Jon 6:5-70

⁵Jises suri batun i loken, iy anyolom lau solo-an labai adek amwenen ame hawe oro. Iy eme ndremenya Pilip, “To kasih jabi ramen niri lau marakon ame dah kameh kala heh handru?”

⁶Iy ndremenya doh ta none ndrine Pilip. Tasah, lakou marakon badeh, iy ndrabwetenei ndrano ta iy kameh amekes.

⁷Pilip asehek i ta Jises i buku doh: “Sihinek ta bun ma ndru la-uh badeh, winiyan basihinei jabi ramen winiyan bala boho ndramak ari, ari are kede-eh bwe!”

⁸Lau tan ari ja badeh, Enduru nadu tine Saimon Pita, iy asehek anya,

⁹“Nah ari doh ni tan ma la-uh ma hawe bali ma limeh iri ndrabwidiy le. Arile, barala winiya lau marakon deh?”

¹⁰Jises tiye i toro lau tan i buku doh, “Ado katiye kili tiri lau marakon kamanyah ka-en andri.” Bwidiu solo-an udu kon doh. Eme ma iri lau marakon manyah an andri bwele-e bwidiu. Kane iri mwan marakon i se badeh, asahan ma lamawa (5,000).

¹¹Ano Jises andrei jabi ramen, iy edeu wurah i ta Kindrei ta aliy. Iy atehei ili mine oro lau tan, oro adeu i niri lau marakon nane manyah an bwele-e bwidiu. Ano iy andrei ni ja, iy amekes i buku le aliy. Iri aimon ili ili winiya le so-ok tiri ano.

¹²Ma ndrine iri marakon badeh, idih. Jises eme tiye oro lau tan anya, “Ya ado katukumwi tikibwah tiri nyamon erah, marakon ki le se, sakeh laleyah.”

¹³Oro lau tan ame tukumwi tikibwah tiri ili le se, oro anyuhiy ili bwak ma ronoh la-uh.

¹⁴Iri lau marakon nane dah anyolom lahou tinan ma hawe kalem Jises amekes. Iri ame asehek i buku doh, “Aliy le ai, iy propet mene anya keme bolo kon munyak.”

¹⁵Arile, Jises ndratanan budon tiri, iri anya kasehek sahou ki se na boto-on tiri, ma iri anya katehei Jises kasahan kabin tiri. Arile, Jises eme ruwani iri, iy le ari iu ili bwele-e mandrei.

¹⁶Kon ndra beyeh ai, oro lau ta Jises adek ame andri kapa gwa li ja.

¹⁷Oro ala bolo ndron ra-ei, ma oro abahau ala loboho bilisiu Kapena-um. Kon ndraben ai, Jises bala hawe oro bwe le.

¹⁸Jor atohou boto-on eme bwidi bayau a tinan.

¹⁹Oro abahau luluwen sese, i buku kilomita limeh ala len. Mada oro ili anyolom Jises edek bwele-e gwa ili mirihik toro. Eme ma bwidi oro anoh labai.

²⁰Arile, iy eme tiye ili toro, “Jo, jo, ado sanoh!”

²¹Eme bwidi ndrine oro sekesek. Oro ame suni iy i ndron hawe oro. Sese luwen bwe oro ndrasos babi bilisiu nane oro anya kala aliy.

²²Kon aleu len ari ja. Lau ra-on ado kapa gwa bilisiu nane bwena, oro tanan buku Jises badeh, bala ndron hawe oro lau tan bwe. Oro lau tan le badeh, ala.

²³Ano, ndron ra-on badu Taiberiyas ame asos bilisiu, mirihik ta kon iri lau mene ado aliy, aimon jabi ramen Jises edeu wurah i ta aliy.

²⁴Iri lau marakon banyolom Jises ma hawe oro lau tan bwe. Eme ma iri ala bolo iri ndron ra-on ja, abahau ala bilisiu ala Kapena-um asilah Jises.

²⁵Iri ame ala ndruni iy udu kapa gwa li bilisiu. Iri ame ndremenyani iy, “Ndramak ta leheya, saba len handru ou asahan dah?”

²⁶Jises asumon sahou toro i buku doh, “Handru labai jo katiye taha. Aha babwetenei iri lahou tinan ma kalem mene aha anyolom jo amekes, bwe, eme aha ame asilah jo ja. Arile, aha ndrani jabi ramen ma bwidi ndrine aha irek. Ta idoh le, aha abo gok ta asilah jo.

²⁷Aha sabo gok ta nyamon ale kameh andra-i, ano abola. Aha kabo gok ta nyamon udu luluwen ma udu mwasin, ma nyamon kameh edeu kohan handru ewek taha ma ta udu le buku doh. Nadu Ndramak Awas kameh edeu naha nyamon doh. Taman Kindrei suni nadun eme, ma iy atehei boto-on i tan ta atondrok iri lakou marakon.”

²⁸Iri ame ndremenya iy ja, “Ahi kamekes saba gok handru, ta ahi winiyan amekes lahou ta Kindrei?”

²⁹Jises asehek sahou ja i toro i buku doh, “Gok ta Kindrei i buku doh: Aha katehei budon taha kili ta iy ndramak nane Kindrei ndrasuni iy ndrame.”

³⁰Iri ndremenya iy ja, “Saba kalem ja kameh ou amekes ta ahi kanyolom ma ahi katehei budon tahi ki le tam? Ou amekes sah handru?

³¹Tubu ahi iri mene aimon nyamon ari, iri aloh mana i buku jabi ramen, udu bolo kon lomale an. Buku iri ndratorowenei, ‘Iy edeu niri jabi ramen ta aimon badu kandrah.’”

³²Jises asehek i tiri i buku doh, “Handru labai jo tiye taha, Moses badeu naha jabi ramen badu kandrah bwe. Badeh, tama edeu naha jabi ramen handru badu kandrah.

³³Jabi ramen ta Kindrei nane iy udu kandrah eme andri ta edeu kohan handru eme ta kon munyak.”

³⁴Iri anya, “Ndramak tinan, na le dan ou adeu nahi jabi ramen baden!”

³⁵Jises tiye i tiri i buku doh, “Jo le, jo jabi ramen handru kohan udu aliy. Are lau iy eme hawek, iy winiyan bamak son bwe, ma are lau iy atehei budon tan eme tek, balen kameh winiyan bamar ta gwa ja bwe.

³⁶Buku jo ndrasehek taha, aha ndranyolom jo, arile aha batehei budon taha handru bame tek bwe le.

³⁷Iri lau, tama abudon ta edeu iri ame tek, idah kameh iri ame hawek handru. Buku are lau iy anya keme hawek, jo kameh winiyan batikahei iy ba-au bwe.

³⁸Jo udu kandrah ndrame andri. Jo eme ta amekes lahou na budon tek le bwe. Jo eme ta amekes iri lahou na budon ta tama, iy nane suni jo eme.

³⁹Idah badeh, budon tan, iy suni jo eme ta jo samani iri lau nane iy ndraleheyani iri ndrame tek. Buku len hamon, jo kameh kamete-ei iri ja.

⁴⁰Budon ta tama badeh, iy aso-ok lau marakon kanyolom kili le ta nadun, ma iri katehei budon tiri kili le ta nadun. Idah kameh koha iri winiyan bano bwe, ta udu le buku doh. Jo eme kameh mete-ei iri lau amak, ame loken ja na len hamon.”

⁴¹Udu ja badeh, iri Juwis abolosen i tan ta iri sahou iy asehek i buku doh, “Jo badeh, jo jabi ramen handru udu kandrah eme andri.”

⁴²Iri ame nunu-uh i buku doh, “Kede-eh Jises, taha tanan taman uru tinen. Iy le ai, iy nadu Josep. Buku sah ja iy asehek, ‘Jo udu kandrah eme andri’?”

⁴³Jises eme asehek sahou i tiri i buku doh, “Aha ka-iy nunu-uh.

⁴⁴Tama suni jo eme andri. Ari ndramak winiyan bame hawek le manyah bwe, winiya le tama andrei iy eme hawek, ma jo kameh mete-ei iy ili loken na len hamon.

⁴⁵Sahou iri ndratorowenei in bolo buk tiri propet tiye i buku doh, ‘Kindrei kameh leheya iri.’ Are lau anuhun tama, ma iy in hamon ta tanan tan, badeh, iri kame hawek.

⁴⁶Ari ndramak banyolom tama bwe le. Iy le ari nane udu hawe Kindrei, iy le badeh, ndranyolom tama.

⁴⁷Handru labai jo tiye taha. Are lau iy atehei budon tan eme tek, idah kameh kohan handru winiyan bano bwe ta udu le buku doh.

⁴⁸Jo badeh, jabi ramen handru ta edeu kohan handru ili tiri lau.

⁴⁹Tubu aha iri bwena mene aimon jabi ramen udu kon lomale an, arile iri ndramak.

⁵⁰Jabi ramen dah badeh, badu kandrah amwenen eme andri. Buku are lau iy aimon, iy winiyan bamak bwe.

⁵¹Jo jabi ramen kohan handru udu aliy, iy udu kandrah eme andri. Buku are lau iy aimon jabi ramen dah, kohan handru kameh udu le buku doh. Jabi ramen dah i buku odak, ta jo edeu ta koha iri lau badu kon munyak.”

⁵²Eme ma bwidi losen udu ndrokowa iri Juwis amwenen. Iri anya, “I buku sah handru iy ndramak kede-eh edeu na taha odan?”

⁵³Jises asehek ili tiri i buku doh, “Handru labai, jo tiye taha. Aha badeh, kaimon oda Nadu Ndramak Awas ma aha ka-un ndrayen. Buku aha bamekes bwe, idah kameh kohan handru doh aha winiyan bakohok bwe.

⁵⁴Are lau iy aimon odak, ma iy a-un ndrayek, idah kameh kohan handru udu tan udu le buku doh, ma jo kameh mete-ei iy amak ja na len hamon.

⁵⁵Tasah odak badeh, nyamon awas handru ma ndrayek badeh, gwa simidin handru.

⁵⁶Are lau iy aimon odak ma iy a-un ndrayek, iy badeh, in hawek ma jo in hawen.

⁵⁷Tama badeh awas, ma na boto-on ta tama le jo asahan eme awas. Iy suni jo eme. Buku are lau iy aimon jo, iy winiyan bamak bwe tasah iy aimon jo.

⁵⁸Jabi ramen dah badeh, udu kandrah amwenen eme andri. Iy bala buku jabi ramen mene tubu taha iri aimon ado kon lomale an bwe. Iri aimon, arile iri amak. Are lau iy aimon jabi ramen dah badeh, iy winiyan bamak bwe. Kohan handru kameh udu le buku doh.”

⁵⁹Jises asehek iri sahou marakon doh, ma iy leheya iri udu bolo asiu ta atukum tiri Juwis udu Kapena-um.

⁶⁰Eme oro lau tan anuhun, ma oro solo-an asehek, “Leheya tan doh badeh, baleu se bwe. To kakohok bolo sahou tan barala buku sah handru?”

⁶¹Jises ndratanan oro lau tan badeh, nunu-uh ta sahou nane. Iy eme asehek ili toro i buku doh, “Sahou nane tono-ei ndrine ado deh?

⁶²Budon tado i buku sah handru, buku ado anyolom Nadu Ndramak Awas iu ili hamon ili kon mene iy udu aliy eme?

⁶³Oda ndramak winiyan badeu kohan handru bala ta ndramak bwe. Idoh badeh Malawin Ndrabun edeu kohan handru. Sahou jo asehek ewek taha badeh, ta Malawin Ndrabun, ma iri sahou doh edeu koha iri ewek taha.

⁶⁴Arile aha rayah badeh, batehei budon taha bwe.” Jises ndratanan are lau iy batehei budon ba-en tan bwe. Iy i tanan udu ndra bada katin ta are lau handru kameh amekes sa-oh tan.

⁶⁵Jises asehek ili le i buku doh, “Jo katiye taha: Ari ndramak winiya bame hawek bwe, buku tama badeu boto-on bala tan bwe.”

⁶⁶Udu bada len doh, oro lau tan rayah atobwak. Oro ba-en hamon tan ja bwe.

⁶⁷Jises eme ndremenyani oro lau tan ma ronoh la-uh, “Ado anya ka-au ale?”

⁶⁸Saimon Pita eme asehek ili tan i buku doh, “Laban, are handru kameh aso kala hawen? Sahou ou asehek badeh, kohan handru udu aliy iy winiyan bano bwe, iy kameh ta udu le buku doh.

⁶⁹Ahi ndratehei budon tahi marakon ndrawek tam, ma ahi ndratanan, ou badeh, Nadu Kindrei ndrabun ari le.”

⁷⁰Ano Jises asehek sahou i toro i buku doh, “Jo andrei ado ma ronoh la-uh badeh, an hamon tek. Arile, iy ari in bolo ado badeh, iy balik.” (