Juan 6:5-70

⁵Jesusnam tseman atscaq nunacuna ewaqta riquecur, disipulun Felipita nerqan: —Que nunacuna micuyänanpaq ¿mepitaraq tantata rantishun? —nir.

⁶Peru tsenoqa nerqan “Mä, ¿Imash nenqa?” nirmi, porqui Jesusqa musyarqannam imano ruranantapis.

⁷Felipinam nerqan: —Juc nuna puwaq quilla uryapucur gananqan qellewan tantata rantirninpis, manachi tincutsishwantsu cada unu ichic ichic llamiriyänanllapaqpis —nir.

⁸Tsenam disipulun Andres, Simon Pedrupa wauqin, queno nerqan:

⁹—Quechomi juc wamrapa capun pitsqa tantan sebadapeq y ishque ichic ichic pescadun; ¿Peru imatam que tsicaqpaq tinconqa! —nir.

¹⁰Tsenam disipuluncunata Jesus nerqan: —Que nunacunata tätsiyë —nir. Tse quecayanqanchoqa carqan atsca tsampam, tsemanmi jamacuriyarqan. Pitsqa waranqanomi (5,000) ollqucunalla cayarqan.

¹¹Jesusnam tse tantata tsarircur, Diosta “Grasias” nicurir, disipuluncunata qorqan. Y pecunanam tse jamecaqcunata qarayarqan. Tsenollam pescadutapis qararqan. Teqñayanqanyaqmi micuyarqan.

¹²Tecñaq micuriyaptinnam, disipuluncunata Jesus queno nerqan: —Catuyanqan paquipi tantacunata elluyë mana ujunanpaq —nishpa.

¹³Pitsqa sebada tantallapitam tselaya miquicayaptinpis, paquipicunata elluriyarqan chunca ishque (12) canasta juntata.

¹⁴Nunacunanam Jesus tse milagru rurashqanta riquecur, queno niyarqan: —¡Que nunaqa rasonpam que patsaman shamunanpaq caq profeta! —nir.

¹⁵Jesusqa musyarerqanmi nunacuna reynincuna cananpaq malas chureta munayanqanta. Tsemi jircacunapa yape cuticorqan japallan.

¹⁶Tardiyäriptinnam, Jesuspa disipuluncuna lamarman uräyarqan.

¹⁷Lanchaman lloqacurcurnam, wac tsimpa Capernaum marcaman eucuyarqan. Tse öraqa paqasnam carqan, y Jesusqa manam pecunaman shamorqanraqtsu.

¹⁸Tseno euquicayaptinmi, feyupa bientuptin, lamar laqcheqsar qallaquicorqan.

¹⁹Pitsqa quilometrutano ewecarninnam, Jesusta riquecuyarqan yacu jananpa ewar pecunaman yecurëcaqta. Tsenam mana reqirnin, mantsaquecuyarqan.

²⁰Jesusnam nerqan: —¡Noqam cä. Ama mantsacäyëtsu!

²¹Tsenam lanchaman cushishqa lloqaratsiyarqan; y rasmi ewecayanqanman chäriyarqan.

²²Waräninnam, lamarpa wac tsimpancho dejayanqan nunacunaqa cuentata qocuriyarqan tse jucllella lanchawan disipuluncunalla eucuyanqanta, y Jesusqa tse lanchaman mana lloqanqanta.

²³Tseno quecayaptinnam, Tiberias marcapita waquin lanchacunana chäriyarqan. Tsaq tsechomi Diosta grasias nicurir, nunacunata Teyta Jesus tantancuna qarashqa carqan.

²⁴Y tsecho Jesusta ni disipuluncunata mana tarirmi, tse lanchacunaman lloqarcur, nunacuna Capernaum marcaman eucuyarqan Jesusta asheq.

²⁵Lamarpa wac tsimpanman chärirnam, Jesusta tsecho taririr, espantacur queno niyarqan: —Mayestru ¿Imetaq queman chämorqonqui? —nir.

²⁶Tsenam Jesus nerqan: —Rasontam rasontam niyaq. Manam milagrucuna rurashqäta ricayanqequirecurtsu qatiräyämanqui; sinoqa pacha junta micutsiyanqaqrecurllam, canan ashiyämanqui.

²⁷Ama yarpacachäyëtsu pacha miquillapaqqa. Tse miqueqa ushacaqllam. Antis, yarpacachäyë wiñe caweman chätsicoq caq miquipaq. Tsetam Diospita Shamushqa Nuna qoyäshunqui, peta Dios Yaya acrashqa captin —nir.

²⁸Nunacunanam niyarqan: —¿Imacunatataq tsepenqa Dios munan rurayänäta? —nir.

²⁹Tsenam Jesus queno nerqan: —Diosqa munan cachamushqanman creyicuyänequitam —nir.

³⁰Tseno niptinnam, nunacuna tapuyarqan: —¿Ima milagrutataq ruraramunqui tseta ricarnin noqacuna qamman creyicayämunäpaq? ¿Mä, Imallatapis ruraramï?

³¹Tsunyaqcho quecarmi, une castantsiccuna ‘Manä’ nishqan tantata micuyarqan. Tsemi Diospa palabran queno escribirëcan: ‘Sielupita tantatam nunacunata qararqan’ nir.

³²Tsenam Jesus nerqan: —Rasontam rasontam niyaq: Manam Moisestsu sielupita tantata qoyäshorqequi, sinoqa Dios Yayämi rason caq tantataqa sielupita cachamun.

³³Dios cachamushqan tantaqa sielupita shamushqa carmi, jinantin patsacho nunacunata cawatsenqa —nir.

³⁴Nunacunaman niyarqan: —Tëte, cananpita witsepana tse tantalläcuna qarecalläyämë —nishpa.

³⁵Jesusnam nerqan: —Noqam tse cawatsicoq tantaqa cä. Noqaman shamoq caqqa manam imepis mallaqanqatsu, y noqaman marcäcoq caqqa manam ni imepis yacunanqatsu.

³⁶Peru niyashqaqnollam rurashqäcunata riquecarninpis, noqaman creyiyanquitsu.

³⁷Dios Yaya qomashqancunaqa pi mepis noqamanmi shayämun y noqaman shamoqcunataqa manam qarqushaqtsu.

³⁸Porqui noqaqa que patsaman shamushqa cä manam quiquï munashqäcunata ruranäpaqtsu, sinoqa cachamaq Papänïpa muneninta ruranäpaqmi.

³⁹Cachamaqnïqa manam munantsu qomashqan nunacuna ni jucllellapis infiernuman ewayänanta. Antis pëqa munan juisiu junaqcho llapan qomanqan caqcunata cawaritsimunätam.

⁴⁰Y Papänïqa munan tsurin canqäta cuentata qocur, noqaman marcäcur, wiñepa cawayänantam. Pecunatanam juisiu junaqcho cawariratsimushaq —nir.

⁴¹“Noqaqa sielupita shamushqa tantam cä” nishqa, captinmi, Jesusta israel autoridacuna, pacallapa pepa contran parlar,

⁴²queno niyarqan: —¡Que Jesusqa Josepa tsurintaq! ¡Papäninta mamäninta reqintsictaq! ¿Imanirmi ‘Sielupitam shamushqa cä’ nimantsic! —nir.

⁴³Tseno niyaptinnam, Jesus nerqan: —Ama tseno niyanqaqrecur pacallapa conträ parlayëtsu.

⁴⁴Cachamaq Dios Yaya nunacunata shonquncunacho mana cäyitsiptenqa, manam ni pipis noqaman shamunmantsu; y noqam juisiu junaqcho pecunata cawaritsimushaq.

⁴⁵Une profetacunam queno escribiyarqan: ‘Diosmi llapancunata yachatsenqa’ nir. Tsemi pipis Dios Yaya parlashqanta wiyar yachacorqa, noqaman creyicuyan.

⁴⁶Manam pipis Dios Yayata ricashqatsu, sinoqa Diospita Shamushqa Nunallam ricashqa.

⁴⁷Rasontam rasontam niyaq. Noqaman marcäcoqcunaqa wiñe cawayoqmi quecayan.

⁴⁸Noqaqa cawatsicoq tantam cä.

⁴⁹Une castequicunam tsunyaqcho quecar, ‘Manä’ nishqan tantata micuyarqan. Tse tanta micurninpis, tse tsunyaqllachomi wanuyarqan.

⁵⁰Peru cananqa sielupita shamoq tantapaqmi noqa willecayaq. Tse tanta micoq caqqa manam wiñepatsu wanonqa.

⁵¹Noqam sielupita shamoq tse cawecaq tanta cä. Sitsun que tantata pipis miconqa, wiñepam cawanqa. Tse tantaqa quiquïpa etsämi. Y jinantin patsacho nunacuna wiñepa cawayänanpaqmi etsäta entregashaq.

⁵²Jesus tseno niptinnam, tse israel autoridacuna piñacurcur, quiquincuna pura queno ninacuyarqan: —¿Imanoraq que nuna etsanta micutsimäshun! —nir.

⁵³Tsenam Jesus nerqan: —Cäyiyämë. Rasontam rasontam niyaq. Diospita Shamushqa Nunapa etsanta mana micorqa y yawarninta mana uporqa, manam wiñe caweta tariyanquitsu.

⁵⁴Etsä micoq caqqa y yawarnï upoq caqqa wiñepam cawanqa. Tse nunataqa juisiu junaqchomi cawaritsimushaq.

⁵⁵Porqui noqapa etsämi rasonpa micunaqa, y yawarnïmi rasonpa upunaqa.

⁵⁶Noqapa etsä micoqqa y yawarnï upoqqa, noqawanmi jucnolla canqa y noqapis pewanmi jucnolla cashaq.

⁵⁷Noqaqa cawä wiñe caweyoq cachamaq Dios Yayarecurmi, tsenollam noqapa etsä micoq caqqa noqarecur cawayanqa.

⁵⁸Noqaqa sielupita shamoq rasonpa caq tantam cä. Une castequicunam ‘Manä’ nishqan tantata micur wanuyarqan, peru que tantata micoq caqqa wiñepam cawanqa —nir.

⁵⁹Quecunatam Jesus nerqan Capernaum marcapa ellucayänan wayincho yachatsicurnin.

⁶⁰Jesus tseno yachatsicushqanta wiyarirnam, tse atscaq qatiraqnincuna niyarqan: —Que yachatsiconqanqa allapa sasataq. ¿Piraq tseta wiyarpis cäyinman! —nishpa.

⁶¹Qatiraqnincuna tseno nir piñashqano cayanqanta musyarirnam, Jesus nerqan: —¿Tseta niyanqaqrecurcu piñacurcuyanqui?

⁶²Y Diospita Shamushqa Nuna nopa canqanman cuticoqta ricarninnäqa, ¿imaraq niyanquiman?

⁶³Diospa Espiritunmi nunataqa cawatsin. Etsanllapitaqa manam nuna cawantsu. Que nicayanqaqqa almequicunapaqmi y wiñe caweyoq cayänequipaqmi.

⁶⁴Peru waquinniquicunaqa que niyanqaqta manam creyiyämanquitsu —nir. Tseno nerqan Jesus qallananpita patsa waquin qatiraqnincuna peman mana creyicuyanqanta musyarninmi, y meqan caq traisionananta musyarninmi.

⁶⁵Tsepitanam Jesus nerqan: —Tsemi waquinniqui mana creyiyämaptiqui, niyarqoq, ‘Manam pipis noqaman shamunmantsu, Dios Yaya shonquncunacho mana cäyitsiptenqa’ —nir.

⁶⁶Tse junaqpitam atscaq qatiraqnincuna Jesusta jaqiricur eucuyarqan. Pewan mananam puriyarqannatsu.

⁶⁷Tsenam tse chunca ishque (12) disipuluncunata Jesus nerqan: —¿Qamcunapis jaqirayämanquicu? —nir.

⁶⁸Tsenam Simon nishqan Pedru queno nerqan: —Teyta, ¿pimanraq ewallayäshaq? ¡Qamllataq parlanqui wiñe cawaquipaq!

⁶⁹Noqalläcunaqa qamllamanmi marcäculläyä. Y musyayämi Dios Acrashqan canqequita —nishpa.

⁷⁰Jesusnam nerqan: —Qamcunatam chunca ishcaqta (12) acrashqa cayaq disipulücuna cayänequipaq, y tsepita jucniquim quecan diablu —nir.