiza 5fu'o, 6si'a kilo mita naza nevu'za zamagra kazana Jisasi'a hagerimofo agofetu ne-eno ventemofo erava'o hige'za nege'za, zamagra tusi zamanogu hu'naze.

²⁰Hianagi Jisasi'a anage huno zamasmi'ne, ama Nagragi, korera osiho.

²¹Anante zamagra zamagu'areti muse nehu'za, Agrira ventefi avrentazageno, vunaku zamagesa antahi'naza mopare ana ventemo'a ame huno uhanati'ne.

²²Vase'za ko'atige'za, ana hagerimofo ankenare mani'naza vahetmimo'za kazana magore huno onensa vente ramimpintira omne'neanki mago me'ne, anampina Agri amage nentaza disaipol naga'enena Jisasi'a mreorige'za ke'naze. Hianagi Agri'ma amage' nentaza nagamo'za zamagraku vu'naze.

²³Hianagi mago'a ne'one vente rami Taiberias kumateti e'za, Jisasi susu huteno breti zamige'za ne'naza mopa tva'onte ehnati'naz e.

²⁴Ehnati'za kazama Jisasi'ene, Agri'ma amage nentaza disaipol naga'anema omninage'za nege'za, zamagra osasi vente ramimpi mreri'za, Jisasinku hakre'za Kapenium vu'naze.

²⁵Ome hakre'za hagerimofo kantu kaziga Jisasima azeri fore nehu'za, amanage hu'za Agrira antahige'naze, Hurami ne'moka (Rabbai) Kagra nazupa amarera e'nane?

²⁶Jisasi'a kenonazmia anage huno zamasmi'ne, Tamage hu'na Nagra neramasmue, tamagra Nagriku nehakra'zana, kaguvazma hua zantekura nohakraze. Hagi tamagra bretima nazageno tmu'ma hia zanteku nehakraze.

²⁷Fanane hania ne'zantera eri'zana e'oriho. Hagi fanane osu manevava hanaza ne'zanku nentahita eri'zana eriho, e'i ana ne'zana Vahe'mofo Mofavremo tamigahie. Na'ankure Nefa, Anumzamo azanko avoma'a retro huno Agri hugnare hunte'ne.

²⁸Anankere zamagra anage hu'za Jisasina asmi'naze, tagra naza huteta, Anumzamo'ma hania eri'zana erigahune?

²⁹Jisasi kenona'a huno zamasmi'ne, Anumzamofona amanahu eri'za erihogu avenesie, Agri'ma huntegeno e'nemofonte tamentinti hiho.

³⁰Anankere zamagra Agri asmi'naze, Kagra na'a avame'zana nehnanketa negeta, tamage huta Kagritera tamentinti'a hugahune? Kagra nankna'za hugahane?

³¹Tagri tfahe'za ka'ma mopafi mana ne'za ne'naze, hu'za krente'naze, Agra monafinti breti neho huno zami'ne. (Eks-Uti 16:4-36)

³²Anante Jisasi'a zamagrira zamasmi'ne, Nagra tamage, rfa hu'na neramasmue, Mosese'a monafinti bretia agra ontami'ne, hagi menina tamage bretia Nagri Nenfa monafinti neramie.

³³Na'ankure Anumzamofo bretia e'i ama monafinti erami'neankino, miko mopafi vahera zamasimu zamigahie.

³⁴Zamagra anante Jisasina asmi'naze, Ramoke, e'i ana bretia maka'zupa tmivava huo.

³⁵Jisasi anage huno zamasmi'ne, Nagra asimu eri bretia mani'noe, aza'o Nagrite esnimo'a aga'zankura osugahie. Hagi aza'o Nagriku amentinti hanimofona tinkura mago'ene ave'ositfa hugahie.

³⁶Hianagi Nagra neramasmue, tamagra ko Nagrira nage'nazanagi, tamagra tamentintia nosaze.

³⁷Maka vahe'ma Nenfa'ma, Nagri'ma nenmia vahe'mo'za Nagrite egahaze, hanige'na Nagrite'ma esimofona Nagra vuo hu'na retufe otregahue.

³⁸Na'ankure Nagra monafinti erami'noe, Nagra navesi'za hunaku ome'noe, hagi hunantege'na e'nomofo avesite erinaku e'noe.

³⁹Anumzamo hunantege'na Nagra e'nomofo avesira anahu hu'ne! Nagri'ma maka vahe'ma nami'nefintira mago'moe huno fnane osugahie, hagina vgare knarera zamazeri otigahue.

⁴⁰Na'ankure Nenfa avesi'zana amanahu hu'ne, maka'mo'za Nemofo nege'za Agrite zamentinti huntesamo'za manivava zamasimu erisage'na, vgamaresia knarera Nagrani'a azeri otigahue.

⁴¹E'igu Jiu vahe'mo'za Agrikura ke hakare hu'naze, na'ankure Agrama huno Nagra ana breti monafinti erami'noe hiazante zamarimpa haviza nehige'za ke hakare hu'naze.

⁴²Zamagra anage hu'naze, ama Jisasi'ma, Josefe nemofo, nefane nereranema negona nepi? Nankna huno menia monafinti Nagra e'noe huno nehie?

⁴³Jisasi'a ana kemofo nona'a, amanage huno zamasmi'ne, Tamagra tamarimpa havizana osutma ke hakare osiho.

⁴⁴Mago'mo'a Nagritera omegahie, Nenfa'ma hunantege'na e'nomo agu'a avazu hanigeno Nagrite esige'na, vgare kna zupa azeri otigahue.

⁴⁵Kasnampa vahe'mo'za amanage hu'za Avontafepina kre'naze, Ana hanigeno Anumzamo maka'mokizmia huzmasmigahie. (Aisa 54:13) Maka'mo'za Nenfa ke nentahi'za rempi hanamo'za Nagrite egahaze

⁴⁶Mago mo'e huno Nefana onke'ne, Anumzane mani'neno e'nemo Agrake Nefana ke'ne.

⁴⁷Tamage hu'na Nagra neramasmue, aza'o amentinti hanimo manivava asimura erigahie.

⁴⁸Nagra'ni'a manivava hu'mofo bretia mani'noe.

⁴⁹Tmagehe'za ka'ma mopafi mana nete'za zamagra fri'naze.

⁵⁰Ama'ina bretia monafinti ermi'neankino, mago'mo'ma nesuno'a ofri manigahie.

⁵¹Nagra ksefa mani'zamofo breti monafinti eramino'e, mago'mo ama ana bretima nesuno'a, agra manivava hugahie, E'i ana bretia Nagri navufa me'ne, ana navufamo maka mopafi vahe manivava asimu zamigahie.

⁵²Anage nehige'za anante Jiu vahe'mo'za nentahi'za, zamagra ke hugantigma hu'za anage hu'naze, Inankna huno ama ne' mo'a Agra avufa tamisigeta nenaku hunkeno nehie?

⁵³Ananku Jisasi'a anage huno zamasmi'ne, Tamage rfa hu'na neramasmue, Vahe'mofo Mofavre'mofo avufane, korane onesutma tamasimu eritma mani'zana tamagripina omnegahie.

⁵⁴Mago'mo, Nagri navufa neneno, Nagri kora nesimo'a manivava asimu erisanige'na, Nagra vgare knazupa azeri otigahue.

⁵⁵Na'ankure Nagri navufgamo'a tamage ne'zane, higeno Nagri koramo'a tamage ti me'ne.

⁵⁶Mago'mo Nagri navufa neneno, Nagri korama nesnimo'a, agra Nagripi manige'na, Nagra agripi nemnue.

⁵⁷Mani'nea Nenfa, Nagrira hunante'ne, na'ankure Nenfa'ma mani'negu Nagra mani'noankino, aza'o Nagri'ma nesimo'a, Nagra mani'nogu agra manigahie.

⁵⁸Ama'i monafinti ermi'nea breti me'ne. Tmagehe'za ka'ma mopafi nete'za fri'naza ne'zana omne'ne, aza'o mago'mo ama bretima nesimo'a manivava hugahie.

⁵⁹Ama naneke zga Kapenium Jiu vahe osi mono nompi (sinagog) mani'neno Agra'a rempi huzami'nea naneke.

⁶⁰Anazanku hu'za hakare'a Jisasi amage nentaza disaipol naga'mo'za, ama ana nanekema nentahi'za, ama kna'nentake naneke nehianki, iza agesa anteno antahigahie? hu'za hu'naze.

⁶¹Hianagi Jisasi'ma hiankemo amage' nentaza disaipol nagara zamarimpa eri haviza hzageno, nezmageno, Jisasi amanage huno zamantahige'ne, Amama hua nanekegu tmarimpa kna nehazo?

⁶²Inankna hugahie, Vahe'mofo Mofavremo'ma negesageno ko'ma mani'nerega ete marerisigetma na'ane hugahaze?

⁶³Avamu'mo asimura neramie, tavufgamo'a mago'zana eri fore osugahie. Kema nagrama tamagrima neramasmua kemo'a, avamu ene ksefa mani'zane me'ne.

⁶⁴Hianagi mago'amota tamentintia nosaze. Na'ankure ese agafareti Jisasi'a zamentinti osnaza vahera, nezmageno iza'o komoru hanige'za Agri'ma ahe simofona agu'a ko ke'ne.

⁶⁵Anante Agra anange hu'ne, ama'na agafare nagra tmagrira tmasmi'noe, mago'mo'a Nagritera omegahie, Nenfa'ma avare namisimoke'za egahie.

⁶⁶Ana kema hiazanku Agri amage nentaza disaipol nagapintira ruga'amo'za atre'za, Agranena vano osu'naze.

⁶⁷E'igu Jisasi'a 12fu'a naga'a zamantahige'ne, Tamagrane natretma vunaku nehazafi?

⁶⁸Saimon Pita'a ana kemofo nona'a Agri asmino, Rantimoka izante katreta vunaku hunkenka nehane? Kagri kemo manivava asimura nemie.

⁶⁹Tagra tamentinti nehuta Kagrira antahita keta hu'none, Kagra magoke Anumzamofo Ruotge' ne', hugantegenka e'nane.

⁷⁰Jisasi'a ke nona'a zamagri zamasmi'ne, Nagra 12fu'a nagara huhampri tmante'noe, hianagi mago'moka havi avamu mani'nane.