Johane 4:36-51

³⁶Ro qânusuc gie baocmuzi furine roocmu, â fârinezi juju sanaŋte biŋe eocmu. Eme he sarac ewec â fârine rome fewec jahe mâmâc babafic erâ ʒeri enicmu.

³⁷Ehame dâŋ kecʒi sanaŋkeocmu: ‘Moczi he sarac eekac, â moczi fârine rome feekac.’

³⁸Noni ŋoŋe he sarac mi embiŋko fârine ropie feocte sorec‐ŋopakopac. Gie i gâcnezi bapie fuawec eme ŋoŋe mâc rauckeŋgopieŋ.”

³⁹Eme Samaria ŋokac e haefâc‐ticne ʒiŋuc jazawec: “Wiac epo bapo i mutaniŋke‐nare‐fârejec.” Eme dâŋ irec bocjahazi Jesu manasiŋkembiŋ.

⁴⁰Irec Jesurao fisirâ jaŋehec juocte hefârembiŋ. Eme Jesuzi mana‐jarerâ ʒoaŋ gie bapa jajahec jaŋere haeo juwec.

⁴¹Eme miti jazame bocjaha jâmbâŋzi mana ʒakiembiŋ.

⁴²Ehuc ŋokac ʒiŋuc âzâcnembiŋ: “Qanaŋ gore dâŋ binaŋte erâ manasiŋkembeneŋ, ʒi ine nâŋe nâŋâc micticnaonec dâŋ manarâ ʒiŋuc manapaŋkeŋgopeneŋ: Eki jâmbomac mâreŋ sâc ŋic nâŋâcne Bâbâpiaŋ.”

⁴³Eme Jesu e jaŋehec gie bapa jajahec jurâ Galilaia mâreŋko rawec.

⁴⁴Jesu e jahac qanaŋ ʒiŋuc mufuawec: “Porofete moc e jahacne hae mâreŋko jume sâcne mi sâseniŋmu.”

⁴⁵Eme Galilaia mâreŋko rafisime Galilaia ŋic jaŋe âgo ecnembiŋ. Ine jaŋe juwicnao mâmâc Jerusalem haeo rarâ aakic hombaŋko gie bame honembiŋte iŋuc ecnembiŋ.

⁴⁶Eme Kana haeo Galilaia mâreŋko mârâc mume opâzi waiŋ ewec ira hâcne mocwâc risiewec. Eme Kafanaum haeo kia moc juwec, e ŋokâ‐ticne hucsâko bame fowec.

⁴⁷Eme Jesu e Judaia mâreŋkonec risierâ Galilaia mâreŋko mocwâc ware fisikac, iŋuc mupie manarâ kia e Kana haeo Jesurao rarâ ŋokâ‐ticne hâmozo ehuc fowec irec jowame ranicte numucnewec.

⁴⁸Eme Jesuzi ʒiŋuc âzâcnewec: “Ŋoŋe mâsi â wiac ʒâŋe furu‐ŋeŋic sawa honerâ dâŋnane mana ʒakieeŋgopieŋ.”

⁴⁹Eme ŋiczi muwec: “Wofuŋ, ŋokâ‐nane hâmozacte biac fâzemec.”

⁵⁰Mume Jesuzi ʒiŋuc âzâcnewec: “Go mâc rac, ŋokâge ɋiɋic qakac.” Eme ŋic e Jesure dâŋ mana ʒakiehuc risie rawec.

⁵¹Ehame motec jaŋe kiŋaŋ warerâ ʒiŋuc âzâcnembiŋ: “Ŋokâge ɋiɋic qajec jukac.”