Johane 6:1-12

¹Jesu e dâŋ i mufârerâ Galilaia riqic, Tiberia riqic hâcne, fotâcnerâ ocniŋucnao raʒiwec.

²Raʒime ŋic ŋokac bocjahazi huc ʒâichec ɋiɋicne bacjopame honembiŋte bâjâpembiŋ.

³Eme Jesuzi motecfâcne rocjopame tikio ferâ ŋembiŋ.

⁴Dameŋ ira Judaŋic aakic hombaŋ‐jeŋic bembeŋkewec.

⁵Eme Jesuzi ʒâŋe firâ ŋic guru sâko fisipie honec‐joparâ Filipo wiocnerâ muwec, “Poroŋ wenirec furine barâ i sâko gumec‐jopapene sâcjopaocmu?”

⁶E wiac eocte manasume foha mâc esâickewec.

⁷Eme Filipozi ʒiŋuc muwec: “20 kinazi poroŋ furine barâ gumec‐jopapene mâc hesâsâc‐jopaocmu.”

⁸Mume motecfâcne jaŋeraonec moc, Anderea, Simoŋ Petorore ɋa, eki ʒiŋuc muwec:

⁹“Ʒira motec moc jukac eki poroŋ memoc â opâ qowi jajahec bajukac, erâ ŋic guru sâko jâmbâŋte keci mac izi wemo ezo?”

¹⁰Eme Jesuzi muwec, “Ŋoŋe ŋic ejarepie qâzuckerâ waha ŋeniŋ.” Eme mâreŋ ira kecɋaŋ fowec i toma âterâ ŋic 5 tauseŋ qâririŋ iŋuczi waha ŋerambiŋ.

¹¹Eme Jesuzi poroŋ rorâ daŋge murâ ŋic ŋerambiŋ jaŋe bâtâc bajarewec â qowi iŋuc jaha mupie sâc jarewec.

¹²Nârâ gapec‐jopame Jesuzi motecfâcne ʒiŋuc jazawec: “Tiwâne forâ sipirickezacte nuseniŋ.”